ຢູ່ທີ່ຫ້ອງການບ້ານພັນໄຊ ເມືອງລ້ອງແຈ້ງແຂວງໄຊສົມບູນ ໄດ້ຈັດພິທີປີດຊຸດຝຶກອົບຮົມໂຄງການສ້າງຄວາມເຂັ້ມແຂງ ແລະ ພັດທະນາສີມືແຮງງານກ່ຽວກັບເຕັກນິກການປຸງແຕ່ງໄຄແຜ່ນ​ເປັນສິນຄ້າ ໃຫ້ແກ່ປະຊາຊົນບ້ານພັນໄຊ ແລະ ຫລວງພັນໄຊ ເມືອງລ້ອງແຈ້ງ ວັນທີ 17 ພຶດສະພາ 2022 ຜ່ານມານີ້ , ໂດຍການເປັນປະທານຮ່ວມ ຂອງ​ ທ່ານ ມະນີວັນ ວິດາວົງ ຮອງຫົວໜ້າພະແນກອຸດສາຫະກຳ ແລະ ການຄ້າ​ ແຂວງໄຊສົມບູນ,

ມີບັນດາຄູຝຶກທີ່ມີປະສົບການສູງຈາກກົມສົ່ງເສີມ SME,​ ກະຊວງອຸດສາຫະກຳ ແລະ ການຄ້າ ແລະ ຄູຝຶກນຳພາປະຕິບັດຕົວຈີ່ງ ຈາກຫົວໜ່ວຍທຸລະກິດຜະລິດໄຄແຜ່ນແຂວງຊຽງຂວາງ,​ ມີນັກສຳມະນາກອນ ຈຳນວນສອງບ້ານເຂົ້າຮ່ວມ 46​ ຄົນ,ຍີງ 36​ ຄົນ.​

ຄູຝຶກຍັງໃຫ້ຮູ້ວ່າ: ຈາກປະສົບການຕົວຈີ່ງ ຜູ້ໜື່ງສາມາດສ້າງລາຍຮັບຈາກການຜະລິດໄຄແຜ່ນໄດ້ 3 ຫາ 4 ແສນກີບຕໍ່ມື້ ແລະ ໃນລະດູການໜື່ງຂອງໄຄທີ່ເກີດຂື້ນຕາມທຳມະຊາດ ສາມາດເກັບມາຜະລິດເປັນໄຄແຜນ ໄດ້ເຖີງ​ 5-6​ ເດືອນຈີ່ງໝົດລະດູການ.​ ນອກນັ້ນ,​ ຍັງໄດ້ມີການປະເມີນຄວາມຮັບຮູ້ຄວາມເຂົ້າໃຈຂອງສຳມະນາກອນ ຊື່ງປະຕິບັດໄດ້ດີ ກວມເອົາ​ 75% ແລະ ເຂົ້າໃຈປານກາງ​ 25%.

ໃນຕອນທ້າຍພິທີ​ ທ່ານ ເອງ ໄຊຍະຮັກ ໄດ້ມີຄຳເຫັນໂອ້ລົມ ແລະ ຮຽກຮ້ອງ ມາຍັງສໍາມະນາກອນ ນຳເອົາຄວາມຮູ້ບົດຮຽນປະສົບການຄັ້ງນີ້ໄປໝູນໃຊ້ເຂົ້າໃນຊີວິດປະຈຳວັນໃຫ້ໄດ້ຮັບຜົນດີ ພ້ອມກັນເອົາໃຈໃສ່ຜະລິດໄຄແຜ່ນໃຫ້ໄດ້ຫຼາຍຂື້ນ ເປັນທີ່ນິຍົມຂອງສັງຄົມ ແລະ ກາຍເປັນສີນຄ້າອັນໃໝ່ຂອງເມືອງ ເພື່ອສ້າງລາຍຮັບເຂົ້າຄອບຄົວໃຫ້ນັບມື້ນັບເພີ່ມຂຶ້ນ.​