ອະທິບາຍຄໍາວ່າ “ເຂົ້າ” ມີຄວາມໝາຍແນວໃດ?

ຄໍາວ່າ “ເຂົ້າ” ໝາຍເຖິງການຜ່ານເຂົ້າໄປທາງໜຶ່ງ ຫຼື ເຂົ້າໃນສິ່ງໃດສິ່ງໜຶ່ງ ເຊັ່ນ: ເຂົ້າປະຕູ, ເຂົ້າເຮືອນ, ເຂົ້າໃຈ, ເຂົ້າກັນໄດ້ດີ, ເຂົ້າໄປໃນຮົ້ວ, ເຂົ້າໝ້ຽງ, ເຂົ້າຍາມ, ເຂົ້າກັນ, ເຂົ້າຂາ, ເຂົ້າກະດູກດໍາ, ເຂົ້າແທ້ເຂົ້າວ່າ, ຂອງເຂົ້າ, ເຂົ້າໆອອກໆ. ນອກຈາກນັ້ນ, ຍັງໝາຍເຖິງພຶດມີເມັດ ແລະ ເປັນອາຫານຂອງຄົນ ແລະ ສັດບາງຈໍາພວກ ຊຶ່ງຖ້າແບ່ງຕາມແນວພັນເອີ້ນ: ເຂົ້າຈ້າວ, ເຂົ້າໜຽວ, ເຂົ້າບາເລ, ເຂົ້າສາລີ, ເຂົ້າໂພດ, ອື່ນໆ.

ເຂົ້າຖ້າເອີ້ນຊື່ຕາມຮູບຮ່າງ, ຖີ່ນກໍາເນີດ, ກີ່ນ ຫຼື ຈຸດພິເສດສະເພາະມັກເອີ້ນ: ເຂົ້າໄຮ່, ເຂົ້ານາ, ເຂົ້າດໍ, ເຂົ້າກໍ່າ, ເຂົ້າຕາກົບ, ເຂົ້າຕາຂຽດ, ເຂົ້າໄກ່ນ້ອຍ, ເຂົ້າຫອມມະລິ ແລະ ອື່ນໆ. ຖ້າແບ່ງຕາມການແປຮູບມີ: ເຂົ້າໜຶ້ງ, ເຂົ້າຫຸງ, ເຂົ້າເປືອກ, ເຂົ້າສານ, ເຂົ້າປຽນ ແຕ່ເປີກເຂົ້າທີ່ສີອອກມາເປັນເມັດໃຫຍ່ເອີ້ນແກບ ຖ້າເມັດມຸ່ນໆ ເອີ້ນຮໍາ, ເຂົ້າຈີ່, ເຂົ້າກ້ອງ, ເຂົ້າເບືອ, ເຂົ້າເໝົາ, ເຂົ້າຮາງ,ເຂົ້າສັງຂະຫຍາ, ເຂົ້າຕອກ ຫຼື ເຂົ້າຕອກແຕກ, ເຂົ້າຕົ້ມ, ເຂົ້າແດກງາ, ເຂົ້າປາດ, ເຂົ້າປຽກ ເປັນຕົ້ນ. ແຕ່ກໍມີຄໍາວ່າເຂົ້ານໍາໜ້າ ແຕ່ບໍ່ແມ່ນເຂົ້າໝົດເຊັ່ນ ເຂົ້າໜົມ (ເອີ້ນຂອງກິນຫຼີ້ນທົ່ວໄປ), ເຂົ້າແປ້ງ ໝາຍເຖິງແປ້ງຫອມສໍາລັບໃສ່ຕົນໂຕ.

ການເອີ້ນຄາບເຂົ້າຕາມເວລາມີຄື: ເຂົ້າເຊົ້າ ຫຼື ປັ້ນເຊົ້າ, ເຂົ້າສວາຍ ຫຼື ເຂົ້າງາຍ ຫຼື ເຂົ້າທ່ຽງ ແລະ ເຂົ້າແລງ.

ຄຳວ່າ “ເຂົ້າ”.

“ເຂົ້າ” (1. ຄໍາກິລິຍາ) ໄປທາງໃນ, ໃສ່, ປະສົມ, ກົງກັນຂ້າມ. (2. ຄໍານາມ) ວັດຖຸທີ່ເປັນອາຫານຂອງ ມະນຸດເປັນເມັດໆ ມີ 2 ປະເພດຄື: ເຂົ້າໜຽວ ແລະ ເຂົ້າຈ້າວ, ປະເພດນຶ່ງໆມີຫຼາຍແນວເອີ້ນຊື່ຕ່າງໆກັນ ມີເຂົ້າສ້ອຍ, ເຂົ້າຂາວ, ເຂົ້າແກ່ນແຕງ ເປັນຕົ້ນ.

ຕົວຢ່າງ:

ເພື່ອມາລະຍາດທີ່ດີ ຄວນເອີ້ນຖາມເຈົ້າຂອງເຮືອນກ່ອນຈະເຂົ້າຮົ້ວເຮືອນຜູ້ອື່ນ ແລະ ກ່ອນຈະເຂົ້າໄປໃນເຮືອນຄວນປົດເກີບໄວ້ທາງນອກ ເພື່ອບໍ່ໃຫ້ເຮືອນເປື້ອນ.
ລາວເປັນຄົນຮຽນເກັ່ງ ພຽງແຕ່ອາຈານອະທິບາຍເທື່ອດຽວ ລາວກໍເຂົ້າໃຈແຈ່ມແຈ້ງ ແລະ ສາມາດ ຖ່າຍທອດໃຫ້ໝູ່ອີກດ້ວຍ.
ໃນເມື່ອກ່ອນ ສອງຄົນເຂົາເຈົ້າຊັງກັນເຂົ້າກະດູກດໍາ ແຕ່ພໍໄດ້ມາເປັນເຂີຍອ້າຍເຂີຍນ້ອງກັນ ພັດເຂົ້າຂາກັນໄດ້ດີ ປານປີ່ກັບຂຸ່ຍ ຕາຍແທນກັນໄດ້.
ຄົນລາວ ມັກກິນເຂົ້າໜຽວທຸກມື້ ຈົນເຮັດໃຫ້ເປັນເອກະລັກສະເພາະ ຊຶ່ງເຮົາມັກເວົ້າວ່າ ຄົນລາວເຂົ້າໜຽວສຽງແຄນ ແດນດອກຈໍາປາ.
ເຂົາເຈົ້າໄປຖ່າຍທໍາໜັງ ໃນທ່າມກາງບັນຍາກາດເຂົ້າໃນນາພວມສຸກເຫຼືອງ ແລະ ບັນດານົກນ້ອຍບີນ ຢອກໄຍກັນຢູ່ປາຍຮວງເຂົ້າ.
ເຫຼົ້າຂາວ ແມ່ນເຮັດມາຈາກການເອົາເຂົ້າໄປເຮັດ ໂດຍມີຂັ້ນຕອນຂ້ອນຂ້າງຊັບຊ້ອນ ແລະ ມີສ່ວນປະສົມຫຼາຍຢ່າງ.

ສະຫຼຸບ.

ຄໍາວ່າ “ເຂົ້າ” ໝາຍເຖິງການເຂົ້າ ຫຼື ຜ່ານໄປໃນສິ່ງໃດສິ່ງນຶ່ງ ຫຼື ການເຂົ້າໄປໃນຈິດໃນ ເຮັດໃຫ້ຮູ້. ນອກນັ້ນ. ຍັງໝາຍເຖິງພຶດທີ່ເປັນເຂົ້າໃຫ້ມະນຸດ ຫຼື ສັດບາງຈໍາພວກກິນ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo