ຄໍາວ່າ “ຕ້ອນ” ມີຄວາມໝາຍໃນພາສາລາວແນວໃດ?
ອະທິບາຍຄໍາວ່າ “ຕ້ອນ” ມີຄວາມໝາຍແນວໃດ?
ໃນບົດນີ້ຈະຂໍຍົກ ຄໍາວ່າ “ຕ້ອນ” ມາເປັນຫົວຂໍ້ເພື່ອອະທິບາຍລາຍລະອຽດນຳກັນ ເຊິງວ່າ ຄຳວ່າ ຕ້ອນ ແມ່ນມີຫຼາຍຄວາມໝາຍນຶ່ງໃນນັ້ນ ເປັນວິທີການເຮັດກັບດັກເອົາປາ ເອີ້ນຕ້ອນ ຊຶ່ງເປັນວິ ທີການນຶ່ງ ໃກ້ຄຽງກັບການເຮັດຫຼີ ເຮັດໄຊ ດັກປາ.
ພ້ອມກັນນັ້ນ, ຍັງໝາຍເຖິງການໄປຮັບ ຫຼື ໄປສົ່ງ, ພາມາ ຫຼື ພາໄປ ເອີ້ນໄປຮັບໄປຕ້ອນ, ການຕ້ອນຮັບແຂກຄົນທີ່ມາຢາມ ຫຼື ຕ້ອນຮັບລູກຄ້າທີ່ມາໃຊ້ບໍລິ ການໂຮງແຮມ, ບ້ານພັກ, ຮ້ານອາຫານ. ນອກຈາກນັ້ນ, ຍັງໝາຍເຖິງການໄລ່ສັດໄປຕາມທີ່ເຮົາຢາກໃຫ້ ໄປ ເຊັ່ນ: ຕ້ອນຝູງງົວໄປເຂົ້າຄອກ, ຕ້ອນຄວາຍໄປກິນຫຍ້າ, ຕ້ອນໄກ່ໃຫ້ເຂົ້າລົກ.
ສະນັ້ນ ເພື່ອໃຫ້ເຂົ້າໃຈ ການນໍາໃຊ້ຄໍາດັ່ງກ່າວໃຫ້ຫຼາຍຂຶ້ນ ເຮົາມາເບິ່ງລາຍລະອຽດດັ່ງລຸ່ມນີ້:
ຄຳວ່າ “ຕ້ອນ”.
“ຕ້ອນ” (1. ຄໍານາມ) ຜຽກທີ່ຕັນທາງນໍ້າໄວ້ ຫຼື ຕັນຂວາງນໍ້າໄວ້ ເພື່ອບໍ່ໃຫ້ປາໄປໄດ້. (2. ຄໍາກິລິຍາ) ຮັບ, ພາມາ ຫຼື ພາໄປ, ກັນໄວ້, ກັນບໍ່ໃຫ້ໄປຕາມທີ່ຕ້ອງການ, ໄລ່ໄປໃສ່ທີ່ຕ້ອງການ.
ຕົວຢ່າງ:
- ການເຮັດຕ້ອນເຮັດຫຼີ ເພື່ອດັກເອົາປາ ມາບໍລິໂພກແມ່ນພູມປັນຍາຂອງປະຊາຊົນ ທີ່ສືບທອດກັນມາ ຫຼາຍລຸ້ນຄົນ.
- ປະຊາຊົນລາວ ພໍຮອດຍາມຝົນ ໂດຍສະເພາະເວລານ້ຳນອງ ມັກນິຍົມກັນ ໄປໃສ່ມອງ ໃສ່ຕ້ອນ ໃສ່ໄຊ ໃສ່ເບັດ ຕາມນໍ້າ ຕາມທົງນາ ເພື່ອໃຫ້ໄດ້ປານ້ອຍປາໃຫຍ່ ເອົາໄປເຮັດໝົກເຮັດປີ້ງກິນເຮັດໃຫ້ ມີຄວາມສຸກອີກແບບນຶ່ງ.
- ເວລາຈັດກອງປະຊຸມລະດັບສາກົນ ແມ່ນມີແຂກມາຈາກຫຼາຍປະເທດ ດັ່ງນັ້ນຈິ່ງຕ້ອງໄດ້ກະກຽມການ ຕ້ອນຮັບແຂກບ້ານແຂກເມືອງ ຊຶ່ງປະກອບມີການຕ້ອນຮັບຢູ່ເດີນບິນ, ການຮັບສົ່ງ, ການພັກເຊົາ, ການປະຊຸມ ແລະ ອື່ນໆ.
- ມື້ວານນີ້ ໄປຕ້ອນໝູ່ມາແຕ່ຕ່າງປະເທດ ຢູ່ສະໜາມບີນວັດໄຕ ໄດ້ຮັບຂອງຕ້ອນຈາກພີ່ນ້ອງທີ່ຝາກ ມານໍາລາວ
- ໃນແຕ່ລະມື້ ພໍຮອດຕອນແລງ ລາວຈະໄປຕ້ອນຝູງງົວ ເພື່ອໄປແຫຼ່ງຢູ່ຄອກ ຈາກນັ້ນ ຈິ່ງດັງໄຟ ເພື່ອໄລ່ຍຸງໄລ່ຮີ້ນບໍ່ໃຫ້ກັດງົວ.
ສະຫຼຸບ.
ຄໍາວ່າ “ຕ້ອນ” ໝາຍເຖິງການຕັນນໍ້າ ເພື່ອເອົາປາ ເປັນວິທີໃນການຫາປາອີກຢ່າງນຶ່ງ ນອກເໜືອຈາກ ການເຮັດຫຼີ ຫຼື ໃສ່ໄຊ. ພ້ອມກັນນັ້ນ, ຍັງໝາຍເຖິງການພາໄປພາມາ ຫຼື ເອີ້ນໄປຕ້ອນໄປຮັບ ຫຼື ການ ຕ້ອນຮັບແຂກ. ອີກຄວາມໝາຍນຶ່ງໝາຍເຖິງການໄລ່ຕ້ອນ ໂດຍສະເພາະແມ່ນການຕ້ອນຝຸງສັດໃຫ້ໄປ ຕາມທີ່ຕ້ອງການ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo