ຄໍາວ່າ ດັງ ແລະ ດັ່ງ ຄືກັນ ຫລື ຕ່າງກັນແນວໃດໃນພາສາລາວ?
ພາສາລາວຄໍາວ່າ ດັງ ແລະ ດັ່ງ ມີຄວາມໝາຍແນວໃດ?
ການຈໍາແນກບາງຄໍາສັບໃນພາສາລາວມີຄວາມສັບສົນຫຼາຍ ທັງນີ້ກໍ່ຍ້ອນຄວາມຫຼາກຫຼາຍຂອງພາສາລາວ ທີ່ບາງເທື່ອກໍ່ເຮັດໃຫ້ສັບສົນທັງວິທີການຂຽນ, ການເວົ້າ ແລະ ການແປຄວາມໝາຍ. ຄໍາສັບໜຶ່ງກໍ່ແປຄວາມໝາຍໄດ້ຫຼາຍຢ່າງ ຈົນເຮັດໃຫ້ຈໍາແນກບໍ່ໄດ້ວ່າຄວນໃຊ້ຄໍາໃດຈຶ່ງຈະຖືກຕ້ອງ ເຊິ່ງມັນມີຫລາຍໆຄຳທີ່ອອກສຽງຄ້າຍຄືກັນ ລວມທັງຄວາມໝາຍກໍໃກ້ຄຽງກັນ ແລະ ເວລານຳໄປໃຊ້ ສໍານຽງສຽງເວົ້າກໍ່ແຕກຕ່າງກັນໄປ.
ບົດຄວາມນີ້ ເຮົາຈະເວົ້າເຖິງຄວາມໝາຍຂອງຄໍາວ່າ ດັງ ແລະ ດັ່ງ ສອງຄໍານີ້ອ່ານອອກສຽງຄ້າຍຄືກັນຫຼາຍ ແລະ ມີຫຼາຍຄົນໃຊ້ຫຼົງ. ສະນັ້ນ, ເພື່ອທໍາຄວາມເຂົ້າໃຈຢ່າງເລິກເຊິ່ງກ່ຽວກັບສອງຄໍານີ້ ເຮົາຈະອະທິບາຍວິທີການນໍາໃຊ້ ແລະ ຄວາມໝາຍຂອງມັນ ໂດຍອີງຕາມຂໍ້ມູນຈາກວັດຈະນານຸກົມພາສາລາວ ສະບັບຄົ້ນຄວ້າ ແລະ ຮຽບຮຽງ ໂດຍ ທອງຄຳ ອ່ອນມະນີສອນ, ສາມາດອະທິບາຍຄວາມໝາຍສອງຄໍາສັບດັ່ງກ່າວ ຄື:
ຄຳວ່າ ດັງ.
ດັງ ໃຊ້ເປັນທັງຄໍາກໍາມະ ແລະ ຄໍານາມ ມີຄວາມໝາຍທີ່ແຕກຕ່າງກັນອອກໄປເຊັ່ນ:
ດັງ (ຄໍານາມ) ໝາຍເຖິງ ອະໄວຍະວະຂອງຄົນ ແລະ ສັດ ບ່ອນສໍາລັບຫາຍໃຈ ເອີ້ນວ່າ ດັງ.
ດັງແປ ເອີ້ນ ດັງແໝບ; ດັງບານ ຫຼື ຮູດັງກວ້າງ ເອີ້ນ ດັງປື່ງ; ດັງໂດ່ງ ຫຼື ດັງໃຫຍ່ ເອີ້ນດັງໂມ; ດັງແວ່ງຫຼາຍເອີ້ນ ດັງວືກ; ດັງແວ່ງປານກາງ ເອີ້ນ ດັງວາກ…
ດັງ (ຄໍາກໍາມະ1) ໝາຍເຖິງ ບັງເກີດສຽງຂຶ້ນ, ກົງກັນຂ້າມກັບມິດ.
ຕົວຢ່າງ:
ສຽງຟ້າຮ້ອງດັງສະນັ່ນຫວັ່ນໄຫວ.
ເຮົາມັກໄດ້ຍິນສຽງກະໂພກດັງກຶກກ້ອງທົ່ວເມືອງຍາມປີໃໝ່ຈີນ ຫຼື ກຸດຈີນ.
ດັງ (ຄໍາກໍາມ2) ໝາຍເຖິງ ຕິດ, ກໍ່, ຈູດ.
ຕົວຢ່າງ:
ນ້ອງຂອງຂ້ອຍດັງໄຟນຶ້ງເຂົ້າທຸກເຊົ້າແລງ.
ຄຳວ່າ ດັ່ງ.
ດັ່ງ ເປັນຄໍາຄຸນນາມ ມີຄວາມໝາຍວ່າ ປະດຸດ, ຄ້າຍ, ເໝືອນ ເຊັ່ນ: ເປັນດັ່ງ, ປະດຸດດັ່ງ, ຄືດັ່ງ, ເໝືອນດັ່ງ ເປັນຕົ້ນ. ນອກນັ້ນ ຍັງມີຄໍາວ່າ ດັ່ງໃດ ແປວ່າ: ຢ່າງໃດ, ເປັນແນວໃດ; ດັ່ງນີ້ ແປວ່າ ເປັນຢ່າງນີ້, ເປັນແນວນີ້; ດັ່ງນັ້ນ ແປວ່າ ເປັນຢ່າງນັ້ນ, ເປັນແນວນັ້ນ…
ຕົວຢ່າງ:
ອ້າຍເປັນດັ່ງພໍ່ຄົນທີ່ສອງຂອງຂ້ອຍ.
ສາວຄູຂອງຂ້ອຍໃຈດີເໝືອນດັ່ງນາງຟ້າ.
ສະຫຼຸບ.
ທັງສອງຄໍາສັບນີ້ມີຄວາມໝາຍແຕກຕ່າງກັນ ແລະ ນໍາໃຊ້ໃນຮູບແບບຂອງປະໂຫຍກກໍ່ບໍ່ຄືກັນ, ຄໍາວ່າ ດັງ ໃນຮູບແບບຂອງຄໍານາມໝາຍເຖິງອະໄວຍະວະໜຶ່ງຂອງຄົນ ແລະ ສັດ ໃຊ້ສໍາລັບຫາຍໃຈ ແລະ ດົມກິ່ນ, ດັງ ໃນຮູບແບຂອງຄໍາຄຸນນາມໝາຍເຖິງການບັງເກີດສຽງຂຶ້ນ, ກົງກັນຂ້າມກັບມິດ ເອີ້ນວ່າ ດັງ, ສ່ວນວ່າ ດັ່ງ ໝາຍເຖິງ ປະດຸດ, ເໝືອນ ເຊິ່ງໃຊ້ກັບສິ່ງໃດທີ່ເຮົາເອົາມາປຽບທຽບວ່າເໝືອນກັນ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo