ຄຳວ່າ ແຂນ ແລະ ແຂວນ ພາສາລາວມີຄວາມໝາຍແນວໃດ?
ຄວາມໝາຍຂອງຄຳວ່າ ແຂນ ແລະ ແຂວນ ໃນພາສາລາວ.
ໃນພາສາລາວມີຫຼາຍໆຄຳສັບທີ່ມີຄວາມຄ້າຍຄືກັນທັງທາງດ້ານການຂຽນສະກົດຄຳ ແລະ ດ້ານການອ່ານອອກສຽງ, ຖ້າຫາກໃຊ້ບໍ່ຖືກຕ້ອງຕາມຮູບປະໂຫຍກຈະເຮັດໃຫ້ຄວາມໝາຍຂອງມັນປ່ຽນແປງໄປທັນທີ, ທັງນີ້ຍ້ອນວ່າຈຸດພິເສດຂອງລາວເຮົາແມ່ນມີຫຼາກຫຼາຍຊົນເຜົ່າແຈກຢາຍຢູ່ຕາມແຕ່ລະຂົງເຂດທົ່ວປະເທດ. ສະນັ້ນ, ຈຶ່ງມີຄວາມແຕກຕ່າງກັນໃນການໃຊ້ພາສາໂດຍສະເພາະແມ່ນການປາກເວົ້າ.
ໃນບົດຄວາມນີ້ເຮົາຈະມາເວົ້າເຖິງຄວາມໝາຍຂອງຄຳວ່າ: ແຂນ ແລະ ແຂວນ ຊຶ່ງຄຳສອງຄຳນີ້ມີຄວາມຄ້າຍຄືກັນໃນການອ່ານອອກສຽງຕ່າງກັນພຽງແຕ່ໜ້ອຍດຽວ, ຄົນສ່ວນຫຼາຍມັກຫຼົງກັນແລະອອກສຽງບໍ່ຖືກຕ້ອງ.
ອີງຕາມຂໍ້ມູນຈາກວັດຈະນານຸກົມພາສາລາວ ສະບັບ ທີ່ ຄົ້ນຄວ້າ ແລະ ຮຽບຮຽງ ໂດຍ ທອງຄຳ ອ່ອນມະນີສອນ, ເຮົາສາມາດຕີຄວາມໝາຍຂອງຄໍາສັບທັງສອງຄໍາດັ່ງກ່າວຄື:
ຄຳວ່າ ແຂນ.
ໃຊ້ເປັນຄໍານາມ ໝາຍເຖິງ ອະໄວຍະວະສ່ວນໜຶ່ງຂອງຮ່າງກາຍທີ່ຍື່ນອອກມາຕໍ່ຈາກບ່າທັງງສອງຂ້າງເອີ້ນວ່າແຂນ.
ແຂນລຸ່ມຂໍ້ສອກເອີ້ນວ່າ: ແຂນໂປ້ງ, ແຂນທີ່ຕໍ່າຮອດຂໍ້ມືເອີ້ນແຂນກິ່ວ, ແຂນທີ່ຄົດເອີ້ນແຂນຈົງ, ແຂນອ່ອນເອີ້ນແຂນແພນ.
ຕົວຢ່າງ:
ຕອນເຊົ້ານີ້ຂ້ອຍໄປຕະຫຼາດນໍາແມ່, ແມ່ຂອງຂ້ອຍໃຫ້ຂ້ອຍຫິ້ວເຄື່ອງຫຼາຍຈົນເຮັດໃຫ້ຂ້ອຍປວດແຂນທັງສອງເບື້ອງ.
ນ້ອງຊາຍຂອງຂ້ອຍຂີ່ລົດລົ້ມ ເຮັດໃຫ້ແຂນເບື້ອງຊ້າຍຂອງລາວຫັກ.
ຄຳວ່າ ແຂວນ.
ໃຊ້ເປັນຄໍາກໍາມະ ໝາຍຄວາມວ່າ ຫ້ອຍ, ເກາະ.
ຕົວຢ່າງ:
ຂ້ອຍໄດ້ແຂວນຮູບພາບຂອງຄອບຄົວໃສ່ຝາເທິງຫົວບ່ອນນອນ.
ໄດ້ເຮັດແຕ່ບໍ່ໄດ້ກິນເອີ້ນກະດູກແຂວນຄໍ ດັ່ງ ສຸພາສິດ: ຊີ້ນບໍ່ໄດ້ກິນໜັງບໍ່ໄດ້ຢ້ຳກະດູກແຂວນຄໍ.
ຈິດໃຈທີ່ບໍ່ມີບ່ອນເກາະຫ້ອຍເອີ້ນ: ຈິດແຂວນ ດັ່ງ ກອນ: ຈິດບໍ່ມີບ່ອນຢັ້ງຄືນ້ຳແມ່ຂອງ.
ສະຫຼຸບ.
ແຂນ ເປັນຄໍານາມ ໝາຍເຖິງອະໄວຍະວະສ່ວນໜຶ່ງຂອງຮ່າງກາຍ; ແຂວນ ເປັນຄໍາກໍາມະ ໝາຍເຖິງຫ້ອຍ ຫຼື ເກາະ ສິ່ງໃດສິ່ງໜຶ່ງ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo