ຄຳວ່າ ເສື່ອມ ແລະ ເຊື່ອມ ມີຄວາມໝາຍອັນດຽວກັນບໍ່?
ອະທິບາຍຄວາມຄືກັນ ແລະ ຕ່າງກັນ ຂອງຄຳວ່າ ເສື່ອມ ແລະ ເຊື່ອມ.
ໃນພາສາລາວຫລາຍໆຄຳມີຄວາມໝາຍແຕກຕ່າງກັນ ແລະ ຫລາຍໆຄຳກໍມີຄວາມໝາຍທີ່ໃກ້ຄຽງກັນສະນັ້ນການທີ່ຈະນຳໃຊ້ໃຫ້ຖືກຕ້ອງແທ້ກໍຕ້ອງໄດ້ສືກສາລົງເລີກອີກກວ່າປົກກະຕິ, ວ່າເຮົາຄວນໃຊ້ຄຳໃດແທ້ໃນພາສາລາວ ຈິ່ງຈະເໝາະສົມ ແລະ ຈະສະກົດຄຳແບບໃດໃຫ້ຖືກຕ້ອງຕາມຫລັກໄວຍາກອນຂອງພາສາລາວ.
ໃນພາສາລາວຄຳວ່າເສື່ອມ ແລະ ເຊື່ອມ ທີ່ມີທັງຄວາມໝາຍທີ່ແຕກຕ່າງກັນ ແລະ ມີຄວາມໝາຍຄ້າຍຄືກັນ ອາດເຮັດໃຫ້ສັບສົນໃນການນຳໃຊ້, ເພາະວ່າສອງຄຳນີ້ມີສຽງອັນດຽວກັນ ຕ່າງແຕ່ສຽງສູງ ກັບສຽງຕໍ່າ ແລະເທົ່ານັ້ນຍັງບໍ່ພໍ ຄວາມໝາຍຂອງທັງສອງຄຳຍັງມີລັກສະນະຄ້າຍຄືກັນຈົນເກືອບແຍກບໍ່ອອກ..
ຄຳວ່າ ເສື່ອມ.
ໃຊ້ກັບລັກສະນະທີ່ເປັນນາມທຳຫຼຸດໜ້ອຍຖອຍລົງ ເຊັ່ນ ເສື່ອມເສຍກຽດສັກສີ, ເສື່ອມສັດທາ, ເສື່ອມໂຊມ, ເສື່ອມສະພາບ.
ຕົວຢ່າງ:
- ລົດຂອງຂ້ອຍນັບມື້ນັບເສື່ອມສະພາບລົງ
- ຄົນເຮົາຖ້າເວົ້າບໍ່ມີສັດຈະແລ້ວຄວາມສັດທາຂອງຜູ່ອື່ນທີ່ມີກໍຄອຍໆເສື່ອມລົງ.
- ໂອຍ! ບໍ່ແມ່ນເສື່ອມສະພາບແລ້ວບໍ່? ແຕ່ງງານກັນມາຕັ້ງດົນບໍ່ມີລູກຈັກຄົນ.
ຄຳວ່າ ເຊື່ອມ.
ໃຊ້ລັກສະນະຂອງຮູບທຳ ເຊັ່ນ ຂີ້ເຜິ້ງເຊື່ອມເຂົ້າກັນ, ຂີ້ກົ່ວເຊື່ອມເຂົ້າກັນ ແຕ່ຄຳວ່າ ເຊື່ອມ ນອກຈາກເປັນຮູບທຳແລ້ວຍັງມີລັກສະນະນາມທຳອີກເຊັ່ນ ເຊື່ອມສາຍສຳພັນ, ເຊື່ອມໃຈເປັນໜຶ່ງດຽວ, ເຊື່ອມຊຶມມະຕິຂອງພັກ ດັ່ງນີ້ເປັນຕົ້ນ..
ຕົວຢ່າງ:
- ພໍ່ຂອງຂ້ອຍຈອດເຫລັກໜ້າບ້ານຕ້ອງໄດ້ໃຊ້ຂີ້ກົ່ວເພື່ອເຊື່ອມເຫລັກເຂົ້າກັນ.
- ສອງປະເທດອ້າຍນ້ອງລາວຫວຽດໄດ້ເຊື່ອມສາຍສຳພັນອັນແໜ້ນແຟ້ນມາແຕ່ດົນນານ.
- ບໍ່ວ່າເວລາດົນນານເທົ່າໃດພັກ ແລະ ລັດ ກໍພະຍາຍາມໃຫ້ອ້າຍນ້ອງພະນັກງານເຊື່ອມຊຶມມະຕິຂອງພັກ ແລະ ລັດ.
ສະຫລຸບ.
ການໃຊ້ຄຳທັງສອງມີຄວາມໝາຍ ແລະບໍລິບົດແຕກຕ່າງກັນ ໂດຍ ຄຳວ່າ ເສື່ອມ ເນັ້ນໃສ່ລັກສະນະຂອງຄວາມເສຍຫາຍ ສ່ວນ ຄຳວ່າ ເຊື່ອມ ແມ່ນເນັ້ນໃສ່ລັກສະນະທີ່ເຮັດໃຫ້ເປັນໜຶ່ງດຽວ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo