ຄຳວ່າ “ເສືອ” ແລະ “ເຊື່ອ” ມີຄວາມໝາຍແນວໃດ?
ອະທິບາຍຄວາມຄືກັນ ແລະ ຕ່າງກັນ ຂອງຄຳວ່າ “ເສືອ” ແລະ “ເຊື່ອ”.
ໃນການອອກສຽງພາສາລາວແມ່ນມີຫຼາຍຄຳສັບທີ່ມີຄວາມໃກ້ຄຽງກັນ ແຕ່ຄວາມໝາຍພັດແຕກຕ່າງກັນ ໄປຄົນລະຢ່າງ ດັ່ງຄໍາວ່າ “ເສືອ” ແລະ “ເຊື່ອ” ເຫັນວ່າການອອກສຽງໃກ້ຄຽງກັນຫຼາຍ ຖ້າຫາກເວົ້າຄ່ອຍ ແລະ ບໍ່ເຕັບປະໂຫຍກອາດເຮັດໃຫ້ເຂົ້າໃຈຍາກ ເພາະວ່າຄວາມແຕກຕ່າງ ຂອງສຽງສູງ ກັບສຽງຕໍ່າ ແມ່ນຕ່າງກັນເລັກນ້ອຍເທົ່ານັ້ນ.
“ເສືອ” ເປັນສັດກິນຊີ້ນ ໂດຍທົ່ວໄປຈະດຸຮ້າຍ ດັ່ງນັ້ນຜູ້ຊາຍຈໍານວນນຶ່ງຈິ່ງນິຍົມກັນໃສ່ຊື່ເສືອ ຫຼື ເອີ້ນກັນ ເປັນສາຍາ ເພື່ອໃຫ້ຜູ້ອື່ນເກງຂາມ, ລວມທັງ ສັນຍາລັກບັນດາສິນຄ້າຕ່າງໆ ທີ່ມັກໃສ່ຮູບເສືອ ເພື່ອເປັນ ທີ່ຈົດຈໍາຂອງລູກຄ້າ. ນອກຈາກນັ້ນ, ຍັງມີກຸ່ມຄົນຫຼາຍກຸ່ມ ທີ່ມັກສະສົມໜັງເສືອ ເພື່ອເປັນການໂຊຄວາມ ຫຍີ່ງໃຫຍ່ ແລະ ບາລະມີ. ສໍາລັບບາງປະເພດພັດນິຍົມເອົາຊີ້ນສ່ວນຕ່າງໆຂອງເສືອໄປປຸງຢາ ອາຫານ ຊຶ່ງເຊື່ອກັນວ່າເປັນຢ່າຊູກໍາລັງ ແລະ ຢາອາຍຸວັດທະນະ.
“ເສືອ” ລ້ຽງລູກດ້ວຍນ້ຳນົມ ເປັນວົງດຽວກັບແມວ ເສືອສ່ວນໃຫຍ່ມີຂະໜາດລຳໂຕຄ່ອນຂ້າງໃຫຍ່ ແລະອາໄສຢູ່ພາຍໃນປ່າ. ເສືອທຸກຊະນິດມີກາມທີ່ສັ້ນ ແລະ ແຂງແຮງ.“ ເສືອ” ຈັດເປັນສັດນັກລ່າທີ່ມີຄວາມສະຫງ່າງາມໃນໂຕເອງ ໂດຍສະເພາະແມ່ນ ເສືອໂຄ່ງ ຫຼື ເສືອດາວ. ຜູ້ທີ່ພໍ້ເຫັນ “ເສືອ” ໃນເທື່ອທຳອິດມັກເກີດຄວາມປະທັບໃຈໃນຄວາມສະຫງ່າງາມ ແຕ່ໃນຂະນະດຽວກັນກໍເກີດຄວາມຫວາດຫວັ່ນເກງຂາມໃນພະລະອຳນາດພາຍໃນໂຕຂອງພວກມັນ. ເສືອຈັ່ງໄດ້ຮັບການຍົກຍໍໃຫ້ເປັນລາຊາແຫ່ງສັດປ່າ ແລະ ເປັນເຈົ້າແຫ່ງນັກລ່າຢ່າງແທ້ຈິງ.
ສ່ວນຄໍາວ່າ “ເຊື່ອ” ແມ່ນການເຊື່ອອົກເຊື່ອໃຈ ຫຼື ເຊື່ອຟັງ ໄວາງໃຈ ພ້ອມທີ່ຈະປະຕິບັດຕາມ. ໃນຄວາມ ໝາຍອື່ນ ແມ່ນຄວາມເຊື່ອໝາຍເຖິງເຂົ້າໃຈວ່າສິ່ງທີ່ບໍ່ເຫັນ ແລະ ຈັບຕ້ອງບໍ່ໄດ້ນັ້ນມີຢູ່ຈິງ ເຊັ່ນ: ເຊື່ອວ່າ ພະະເຈົ້າມີຈິງ, ເຊື່ອວ່າຜີ ແລະ ສິງລຶກລັບມີແທ້, ເຊື່ອວ່າມີມະນຸດຕ່າງດາວ ເປັນຕົ້ນ. ສະນັ້ນ ເພື່ອນຳໃຊ້ໃຫ້ຖືກຕ້ອງຕາມຫຼັກໄວຍະກອນ ຄວນມີການສຶກສາໃຫ້ເຂົ້າໃຈກ່ອນ.
ຄວາມໝາຍຄຳວ່າ “ເສືອ”:
“ເສືອ” (1.ຄໍານາມ) ສັດສີ່ຕີນແນວນຶ່ງ ເປັນສັດຮ້າຍກິນສັດເປັນອາຫານ ຮູບຮ່າງຄືແມວແຕ່ສ່ວນ ຫຼາຍໂຕໃຫຍ່ກວ່າ ມີຫຼາຍຊະນິດ ຄື: ເສືອ ໂຄ່ງ ເປັນເສືອຂະໜາດໃຫຍ່, ເສືອເຫຼືອງ ເປັນເສືອຂະ ໜາດກາງ, ເສືອດາວ ເປັນເສືອຂະໜາດກາງ ແຕ່ມີຂົນລາຍເປັນຕາ ຫຼື ຄືດວງວຕາ, ເສືອແມວ ເປັນເສືອຂະໜາດນ້ອຍທໍ່ແມວ, ເສືອຂ້ຽວ ຕົວຂະໜາດເທົ່າໝາຖ່າວໆ. (2.ຄໍານາມ) ຊື່ປາແນວນຶ່ງ ເກັດສີມູມ ແລະ ເປັນລາຍຄືເສືອ. ພະຍັກ
ຕົວຢ່າງ:
- ເສືອໂຄ່ງເປັນສັດນັກລ້າທີ່ໂຕໃຫຍ່, ມີຄວາມສະຫຼາດ ແລະ ໜ້າເກງຂາມ ມັນສາມາດໄລ່ຄຸບ ໂຕກວາງ ເພື່ອກິນ ໃນເວລາອັນສັ້ນ.
- ກຸ່ມຜູ້ຊາຍຂີ້ດື້ ເອີ້ນຫົວໜ້າແກ້ງ ວ່າອ້າຍເສືອ ສ່ວນຫົວໜ້າແກ້ງກະເອີ້ນລູກນ້ອງວ່າບັກເສືອ.
- ການອອກແບສັນຍາລັກຂອງບໍລິສັດເບຍລາວແມ່ນແບບລຽບງ່າຍ ມີພຽງແຕ່ຫົວເສືອ ຂະໜາດນັ້ນ ຍັງໄດ້ຂາຍດີ ຖ້າອອກແບບໝົດໂຕເສືອ ຊິໄດ້ຂາຍຫຼາຍປານໃດ.
- ເສືອໂຄ່ງເປັນສັດໃກ້ສູນພັນ ແລະ ຫາເບີ່ງໄດ້ຍາກໃນປັດຈຸບັນ.
ຄວາມໝາຍຄຳວ່າ “ເຊື່ອ”:
“ເຊື່ອ” (1. ຄໍານາມ) ເຊື່ອຖື, ເຊື່ອອົກ, ເຊື່ອໃຈ ເຊື່ອຖ້ອຍຟັງຄວາມ, ເຊື່ອຟັງ, ປະຕີບັດຕາມ.
ຕົວຢ່າງ:
- ຊ່ວງນີ້ໂຄວິດ-19 ລະບາດ ບໍສາມາດໄວ້ເນື້ອເຊື່ອໃຈໃຜໄດ້ ຕ້ອງໃສ່ຜ້າອັດປາກອັດດັງ ແລະ ຢູ່ຫ່າງກັນ 1 ແມັດ ລ້າງມືດ້ວຍເຫຼົ້າເລື້ອຍໆ.
- ລູກໆຄວນເຊື່ອຟັງພໍ່ແມ່ ເພາະເພີ່ນເປັນຜູ້ໃຫ້ກໍາເນີດ ແລະ ຮັກລູກດ້ວຍໃຈອັນບໍລິສຸດ.
- ໃນປະເທດດ້ອຍພັດທະນາ ຄວາມເຊື່ອຖືດ້ານສາດສະໜາ ໂດຍສະເພາະແມ່ນການຖືຜີ ແມ່ນຍັງ ເຄັ່ງຄັດ.
- ຄວາມເຊື່ອໃນສາດສະໜາພຸດແມ່ນຖືວ່າບາບບູນຄູນໂທດ ເວນກໍາ ມີຈິງ.
ສະຫຼຸບ
ຄຳວ່າ “ເສືອ” ແລະ “ເຊື່ອ” ແມ່ນອອກສຽງໃກ້ຄຽງກັນແຕ່ ມີຄວາມໝາຍຕ່າງກັນ ເພາະ “ເສືອ” ແມ່ນຊື່ ສັດປະເພດນຶ່ງ . ສ່ວນຄຳວ່າ “ເຊື່ອ” ແມ່ນການໄວ້ວາງໃຈ ຫຼື ເຊື່ອຖື ຕາມຄວາມຄິດນັ້ນເອງ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo