ອະທິບາຍຄວາມໝາຍຂອງຄຳວ່າ “ເບືອ” ແລະ “ເບື່ອ”.

ຄໍາວ່າ “ເບືອ” ໝາຍເຖິງເຂົ້າສານທີ່ເອົາມາຂົ້ວແຫ້ມແລ້ວໄປຕໍາດ້ວຍຄົກ, ປັ່ນ ຫຼື ບົດດ້ວຍເຄື່ອງບົດ ໃຫ້ ມຸ່ນໆ ເອີ້ນ ເຂົ້າເບືອ. ໝາຍເຖິງສາກຄົກວ່າ ຊຶ່ງເອີ້ນອີກຢ່າງວ່າ ສາກເຂົ້າເບືອ ທີ່ມາແມ່່ນຄົນສະໄໝກ່ອນມັກເອົາສາກຄົກຕໍາເຂົ້າເບືອ ຊຶ່ງບໍ່ໄດ້ບົດດ້ວຍເຄື່ອງບົດດັ່ງທຸກວັນນີ້.

ຄໍາວ່າ “ເບື່ອ” ໝາຍເຖິງການຖຶກພິດເຮັດໃຫ້ເມົາ ຫຼື ເຈັບ ເຊັ່ນ: ເບື່ອເຫັດເກືອບຕາຍ, ເບື່ອໜູດ້ວຍສານໜູ, ທາດເຄມີຫຼາຍຊະນິດເຮັດໃຫ້ທາດເບື່ອເມົາໄດ້. ນອກຈາກນີ້ ເບື່ອຍັງແມ່່ນບໍ່ມັກ, ການອີ່ມການເປີດ, ການໜ່າຍ ຊຶ່ງເຮົາມັກໄດ້ຍີນເປັນຕົ້ນ ເບື່ອໜ່າຍ, ເບື່ອອາຫານ, ເບື່ອໂລກ, ເບື່ອຊີວິດ ແລະ ອື່ນໆ.

ເພື່ອໃຫ້ເຂົ້າໃຈການນນຳໃຊ້ໃຫ້ເລິກກວ່າເກົ່າ ເຮົາເບີ່ງຄວາມໝາຍ ແລະ ຕົວຢ່າງດັ່ງລຸ່ມນີ້:

ຄວາມໝາຍຄຳວ່າ “ເບືອ”.

“ເບືອ” (1. ຄຳນາມ) ເຂົ້າສານທີ່ຕໍໃສ່ແກງ ເອີ້ນ ເຂົ້າເບືອ, ສາກຕໍາອາຫານໃນເຮືອນຄົວ ເອີ້ນ ສາກເຂົ້າເບືອ ຫຼື ສາກຄົກ (ຄົກຕໍາດ້ວຍມື). (2. ຄໍາກິລິຍາ) ເອົາຢາພິດໃຫ້ກິນ, ເອົາຂອງໃຫ້ກິນ ໂດຍເຈດຕະນາຮ້າຍ.

ຕົວຢ່າງ:

ເຮັດຫໍ່ໜຶ້ງໄກ່ຢາກໃຫ້ແຊບ ແລະ ຫອມ ແມ່ນເອົາເຂົ້າເບືອໃສ່ນໍານ້ອຍນຶ່ງ ລວມທັງຜັກຫອມຊີ ຫອມບົ່ວ ສີໄຄ ຂິງ ແລະ ໝາກເຜັດ.
ສາກເຂົ້າເບືອນີ້ ພໍ່ຕູ້ບອກວ່າເຮັດດ້ວຍໄມ້ແກ່ນຫຼ້ອນໄດ້ຫຼາຍປີ ແຕ່ຕອນລາວຍັງເປັນເດັກນ້ອຍ.
ແຕ່ກ່ອນ ວັງນໍ້ານີ້ມີປາ, ປາຝາ ແລະ ນາກນໍ້າຫຼາຍ ແຕ່ຍ້ອນຄົນລັກເບືອ ຈິ່ງເຮັດນາກນໍ້າ ແລະ ປາຝາຕາຍໝົດ. ປະຈຸບັນ ໄດ້ເຮັດເປັນວັງສະຫງວນ ແລະ ເຮັດເປັນແຫຼ່ງທ່ອງທ່ຽວແບບອະນຸລັກ.
ໂອ້ຍຈັ່ງແມ່ນໜູຫຼາຍ! ເອົາສານໜູມາເບືອມັນໃຫ້ຕາຍໝົດສາ ບໍ່ຊັ້ນມັນມາກິນເຂົ້ານາໝົດແທ້.

ຄວາມໝາຍຄຳວ່າ “ເບື່ອ”.

“ເບື່ອ” (1. ຄໍາກິລິຍາ) ເມົາ, ເມົາຢາພິດ ຫຼື ຂອງມີພິດ, ໜ່າຍ, ເປີດ, ບໍ່ຢາກ, ຊັງ, ບໍ່ມັກ, ບໍ່ຊອບ.

ຕົວຢ່າງ:

ສົງຄວາມຫວຽດນາມ ແລະ ສົງຄາມລັບໃນລາວ ຈັກກະພັດອາເມລິກາ ບໍ່ພຽງແຕ່ໃຊ້ລະເບີດ ແລະ ກະສຸນປືນ ເທົ່ານັ້ນ ແຕ່ຍັງໃຊ້ທາດເບື່ອ ຄື ຝົນເຫຼືອງ (dioxin) ໂຮຍລົງແຕ່ເທິງຟ້າຢ່າງ ບ້າຄັ່ງ ເຮັດໃຫ້ປ່າດົງ ດິນດອນຫຍ້າ ສັດນາໆ ຮອດແມງໄມ້ ຕາຍສິ້ນແມ່ນບໍ່ເຫຼືອ ສານພິດດັ່ງ ກ່າວຍັງຕົກຄ້າງ ແລະ ສົ່ງຜົນກະທົບຕໍ່ຄົນ, ສັດ ແລະ ສິ່ງແວດລ້ອມເທົ່າທຸກວັນນີ້ ຊຶ່ງແມ່ນຄວາມເຈັບປວດທີ່ເຮັດໃຫ້ລືມຍາກ.
ພໍຮອດຍາມຝົນ ມັກໄດ້ຍິນຂ່າວໄທບ້ານໄປເກັບເຫັດປ່າ ມາເຮັດກິນແລ້ວເບື່ອ ບາງປີມີຄົນເສຍຊີວິດຍ້ອນ.
ຈັ່ງແມ່ນເບື່ອໂລກໂຄວິດ-19 ເດ! ເບື່ອຢູ່ເຮືອນຢູ່ຊານ ໄປໃສກະບໍ່ໄດ້ ມີແຕ່ເຝົ້າໂທລະທັດ ແລະ ໂທລະສັບ ແລ້ວບໍ່ແລ້ວ ຍັງເບື່ອກິນແຕ່ອາຫານເດີມໆ ໄປຕະຫຼາດກໍບໍ່ກ້າ.

ສະຫຼຸບ.

ຄຳວ່າ “ເບືອ” ໝາຍເຖິງສາກຄົກທີ່ຕໍາດ້ວຍມື ເຮັດດ້ວຍໄມ້ເປັນທ່ອນຄັດຢ່າງດີ ຍາວປະມານສອກນຶ່ງ, ໝາຍເຖິງການເອົາຢາພິດໃສ່ໃຫ້ກິນ. ສ່ວນຄຳວ່າ “ເບື່ອ” ໝາຍເຖິງ ການເມົາຢາພິດ. ໝາຍເຖິງການໜ່າຍ ຫຼື ບໍ່ມັກ ຫຼື ບໍ່ຊອບ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo