ຄຳວ່າ “ຮ້ອຍ” ແລະ “ລ້ອຍ” ມີຄວາມໝາຍອັນດຽວກັນບໍ່?
ອະທິບາຍຄວາມຂອງຄຳວ່າ “ “ຮ້ອຍ” ແລະ ລ້ອຍ”.
ຄໍາວ່າ “ຮ້ອຍ” ແມ່ນຕົວເລກ (100) ທີ່ຢູ່ຫຼັງເລກອັນດັບເກົ້າສິບເກົ້າ ຫຼື ມີເລກ 1 ແລະ ເລກ 00 ຢູ່ນໍາ ກັນ ນໍາໃຊ້ເຂົ້າໃນການຄິດໄລ່ເລກ. ພ້ອມນັ້ນ, ຍັງມີຄວາມໝາຍການເອົາເສັ້ນສອດເຂົ້າໃນສິ່ງໃດນຶ່ງ ເຊັ່ນ ການຮ້ອຍໝາກເດືອຍຫີນ ເຮັດເປັນສາຍແຂນ, ການຮ້ອຍລູກປັດ ເພື່ອເຮັດສາຍຄໍ.
ດັ່ງນັ້ນເພື່ອນຳໃຊ້ໃຫ້ຖືກຕ້ອງ ແລະ ສອດຄ່ອງກັບຫຼັກການຂິດຂຽນວ່າເຮົາຄວນໃຊ້ຄຳໃດແທ້ຈິ່ງຈະແທດເໝາະຕ້ອງໄດ້ມີການສຶກສາໃຫ້ເຂົ້າໃຈຢ່າງລະອຽດສາກ່ອນ.
ຄວາມໝາຍຄຳວ່າ “ຮ້ອຍ”:
“ຮ້ອຍ” (1. ຄໍາຄູນສັບ ຫຼື ກິລິຍາວິເສດ) ຈໍານວນນັບ 10 ສິບເທື່ອ ຄືເລກ 1 ມີ 00 (ສູນ), (2. ຄໍາ ກິລິຍາ) ເອົາສິ່ງເປັນເສັ້ນສອດເຂົ້າກັນ ດັ່ງຮ້ອຍດອກໄມ້, ສອດແລ້ວຜູກໃຫ້ຕິດຕໍ່ກັນ. (3. ຄໍານາມ) ມາດຕານໍ້າໜັກເງິນບູຮານມມີນໍ້າໜັກ 10 ບາດ ເອີ້ນເງິນຮ້ອຍຮູບກ້ານສວຍເງິນຮ້ອຍປະສົມ ເນື້ອເງິນແທ້ມີພຽງ 10 ສະລຶງເທົ່ານັ້ນ.
ຕົວຢ່າງ:
- ເດັກນ້ອຍສະໄໝນີ້ເກັ່ງຫຼາຍສາມາດນັບຮອດເລກຮ້ອຍເປັນພາສາລາວ ແລະ ພາສາອັງກິດ ຄວບ ຄູ່ກັນໄປ ຕ່າງກັບສະໄໝແຕ່ກີ້ໃຫຍ່ຈົນເປັນບ່າວເລກໜຶ່ງໃຫຍ່ສໍ່າໂຕຄວາຍ ຕໍາຕາກະຍັງບໍ່ຮູ້.
- ຄໍາສຸພາສິດລາວໄດ້ກ່າວໄວ້ວ່າ “ຢາກມີເງິນເປັນຮ້ອຍ ຢາກມີເມຍນ້ອຍເປັນພັນ”. ໝາຍເຖິງ ຄວາມຕັນຫາຂອງຜູ້ຊາຍນັ້ນເອງ.
- ລູງທິດສີ ເປັນຄົນໃຈຮ້ອຍຫຼາຍ (ໃຈເຕັມ 100%) ສະໄໝເປັນໜຸ່ມລາວທຽວມາຕັ້ງໄກດ້ວຍການ ຂີ່ລົດຖີບ ເພື່ອມາລົມປ້າ ກ່ອນຈະໄດ້ເປັນເມຍ ສົມພໍວ່າລາວຈິ່ງຮັກເມຍລາວຂະໜາດຂັ້ນວ່າມົດບໍ່ ໃຫ້ໄຕ່ໄຮບໍ່ໃຫ້ຕອມ.
- ສາວຄົນນັ້ນ ທັງງາມ ທັງເກັ່ງ ແລະ ມີສິນລະປະ ລາວຮ້ອຍພວງມະໄລດ້ວຍຄວາມອົດທົນ ແລະ ຜົນອອກມາແມ່ນງາມຫຼາຍ.
- ສະໄໝບູຮານການຊື້ຂາຍ, ການສູ່ຂໍເມຍ ແມ່ນນິຍົມໃຊ້ເງິນຮ້ອຍ ແຕ່ປະຈຸບັນ ແມ່ນບໍ່ໄດ້ນໍາໃຊ້ ແລ້ວເຮັດໃຫ້ຄົນໃນສັງຄົມຍັງບໍ່ຮູ້ວ່າຮູບຮ່າງໜ້າຕາເງິນຮ້ອຍເປັນແນວໃດ ແລະ ອາດຈະຖືກລືມ ໄປຕາມການເວລາ ຖ້າຫາກບໍ່ມີການອະນຸລັກໄວ້.
ຄວາມໝາຍຄຳວ່າ “ລ້ອຍ”:
“ລ້ອຍ” ແມ່ນເປັນຄໍາທີ່ເວົ້າໃນບາງເຂດແຂວງ, ບາງພາກຂອງປະເທດລາວ ແຕ່ທາງດ້ານຫຼັກການຂຽນໃນໄວຍະກອນລາວ ແມ່ນບໍ່ມີ.
ສະຫຼຸບ
ຄຳວ່າ “ຮ້ອຍ” ຕົວເລກ, ການຮ້ອຍສິ່ງໃດນຶ່ງດ້ວຍເສັ້ນດ້າຍ. ສ່ວນຄຳວ່າ “ລ້ອຍ” ແມ່ນພຽງພາສາເວົ້າໃນບາງທ້ອງຖີ່ນ ແຕ່ດ້ານຫຼັກໄວຍະກອນແລ້ວ ການຂຽນແມ່ນບໍ່ມີ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo