ຄຳວ່າ “ຮັກ” ແລະ “ຫັກ” ມີຄວາມໝາຍອັນດຽວກັນບໍ່?
ອະທິບາຍຄວາມຄືກັນ ແລະ ຕ່າງກັນ ຂອງຄຳວ່າ “ຮັກ” ແລະ “ຫັກ”.
ຄຳວ່າ “ຮັກ” ແລະ “ຫັກ” ເຖິງວ່າການອອກສຽງຈະໃກ້ຄຽງກັນຕ່າງແຕ່ສຽງສູງ ກັບສຽງຕໍ່າ ກໍຕາມແຕ່ ຄວາມໝາຍພັດຄົນລະຢ່າງ ສະນັ້ນ ເພື່ອເປັນການນຳໃຊ້ໃຫ້ຖືກຕ້ອງວ່າໂດຍສະເພາະແມ່ນການຂຽນນັ້ນ ເຮົາຈະຕ້ອງໄດ້ມີການສຶກສາໃຫ້ເຂົ້າໃຈຢ່າງລະອຽດສາກ່ອນ.
ຄຳວ່າ “ຮັກ” ໝາຍເຖິງການຮັກ ຫຼື ແພງສິ່ງໃດໜຶ່ງ ຫຼື ມັກໃນສິ່ງນັ້ນໆ ດ້ວຍຄວາມບໍລິສຸດໃຈ ຊຶ່ງອາລົມ ຂອງຄວາມຮັກສ່ວນໃຫຍ່ແມ່ນຈະເຮັດໃຫ້ດີໃຈ ປື້ມໃຈ ໃນທາງກົງກັນຂ້າມຖ້າຮັກບໍ່ສົມຫວັງ, ຜິດຫວັງ ມັກຈະເຮັດໃຫ້ເສຍອາລົມ. ນອກຈາກນັ້ນ ຍັງເປັນຊື່ຕົ້ນດອກໄມ້ຊະນິດໜຶ່ງທີ່ມີດອກເປັນສີຂາວ.
ຄຳວ່າ “ຫັກ” ແມ່ນການຂາດ, ການແຕກຫັກອອກຈາກກັນ ຫຼື ກັບຄືນທາງເກົ່າແບບກະທັນຫັນ ເຊັ່ນ: ງ່າ ຕົ້ນໄມ້ຫັກ, ການຫັກຫຼັງຊຶ່ງກັນ ແລະ ກັນ, ການຫັກລົດໜີສິ່ງໃດໜຶ່ງ.
ສະນັ້ນ ເພື່ອໃຫ້ເຂົ້າໃຈເລີກຊຶ່ງກວ່າເກົ່າ ແລະ ເປັນໄປຕາມຫຼັກໄວຍະກອນ ເຮົາມາເບີ່ງລາຍລະອຽດດັ່ງລຸ່ມນີ້:
ຄວາມໝາຍຄຳວ່າ “ຮັກ”:
“ຮັກ” (1.ຄໍາກິລິຍາ) ພໍໃຈດ້ວຍຄວາມຍິນດີ, ແພງ, ມັກ. (2.ຄໍານາມ) ຊື່ຕົ້ນໄມ້ແນວໜຶ່ງເປັນຕຸ່ມໃບໜາສີ ໝົ່ນ ເອີ້ນ ຕົ້ນດອກຮັກ.
ຕົວຢ່າງ:
- ເກີດເປັນຄົນຊາດດຽວໄປໃສກະໃຫ້ສ້າງຮັກສ້າງແພງ ການຮູ້ຈັກຮັກແພງກັນນັ້ນແມ່ນຄຸ້ມຄ່າ ເພາະ ມີແຕ່ໄດ້ກັບໄດ້.
- ຄູ່ບ່າວສາວໄດ້ຮູ້ຈັກຮັກແພງ ແລະ ສຶກສາໃຈກັນມາດົນ ກ່ອນຈະຕົກລົງປົງໃຈ ແຕ່ງງານຕາມຮິດ ຄອງປະເພນີ.
- ສອງສ່ຽວນັ້ນ ລົມສາວຄົນດຽວກັນ ເຮັດໃຫ້ຄົນໜຶ່ງໄດ້ເປັນແຟນ (ເປັນຊູ້) ສ່ວນອີກຄົນໜຶ່ງແມ່ນອົກ ຮັກ ຄິດວ່າລາວຊິຄຽດໃຫ້ໝູ່ລາວພັດດີໃຈນໍາເພື່ອນ ແລະ ຍອມຮັບຄວາມຈິງ ຖືວ່າເປັນຄົນໃຈ ກວ້າງຫຼາຍ.
- ງານລ້ຽງປີໃໝ່ ອາຈານພານັກຮຽນເອົາດອກຮັກມາຫ້ອຍເຮັດເປັນພວງມາໄລຄ້ອງຄໍ ເພື່ອໃສ່ໃຫ້ ກັນໃນຕອນຟ້ອນລໍາວົງ.
ຄວາມໝາຍຄຳວ່າ “ຫັກ”:
“ຫັກ” (1.ຄໍາກິລິຍາ) ພັບ ຫຼື ງໍເຂົ້າໃຫ້ຂາດຈາກກັນ, ທົບຕ່າວ ຫຼື ຫຼົບຄືນ. ຫັກມູມ. (2.ຄໍານາມ) ຊື່ ກ້ວຍແນວໜຶ່ງ ໜ່ວຍມຸກ ແລະ ສັ້ນ. ຫັກລາຄາ. (3.ຄໍາກິລິຍາ) ຫຼຸດລາຄາໃຫ້ນ້ອຍລົງ. ຫັກໜ້າ. (4.ຄໍາກິລິຍາ) ເຮັດໃຫ້ອາຍ. ຫັກຫຼັງ. (5.ຄໍາກິລິຍາ) ປີ້ນເອົາດີແຕ່ໂຕ ໃຫ້ຮ້າຍແກ່ຜູ້ອື່ນທີ່ຮ່ວມຄຶດນໍາກັນມາ. ຫັກຫານ. (6.ຄໍາກິລິຍາ) ຫັກເອົາດ້ວຍຄວາມກ້າ, ກ້າຫານ.
ຕົວຢ່າງ:
- ໃນເວລາທີ່ມີພະຍຸລົມແຮງ ໃຫ້ລະມັດລະວັງ ຢ່າໄປຢູ່ກ້ອງຕົ້ນໄມ້ໃຫຍ່ ເພາະຢ້ານຟ້າຜ່າ ອີກ ຢ່າງໜຶ່ງ ກໍຢ້ານງ່າໄມ້ຫັກທັບ ຊິເຮັດໃຫ້ບາດເຈັບໄດ້.
- ການທີ່ຈະເຮັດໃຫ້ເຫຼັກລວດຂາດ ວິທີໜຶ່ງກະຄືຫັກໄປຫັກມາຫຼາຍໆຄັ້ງ.
- ໃນຂະນະທີ່ລາວກໍາລັງຂັບລົດຢູ່ກາງທາງ ຢູ່ດີໆກໍມີໂຕແບ້ແລ່ນຕັດໜ້າ ເຮັດໃຫ້ລາວຕ້ອງຫັກລົດ ຫຼີກ ເພື່ອຄວາມປອດໄພ.
- ວານນີ້ໝູ່ຂ້ອຍເວົ້າໃຫ້ຄືໄປຮອດເຮືອນລາວຊ້າແທ້ ທີ່ຈິງລົດຕິດຫຼາຍ (ແອອັດ) ກວ່າຈະຫັກມູມ ໄປທາງເຮືອນລາວໄດ້ໃຊ້ເວລາເກືອບໜຶ່ງຊົ່ວໂມງ.
- ແມ່ຄ້າຢູ່ຕະຫຼາດຜິດກັນຍ້ອນຍາດລູກຄ້າ ແລະ ຫັກໜ້າຊຶ່ງກັນ ແລະ ກັນ ຢ່າງບໍ່ປະນີປະນອມ.
- ບໍຄິດບໍ່ຝັນເລີຍວ່າສອງສ່ຽວເຂົາເຈົ້າ ທີ່ຮັກແພງກັນມາຕັ້ງແຕ່ນ້ອຍ ຊິກັກຫຼັງກັນຍ້ອນຍາດຜູ້ສາວ ຄົນດຽວ ເວົ້າມາແລ້ວເປັນຕາອາຍແທນແທ້ໆ.
- ກິລາບານເຕະນັດຊິງແຊມ ລະຫວ່າງທີມ ເຊວຊີ ແລະ ບາເຢີນ ຮຸ່ນແຮງຫຼາຍ ຈົນມີນັກກິລາຂາ ຫັກໜຶ່ງຄົນ.
ສະຫຼຸບ
ການອອກສຽງ ຄຳວ່າ “ຮັກ” ແລະ “ຫັກ” ເຖິງຈະໃກ້ຄຽງກັນ ແຕ່ຄວາມໝາຍກະແຕກຕ່າງກັນ ເພາະຄຳວ່າ “ຮັກ” ແມ່ນສິ່ງທີ່ດີ ໝາຍເຖິງການໃກ້ສິດ, ການຮັກແພງກັນ. ສ່ວນຄຳວ່າ “ຫັກ” ແມ່ນການຂາດ ອອກຈາກກັນ, ການຕ່າວກັບຄືນທາງເກົ່າຢ່າງ ກະທັນຫັນ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo