ອະທິບາຍຄວາມຄືກັນ ແລະ ຕ່າງກັນ ຂອງຄຳວ່າ “ຫາງ” ແລະ “ຫ່າງ”.

ໃນພາສາລາວຫຼາຍຄຳທີ່ອອກສຽງໃກ້ຄຽງກັນ ແຕ່ຊໍ້າພັດມີຄວາມໝາຍແຕກຕ່າງກັນ ສະນັ້ນເພື່ອເປັນການນຳໃຊ້ໃຫ້ຖືກຕ້ອງ ວ່າເຮົາຄວນໃຊ້ຄຳໃດແທ້ ຈິ່ງຈະແທດເໝາະ ແລະ ການສະກົດຄຳໃຫ້ຖືກຕ້ອງຕາມຫຼັກໄວຍະກອນຂອງພາສາລາວ ຕ້ອງໄດ້ມີການສຶກສາໃຫ້ເຂົ້າໃຈຢ່າງລະອຽດສາກ່ອນ.

ດັ່ງທີ່ຮູ້ນໍາກັນແລ້ວວ່າປະເທດລາວມີການໃຊ້ຫຼາຍສໍານຽງ ຖ້າຟັງບໍ່ດີບາງຄໍາກໍ່ອາດເຮັດໃຫ້ເຂົ້າໃຈຜິດໃດ້ ເປັນຕົ້ນຄຳວ່າ ຫາງ ແລະ ຫ່າງ ເຫັນວ່າການອອກສຽງໃກ້ຄຽງກັນອາດເຮັດໃຫ້ສັບສົນໃນການນຳໃຊ້ແຕ່ມີຄວາມໝາຍແຕກຕ່າງກັນ, ເພາະວ່າສອງຄຳນີ້ມີສຽງອັນດຽວກັນ ຕ່າງແຕ່ສຽງສູງ ກັບສຽງຕໍ່າ. ສໍາລັບ ຄວາມໝາຍ ລວມທັງການນໍາໃຊ້ ແມ່ນມີດັ່ງລຸ່ມນີ້:

ຄວາມໝາຍຄຳວ່າ “ຫາງ”:

1). ສ່ວນທ້າຍແຫ່ງລຳຄີງຂອງສັດ ຕໍ່ກົ້ນອອກໄປ, ຂົນແຫ່ງສັດຈຳພວກນົກ ທີ່ຢູ່ສ່ວນກົ້ນ,

2). ສ່ວນຍາວທີ່ຕໍ່ລຳຄີງອອກໄປ ດັ່ງ ຫາງບັ້ງໄຟ, ຫາງໂຕຫນັງສື, ສ່ວນເສດທີ່ເອົາຂອງດີອອກແລ້ວ ດັ່ງ ຫາງກະທິ

ຕົວຢ່າງ:

ງົວກະທິງໂຕນັ້ນ ໂຕໃຫຍ່ ຫາງຍາວ ແບບບໍ່ເຄີຍເຫັນມາກ່ອນ
ນົກຍຸງເປັນນົກທີ່ງາມ ແລະ ມີເອກະລັກ ສາມາດກາງຫາງອອກໄດ້ ແລະ ງາມຫຼາຍ.
ໂອຍ! ວຽກຫຼາຍຍາວປານຫາງວ່າວເລີຍຊ່ວງໂຄວິດ-19 ລະບາດນີ້

ຄວາມໝາຍຄຳວ່າ “ຫ່າງ”:

ຍະອອກໄກກັນ, ໄກ, ບໍ່ຕິດກັນ, ຫ່າງເຫີນກັນໄປ, ໄກກັນໄປ, ບໍ່ຄຸ້ນກັນດັ່ງແຕ່ເກົ່າ.

ຕົວຢ່າງ:

ຊ່ວງນີ້ໂຄວິດ-19 ລະບາດ ຂໍໃຫ້ທຸກທ່ານຮັກສາໄລຍະຫ່າງ ຕາມທາງການເພີ່ນໄດ້ປະກາດ ຫຼື ຢູ່ຫ່າງໆກັນຊົ່ວຄາວກ່ອນກະໄດ້ຖ້າສະພາບການປົກກະຕິແລ້ວຄ່ອຍມາຫາກັນ.
ສຸພາສິດລາວເວົ້າວ່າ “ພີ່ນ້ອງສາມປີບໍ່ຂຶ້ນເຮືອນເປັນຄົນອື່ນ” ດັ່ງນັ້ນຈົ່ງຢ່າຫ່າງເຫີນກັນເດີ ໃຫ້ໄປ ມາຫາສູ່ ໄປພຸ້ນກີນປາມາພີ້ກີນເຂົ້າ.

ສະຫຼຸບ

ການນໍາໃຊ້ຄຳທັງສອງມີຄວາມໝາຍ ແລະ ການນໍາໃຊ້ແຕກຕ່າງກັນໂດຍຄຳວ່າ “ຫາງ” ແມ່ນຄໍານາມໝາຍ ເຖິງສີ່ງທີ່ຍາວຕໍ່ສ່ວນທ້າຍຂອງໂຕສັດ ແລະ ສິ່ງຂອງຈໍານວນໜຶ່ງ. ສ່ວນ ຄຳວ່າ “ຫ່າງ” ແມ່ນການບໍ່ຢູ່ຕິດກັນ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo