ຄຳວ່າ ສ້ອນ ແລະ ຊ້ອນໃນພາສາລາວມີຄວາມໝາຍດຽວກັນບໍ່?
DooDiDo
ພາສາລາວຄຳວ່າ ສ້ອນ ແລະ ຊ້ອນ ມີຄວາມໝາຍແນວໃດ?
ມີຫຼາຍຄໍາສັບໃນພາສາລາວທີ່ຂຽນ ແລະ ອ່ານອອກສຽງຄ້າຍຄືກັນ ແຕ່ມີຄວາມໝາຍຕ່າງກັນ ແລະ ຄໍາສັບໜຶ່ງກໍ່ສາມາດແປເປັນຫຼາຍຄວາມໝາຍໄດ້ ຂຶ້ນກັບຮູບປະໂຫຍກຂອງມັນ, ຊຶ່ງບາງຄໍາສັບກໍ່ມີຄວາມໝາຍທີ່ສັບສົນເວລານໍາໃຊ້, ຍົກຕົວຢ່າງຄໍາວ່າ: ສ້ອນ ກັບ ຊ້ອນ ການອອກຂຽນແມ່ນມີຄວາມແຕກຕ່າງກັນ ແຕ່ວ່າການອອກສຽງຈໍາແນກໄດ້ຂ່ອນຂ້າງຍາກ.
ສອງຄຳນີ້ສິ່ງທີ່ເປັນບັນຫາແມ່ນການຕີຄວາມໝາຍຂອງມັນ, ເຊິ່ງຄົນສ່ວນຫຼາຍມັກເຂົ້າໃຈວ່າຄໍາສັບສອງຄໍານີ້ມີຄວາມໝາຍດຽວກັນ ສາມາດໃຊ້ໂຕໃດກໍ່ໄດ້, ແຕ່ໃນຄວາມເປັນຈິງແລ້ວມັນມີຄວາມໝາຍທີ່ແຕກຕ່າງກັນ ແລະ ແນ່ນອນວ່າຫຼາຍຄົນຄົງເຄີຍເຂົ້າໃຈຜິດກ່ຽວກັບຄວາມໝາຍຂອງສອງຄໍານີ້. ແລະ ອີງຕາມຂໍ້ມູນຈາກວັດຈະນານຸກົມພາສາລາວ ຄົ້ນຄວ້າ ແລະ ຮຽບຮຽງ ໂດຍ ທອງຄຳ ອ່ອນມະນີສອນ, ເຮົາສາມາດຕີຄວາມໝາຍຂອງຄໍາສັບທັງສອງຄໍາດັ່ງກ່າວຄື:
ຄຳວ່າ ສ້ອນ:
ເປັນທັງຄໍານາມ ແລະ ຄໍາກໍາມະ ມີຄວາມໝາຍໃກ້ຄຽງໃກ້ຄື.
ຄຳນາມ ແປວ່າ ເຄື່ອງໃສ່ເອົາປາເຮັດຄືໄຊແຕ່ບໍ່ມີງາປາເຂົ້າໄປຄາຢູ່ກົ້ນ
ຄໍາກຳມະ ແປວ່າ ເອົາສະຫວິງ, ສະນາງ(ຈາງນາງ) ຫຼື ຂອງອື່ນຊວ້ານເອົາປາກຸ້ງຢູ່ໃນນ້ຳ.
ຕົວຢ່າງ:
ມື້ນີ້ຂ້ອຍຈະໄປສ້ອນກຸ້ງສ້ອນປາຢູ່ຫ້ວຍຫົວນາມາເອາະສູ່ແມ່ກິນ.
ເຈາະຈິ້ມສໍ້ເອົາຄວາມສຳຄັນ ເອີ້ນວ່າ ສ້ອນເອົາຄວາມ.
ຫຼານເປັນໄຂຫຼາຍມື້ຍັງບໍ່ເຊົາ ພໍ່ຕູ້ຈຶ່ງໃຫ້ຜູ້ເຖົ້າມາເຮັດພິທີເອີ້ນຂວັນ (ການທຳພິທີເອີ້ນເອົາຂວັນຂອງຄົນເຈັບດ້ວຍການເອົາແພ ຫຼື ສະຫວິງສ້ອນເອົາຂວັນ (ຕາມຄວາມເຊື່ອຂອງສາດສະໜາ).
ຄຳວ່າ ຊ້ອນ:
ເປັນທັງ ຄໍານາມ, ຄໍາກໍາມະ ແລະ ຄໍາຄຸນນາມ ມີຄວາມໝາຍຕ່າງກັນຄື:
ຄຳນາມ.
ຄວາມໝາຍທີ່ 1. ແມ່ນຊື່ຂອງດອກໄມ້ສະນິດໜຶ່ງເປັນດອກນ້ອຍສີຂາວທີກິ່ນຫອມ ເອີ້ນວ່າ ດອກຊ້ອນ, ມີສອງແນວດອກຊ້ອນນ້ອຍ ແລະ ຊ້ອນສະເພົາ.
ຕົວຢ່າງ:
ທຸກໆວັນສິນ ແມ່ຂອງຂ້ອຍເກັບດອກຊ້ອນມາຮ້ອຍເປັນພວງມະໄລເພື່ອບູຊາພະ.
ຄວາມໝາຍທີ່ 2. ແມ່ນບ່ວງຢ່າງໜຶ່ງທີ່ມີກ້ານຍາວ ເອີ້ນວ່າ ບ່ວງຊ້ອນ.
ຕົວຢ່າງ:
ເວລາເສີບອາຫານປະເພດແກງຢ່າລືມເອົາຊ້ອນຕັກແກງໄປນໍາເດີ້.
ຄໍາກຳມະ. ແປວ່າ ທຽມ, ຊອນ, ເຕັງກັນເປັນຊັ້ນໆ.
ຕົວຢ່າງ:
ວຽກບ້ານທີ່ອາຈານໃຫ້ມາມັນຊ້ອນກັນຫຼາຍບົດຈົນຂ້ອຍເຮັດບໍ່ທັນ.
ຄໍາຄຸນນາມ. ແປວ່າ ຄຽງຄູ່, ການນອນຄຽງຄູ່ກັນແບບຊາຍໜຸ່ມຍິງສາວ ເອີ້ນວ່າ ນອນຊ້ອນ.
ຕົວຢ່າງ:
ອາຍຸກະຈົນຮອດ 30 ປີ ແລ້ວ ຍັງບໍ່ມີຮອດຄົນຊິມານອນຊ້ອນຄຽງຄູ່, ຮູ້ສຶກດຽວດາຍແທ້ນໍ.
ສະຫຼຸບ:
ຄໍາວ່າ ສ້ອນ ໝາຍເຖິງ ຕັກ, ຊວ້ານ ເອົາສິ່ງໃດໜຶ່ງ; ສ່ວນຄໍາວ່າ ຊ້ອນ ຄໍານາມແມ່ນໃຊ້ເປັນຊື່ເອີ້ນ ດອກໄມ້ຊະນິດໜຶ່ງ ແລະ ເປັນຊື່ບ່ວງຕັກແກງ, ຄໍາກໍາມະ ແມ່ນທຽມ ຫຼື ເຕັງກັນເປັນຊັ້ນໆ, ຄໍາຄຸນນາມແມ່ນ ການຄຽງຄູ່ແບບໜຸ່ມສາວ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
