ອະທິບາຍຄວາມໝາຍທີ່ແຕກຕ່າງກັນ ຄຳວ່າ ສ່ອງ ແລະ ຊ່ອງ.

ຄຳເວ້ົາໃນພາສາລາວຂອງເຮົາຍັງມີອີກຫຼາກຫຼາຍຄຳສັບທີ່ຍັງເຮັດໃຫ້ເກີດຂໍ້ສົງໃສ ແລະ ຄ້າງຄາໃຈວ່າຄຳສັບບາງຄຳມີການອອກສຽງທີ່ໃກ້ຄຽງກັນ ແຕ່ຊ້ຳພັດມີຕົວສະກົດ ແລະ ຄວາມໝາຍທີ່ບໍ່ຄືກັນເລີຍ ສະນັ້ນ ຈື່ງອາດພາໃຫ້ເກີດເປັນຈຸດອ່ອນໃນການໃຊ້ຄຳສັບ ຫຼື ການໃຊ້ສື່ສານກັນໃນຊີວິດປະຈຳວັນ ເພາະຖ້າຫາກເຮົາສື່ສານກັນໂດຍການນຳໃຊ້ຄຳສັບ ຫຼື ນ້ຳສຽງທີ່ບໍ່ຖືກຕ້ອງກໍ່ສາມາດເຮັດໃຫ້ຄູ່ສົນທະນາເຂົ້າໃຈໄປໃນຄວາມໝາຍທີ່ແຕກຕ່າງກັນອອກໄປກໍ່ເປັນໄດ້ເຊັ່ນ : ຄຳວ່າ ສ່ອງ ແລະ ຊ່ອງ

ບົດນີ້ເຮົາຈື່ງຈະຍົກເອົາ ຄຳວ່າ ສ່ອງ ແລະ ຊ່ອງ ມາອະທິບາຍ, ເພາະສອງຄຳນີ້ຫຼາຍໆຄົນອາດຍັງສະກົດ ຫຼື ອອກສຽງອັນດຽວກັນຢູ່ ເພາະຄິດວ່າມັນມີຄວາມໝາຍອັນດຽວກັນກໍ່ເປັນໄດ້ ໂດຍສະເພາະແມ່ນຄົນຕ່າງຊາດທີ່ມາທ່ຽວ ຫຼື ອາໃສຢູ່ລາວທີ່ອາດຍັງບໍ່ເຂົ້າໃຈໃນການໃຊ້ຄຳສັບ,ນ້ຳສຽງ ແລະ ຄວາມໝາຍຂອງທັງສອງຄຳນີ້, ດັ່ງນັ້ນມື້ນີ້ເຮົາຈະມາສຶກສາຄຳວ່າ ສ່ອງ ແລະ ຊ່ອງ ນີ້ໄປພ້ອມກັນວ່າ ທັງສອງຄຳນີ້ມິຫຼັກການນຳໃຊ້ ແລະ ສະກົດຄຳທີ່ຄ້າຍຄືກັນ ແລະ ແຕກຕ່າງກັນຄືແນວໃດ?

ຄຳວ່າສ່ອງ.

ຄຳວ່າ ສ່ອງໄດ້ແບ່ງອອກເປັນ 2 ປະເພດຄຳຄື :

ສ່ອງເປັນຄຳກິລິຍາ: ໝາຍເຖິງການເບິ່ງຕາມປ່ອງ, ເບິ່ງຕາມບ່ອນທີ່ເປັນຮູ, ຫຼື ຢາກເວົ້າໃຫ້ລະອຽດກໍ່ໝາຍເຖິງ ການທີ່ເຮົາສຸມສາຍຕາຜ່ານປ່ອງ, ຜ່ານຮູເພື່ອເບິ່ງສິ່ງໃກສິ່ງໜື່ງເຊັ່ນ:

ຕົວຢ່າງ:

ລາວສ່ອງກ້ອງເບິ່ງດາວ
ຈັນດີລາວມັກສ່ອງຕາມປ່ອງເພື່ອເບິ່ງການເຄື່ອນໄຫວຂອງສັດຕູ
ທ່ານໝໍໄດ້ສ່ອງກ້ອງຈຸລະທັດເບິ່ງເຊື້ອຈຸລິນຊີ

ສ່ອງເປັນຄຳວິເສດ: ໝາຍເຖິງ ຄວາມແຈ້ງ, ໃສ, ສະຫວ່າງ ເຊັ່ນ

ຕົວຢ່າງ:

ດວງຕາເວັນໄດ້ສ່ອງແສງລົງມາສູ່ພື້ນດິນ
ສົມຈັນມີຄວາມເຊື້ອໝັ້ນຕໍ່ການນຳພາອັນສະຫຼາດສ່ອງໃສຂອງພັກ.

ຄຳວ່າຊ່ອງ.

ຄຳວ່າຊ່ອງສາມາດເປັນໄດ້ແຕ່ປະເພດຄຳນາມ ທີ່ບົງບອກເຖິງ ປ່ອງ, ຮູ, ທາງ, ລະຫວ່າງ ຫຼື ບ່ອນຫວ່າງຂອງສະຖານທີ່ ທີ່ມີບ່ອນຕຶບໜາທັງສອງຂ້າງ, ແລະ ຄຳວ່າຊ່ອງນີ້ ສ່ວນຫຼາຍຈະມັກປະສົມກັບຄຳອື່ນເຊັ່ນ: ຊ່ອງແຄບ, ຊ່ອງວ່າງ, ຊ່ອງທາງ ແລະ ອື່ນໆ.

ຕົວຢ່າງ:

ທາງນ້ຳຍາວຢູ່ລະຫວ່າງດິນ ຫຼື ເກາະດອນເຊືື່ອມຕໍ່ທະເລທັງສອງຂ້າງດັ່ງ ຊ່ອງແຄບມະລະກາ.
ເປັນຫຍັງຈື່ງເຮັດໃຫ້ເກີດມີຊ່ອງວ່າງລະຫວ່າງເຈົ້າກັບເຂົາ.
ເຈົ້າມີຊ່ອງທາງໃນການແກ້ໄຂບັນຫາແລ້ວບໍ່?

ສະຫຼຸບ.

ຄຳວ່າ ສ່ອງ ແລະ ຊ່ອງ ທັງສອງຄຳນີ້ ມີການສະກົດຄຳທີ່ຕ່າງກັນ, ມີຄວາມໝາຍທີ່ແຕກຕ່າງກັນ ແຕ່ມີການອອກສຽງທີ່ຄືກັນ ດັ່ງນັ້ນເພື່ອເປັນການບໍ່ໃຫ້ເກີດມີການຜິດພາດໃນການຂຽນ ຫຼື ພິມ ພວກເຮົາຕ້ອງຈື່ໃຫ້ໄດ້ວ່າ ທັງສອງຄຳນີ້ເປັນປະເພດຄຳທີ່ແຕກຕ່າງກັນ ເພາະຄຳວ່າສ່ອງສາມາດເປັນໄດ້ 2 ປະເພດຄຳຄື: ຄຳກິລິຍາ ແລະ ຄຳວິເສດ, ສ່ວນຄຳວ່າຊ່ອງ ສາມາດເປັນໄດ້ພຽງຄຳນາມເທົ່ານັ້ນ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo