ຄຳວ່າ ສະ ແລະ ຊະ ມີຄວາມໝາຍໃນພາສາລາວແນວໃດ?
DooDiDo
ອະທິບາຍພາສາລາວ ຄຳວ່າ ສະ ແລະ ຊະ ມີຄວາມໝາຍແນວໃດ?
ຍ້ອນຄວາມຫຼາກຫຼາຍຂອງວິທີການນໍາໃຊ້ພາສາ ບາງເທື່ອກໍ່ເຮັດໃຫ້ສັບສົນທັງວິທີການຂຽນ, ການເວົ້າ ແລະ ການແປຄວາມໝາຍ ເພາະບາງຄໍາສັບກໍ່ສາມາດແປໄດ້ຫຼາຍຄວາມໝາຍ ຈົນເຮັດໃຫ້ຈໍາແນກບໍ່ໄດ້ວ່າຄວນໃຊ້ຄໍາໃດຈຶ່ງຈະຖືກຕ້ອງ ພ້ອມດຽວກັນນັ້ນ ມັນກໍ່ມີຫລາຍໆຄຳທີ່ອອກສຽງຄ້າຍຄືກັນ ລວມທັງຄວາມໝາຍກໍໃກ້ຄຽງກັນ ແລະ ເວລານຳໄປໃຊ້ ສໍານຽງສຽງເວົ້າກໍ່ແຕກຕ່າງກັນໄປ ຂື້ນກັບຄົນຢູ່ແຕ່ລະເຂດ, ແຂວງ ແລະ ແຕ່ລະພາກຂອງປະເທດລາວ.
ບົດຄວາມນີ້ ເຮົາຈະມາເວົ້າເຖິງຄວາມໝາຍຂອງຄໍາສັບພາສາລາວກໍ່ຄືຄໍາວ່າ ສະ ແລະ ຊະ ສອງຄໍານີ້ສະກົດຄືກັນ ແຕ່ມີຄວາມໝາຍຕ່າງກັນ. ເພື່ອທໍາຄວາມເຂົ້າໃຈຢ່າງເລິກເຊິ່ງກ່ຽວກັບສອງຄໍານີ້ ຂໍອ້າງອີງຕາມຂໍ້ມູນຈາກວັດຈະນານຸກົມພາສາລາວ ຄົ້ນຄວ້າ ແລະ ຮຽບຮຽງ ໂດຍ ທອງຄຳ ອ່ອນມະນີສອນ, ເຊິ່ງເພິ່ນໄດ້ອະທິບາຍຄວາມໝາຍສອງຄໍາສັບດັ່ງກ່າວ ໄວ້ດັ່ງນີ້:
ຄຳວ່າ ສະ.
ເປັນທັງຄໍາກໍາມະ ແລະ ຄໍານາມ.
ຄໍາກໍາມະ
- ໝາຍເຖິງຫວິດນໍ້າ, ຕັກນໍ້າອອກແຕ່ບ່ອນໃດບ່ອນໜຶ່ງໃຫ້ບົກແຫ້ງ ດັ່ງເຊັ່ນ ສະປາ.
ຕົວຢ່າງ:
ມື້ຄືນນີ້ຝົນຕົກໜັກເຮັດໃຫ້ນໍ້າຖ້ວມເຂົ້າຮອດໃນເຮືອນ, ຂ້ອຍກັບແມ່ສະນໍ້າອອກໝົດຄືນຈົນບໍ່ໄດ້ນອນ.
- ໝາຍເຖິງຊໍາລະ, ລ້າງໃຫ້ສະອາດ.
ຕົວຢ່າງ:
ຂ້ອຍໄດ້ຍິນເຂົາເວົ້າວ່າການສະຜົມເຮັດໃຫ້ຜົມຍາວໄວ, ສະນັ້ນຂ້ອຍຈຶ່ງສະຜົມຂອງຂ້ອຍທຸກມື້.
- ໝາຍເຖິງຍົກໃຫ້, ທານ,ສະຫຼະ, ປະວາງ, ບໍ່ຫວງແຫນ.
ມື້ນີ້ຂ້ອຍໄດ້ຮັບບັດເຂົ້າຊົມໜັງຟຣີ ແຕ່ວ່າຂ້ອຍພັດຄາວຽກບໍ່ສາມາດໄປເບິ່ງໄດ້ ຈຶ່ງຈໍາເປັນຕ້ອງໄດ້ສະຫຼະສິດ.
ຄໍານາມ.
ໝາຍເຖິງ ບວກ ຫຼື ໜອງ ທີ່ຄົນຂຸດໄວ້ ຫຼື ກໍ່ໄວ້ສໍາລັບໃຊ້ນໍ້າ, ລອຍນໍ້າ ແລະ ສໍາລັບການແຂ່ງຂັນກິລາລອຍນໍ້າ.
ທຸກໆວັນເສົາຂ້ອຍມັກໄປລອຍນໍ້າຢູ່ສະລອຍນໍ້າບ້ານພໍ່ຕູ້.
ຄຳວ່າ ຊະ.
ເປັນຄໍາກໍາມະ ໝາຍເຖິງ ຢາຍ, ບໍ່ໂຮມກັນ, ແຕກຕ່າງກັນຢ່າງບໍ່ເປັນລະບຽບ ເຊັ່ນ ຊະຊາຍ, ຢັງຢາຍ ເປັນຕົ້ນ.
ຕົວຢ່າງ:
ແມ່ບອກລູກຫຼາຍເທື່ອແລ້ວ ຫຼັງຈາກຫຼິ້ນເຄື່ອງຫຼິ້ນແລ້ວໃຫ້ມ້ຽນເປັນລະບຽບ ບໍ່ແມ່ນໃຫ້ມັນຊະຊາຍຢູ່ແບບນີ້.
ສະຫຼຸບ.
ຄໍາວ່າ ສະ ໝາຍເຖິງການຊໍາລະລ້າງ, ການປະວາງ; ສ່ວນຄໍາວ່າ ຊະ ແມ່ນການເຮັດສິ່ງໃດໜຶ່ງແຕກຢາຍອອກຈາກກັນເຮັດໃຫ້ບໍ່ເປັນລະບຽບ. ສອງຄໍານີມີຄວາມໝາຍທີ່ແຕກຕ່າງກັນ ແລະ ໃຊ້ກັບໂຄງສ້າງປະໂຫຍກທີ່ແຕກຕ່າງກັນ. ສະນັ້ນ ເພື່ອຫຼີິີກລ່ຽງ ຄວາມຜິດພາດໃນການໃຊ້ພາສາເຮົາຄວນສຶກສາເບິ່ງຄວາມໝາຍຂອງຄຳນັ້ນໆໃຫ້ລະອຽດ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
