ຄຳວ່າ ສະທ້ອນ ແລະ ສະເທືອນ ມີຄວາມໝາຍໃນພາສາລາວແນວໃດ?
DooDiDo
ອະທິບາຍພາສາລາວກັບຄຳວ່າ ສະທ້ອນ ແລະ ສະເທືອນ.
ກພາສາລ້ວນແລ້ວແຕ່ມີເອກະລັກຂອງໃຜລາວ ແລະ ກໍ່ມີຄໍາສັບທີ່ຂຽນ ອ່ານຄ້າຍຄືກັນ ບາງຄໍາມັນອອກສຽງຕ່າງກັນແຕ່ໜ້ອຍດຽວ ອອກສຽງສັ້ນສຽງຍາວເທົ່ານັ້ນ ຖ້າເວົ້າຜິດກໍ່ເຮັດໃຫ້ຄວາມໝາຍປ່ຽນໄປແລ້ວ ລວມເຖິງການຕີຄວາມໝາຍຂອງມັນກໍ່ມີຫຼາຍຄໍາສັບທີ່ຄ້າຍຄືກັນ.
ໃນພາສາລາວກໍ່ເປັນພາສາໜຶ່ງທີ່ມີຄໍາສັບຫຼາຍຄໍາທີ່ເຮົາຍັງນໍາໃຊ້ບໍ່ຖືກຕ້ອງຕາມຄວາມໝາຍຂອງມັນ ດັ່ງຄໍາສັບທີ່ເຮົາຈະນໍາມາເວົ້າໃນບົດຄວາມນີ້ຄື ຄໍາວ່າ ສະທ້ອນ ແລະ ສະເທືອນ ສອງຄໍານີ້ການຂຽນ ການອ່ານ ຕ່າງກັນ ແຕ່ຄົນສ່ວນຫຼາຍມັກຫຼົງຄວາມໝາຍຂອງມັນ. ແລະ ໃນບົດນີ້ ໂດຍອີງຕາມຂໍ້ມູນຈາກວັດຈະນານຸກົມພາສາລາວ ຄົ້ນຄວ້າ ແລະ ຮຽບຮຽງ ໂດຍ ທອງຄຳ ອ່ອນມະນີສອນ, ໄດ້ອະທິບາຍຄວາມໝາຍສອງຄໍາສັບດັ່ງກ່າວ ໄວ້ດັ່ງນີ້:
ຄຳວ່າ ສະທ້ອນ:
ເປັນຄໍາກໍາມະ ໝາຍເຖິງ ອາການເຕັ້ນຂຶ້ນລົງໄວໆ, ເຮັດໃຫ້ເຕັ້ນຂຶ້້ນລົງ, ການສະແດງໃຫ້ເຫັນຜົນໄດ້ຮັບກັບຄືນ, ສິ່ງໃດໜຶ່ງສ່ອງໃສ່ແວ່ນແຍງເອີ້ນວ່າພາບສະທ້ອນ.
ຕົວຢ່າງ:
- ເມື່ອເຮົາກົ້ມຫົວລົງແລ້ວຮ້ອງດັງໆໃສ່ໃນໂອ່ງໃຫຍ່ ມັນຈະເກີດສຽງສະທ້ອນດັງອອກມາ.
- ຖ້າເຮົາເອົາແວ່ນແຍງ ຫຼືວັດຖຸປະເພດແກ້ວ ໄປສ່ອງໃສ່ຕາເວັນ ມັນຈະແສງສະທ້ອນ.
- ຜົນສະທ້ອນຈາກການຫຼິ້ນກິນຟຸ່ມເຟີຍກໍ່່ແມ່ນຄວາມຈົນ.
ຄຳວ່າ ສະເທືອນ:
ເປັນຄໍາກໍາມະ ໝາຍເຖິງ ຫວັ່ນໄຫວ, ສັ່ນໄປທົ່ວ, ສັ່ນໄປໝົດ.
ຕົວຢ່າງ:
- ມີຈິດໃຈຫວັ່ນໄຫວຢ່າງຮຸນແຮງ ໃນເມື່ອໄດ້ປະສົບກັບສິ່ງທີ່ບໍ່ໜ້າພໍໃຈ ເຊັ່ນ: ເຫັນພາບແມ່ຕູ້ກອດຊາກສົບຫຼານນ້ອຍຮ້ອງໄຫ້ ແລ້ວຮູ້ສຶກສະເທືອນໃຈ.
- ມີຈິດໃຈຫວັ່ນໄຫວຢ່າງຮຸນແຮງ ເພາະວ່າມີສິ່ງໃດສິ່ງໜຶ່ງ ມາກະທົບເຮັດໃຫ້ຮູ້ສຶກເສົ້າໝອງ ເຊັ່ນ: ນະວະນິຍາຍສະເທືອນອາລົມ ອ່ານແລ້ວເຮັດໃຫ້ເສົ້າໂສກ ສະເທືອນອາລົມ.
- ແຜ່ນດິນໄຫວຄັ້ງນີ້ມັນຮຸນແຮງຫຼາຍຈົນສະເທືອນໄປທົ່ວແຂວງ
ສະຫຼຸບ:
ສອງຄໍານີມີຄວາມໝາຍທີ່ແຕກຕ່າງກັນ ແລະ ຂ່ອນຂ້າງທໍາຄວາມເຂົ້າໃຈຍາກແດ່, ຄໍາວ່າ ສະທ້ອນ ໝາຍເຖິງຜົນຂອງສິ່ງຖືກະທໍາດັ່ງເຊັ່ນພາບສະທ້ອນຈາກການແຍງແວ່ນ; ສ່ວນຄໍາວ່າ ສະເທືອນ ແມ່ນ ຄວາມສັ່ນໄຫວ, ສັ່ນໄປທົ່ວວົງກວ້າງ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
