ຄຳວ່າ “ທ່ຽງ” ແລະ “ຖຽງ” ມີຄວາມໝາຍອັນດຽວກັນບໍ່?
ອະທິບາຍຄວາມຂອງຄຳວ່າ “ທ່ຽງ” ແລະ “ຖຽງ”.
ຄໍາວ່າ “ທ່ຽງ” ໝາຍເຖິງຕອນບ່າຍ, ກາງເວັນ ຫຼື ເວລາ 12 ໂມງ. ນອກຈາກນັ້ນ, ຍັງໝາຍເຖິງ ຄວາມທ່ຽງທໍາ, ສັດຊື່.
ຄໍາວ່າ “ຖຽງ” ໝາຍເຖິງເຮືອນນ້ອຍທີ່ຄົນສ້າງຢູ່ໄຮ່ ຢູ່ນາ ເພື່ອສະດວກ ແລະ ມີບ່ອນພັກເວລາໄປເຮັດ ໄຮ່ ຫຼື ນາ ເອີ້ນວ່າ ຖຽງໄຮ່ ຖຽງນາ. ນອກຈາກນັ້ນ, ຍັງມີຄວາມໝາຍວ່າການໂຕ້ຖຽງ ຫຼື ວິວາດກັນ ຍ້ອນຄວາມບໍ່ເຂົ້າໃຈຊຶ່ງກັນ ແລະ ກັນນັ້ນເອງ.
ເພື່ອໃຫ້ເຂົ້າໃຈຄວາມໝາຍຂອງການນນຳໃຊ້ໃຫ້ຖືກຕ້ອງຕາມຫຼັກໄວຍະກອນການຂິດຂຽນ ເຮົາເບີ່ງຄວາມໝາຍ ແລະ ຕົວຢ່າງ ດັ່ງລຸ່ມນີ້:
ຄວາມໝາຍຄຳວ່າ “ທ່ຽງ”:
“ທ່ຽງ” (1. ຄຳນາມ) ຍາມທ່ຽງ, ຕອນທ່ຽງ, ຕອນບ່າຍ, ຕອນສວາຍ, ກາງເວັນ. (2. ຄຳຄຸນນາມ) ສັດຊື່, ສັມມາ, ສຳມາ, ສຸດຈະລິດ, ທ່ຽງທຳ
ຕົວຢ່າງ:
- ມື້ນີ້ຮຽນໝົດເຊົ້າຈົນຮອດ 12 ໂມງ ຈິ່ງພັກກິນເຂົ້າທ່ຽງ ຈັ່ງແມ່ນຫິວເຂົ້າແທ້ໆ.
- ວານນີ້ນອນເດີກ ມື້ນີ້ຈິ່ງຈໍາເປັນຕ້ອງນອນເວັນ (ນອນຕອນທ່ຽງ) ເພື່ອເອົາແຮງເຮັດວຽກຕອນ ບ່າຍຕໍ່.
- ຕອນບ່າຍວານນີ້ໄປເລາະຫ້າງ ເຫັນແຕ່ເຄື່ອງງາມໆ ເສຍດາຍບໍ່ມີເງິນຊື້.
- ເປົາວຸ້ນຈີ້ນ ເປັນຄົນທ່ຽງທໍາ ຕັດສິນຄະດີດ້ວຍຄວາມບໍລິສຸດຜຸດຜ່ອງ ບໍ່ຮັບສິນບົນ ແລະ ເຂົ້າຂ້າງໃຜ.
ຄວາມໝາຍຄຳວ່າ “ຖຽງ”:
“ຖຽງ” (1. ຄໍານາມ) ຖຽງນາ, ຖຽງໄຮ່. (2. ຄໍານາມ) ການໂຕ້ຖຽງ, ພິພາດ, ວິວາດ, ການຖຽງກັນ
ຕົວຢ່າງ:
- ເວລາໄປທ່ອງທ່ຽວພາກເໜືອຂອງລາວ ມັກຈະເຫັນທ່ຽງໄຮ່ຢູ່ຕາມເປີ້ນພູ ຢັ່ງຢາຍກັນໄປ ເບີ່ງດີໆ ກໍແປກຕາ, ບາງແຂວງຕາມທົ່ງນາ ກໍມີຖຽງນາຢັ່ງຢາຍກັນໄປເບີ່ງແລ້ວງາມຕາດີ.
- ວານນີ້ເຫັນສອງສ່ຽວໂຕ້ຖຽງກັນເລື່ອງບົດຮຽນ ເພາະໃຜກໍວ່າໃຜຖືກ, ແຕ່ຖ້າຢາກຮູ້ຄໍາຕອບທີ່ຖືກ ຕ້ອງແທ້ຄວນໄປຖາມອາຈານ ບໍ່ແມ່ນມາວິວາດກັນແນວນີ້.
ສະຫຼຸບ
ຄຳວ່າ “ທ່ຽງ” ມີຄວາມໝາຍວ່າຕອນທ່ຽງ ຫຼື ເວລາ 12 ໂມງ ແລະ ຄວາມທ່ຽງທໍາ ບໍ່ອ່ຽງຊ້າຍ ອ່ຽງຂວາ ເຂົ້າຝ່າຍໃດຝ່າຍນຶ່ງ. ສ່ວນຄຳວ່າ “ຖຽງ” ໝາຍເຖິງ ຖຽງໄຮ່ ຖຽງນາ ເຮືອນນ້ອຍ ຫຼື ບ່ອນພັກເຊົາເວລາໄປ ເຮັດໄຮ່ ເຮັດນາ. ພ້ອມກັນນັ້ນ ຍັງໝາຍເຖິງການໂຕ້ຖຽງ ຫຼື ວິວາດ ໃຊ້ວາຈາເວົ້າແຮງໃສ່ກັນ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo