ອະທິບາຍຄວາມຂອງຄຳວ່າ “ຂ້າ” ແລະ “ຄ້າ”.

ຄໍາວ່າ “ຂ້າ” ແມ່ນສັງຫານ ຫຼື ເຮັດໃຫ້ຕາຍ. ພ້ອມນັ້ນ, ຍັງມີຄວາມໝາຍຄໍາແທນຊື່ຂອງຄົນເປັນ ຕົ້ນ ຂ້າພະເຈົ້າ, ຂ້າພະບາດ, ຂ້າລາຊະການ. ນອກຈາກນັັ້ນ, ຍັງມີຄວາມໝາຍວ່າເປັນຂ້ອຍຂ້າ ມ້າຕ່າງ ຫຼື ເປັນຄົນຮັບໃຊ້ຜູ້ອື່ນນັ້ນເອງ.

ຄໍາວ່າ “ຄ້າ” ແມ່ນກາຕົກລົງແລກປ່ຽນສິນຄ້າ ຫຼື ບໍລິການ ຫຼື ທັງສອງຢ່າງ, ແມ່ນການຄ້າ, ການຊື້-ຂາຍ.

ເພື່ອໃຫ້ເຂົ້າໃຈຄວາມໝາຍ ການນຳໃຊ້ 2 ຄໍາດັ່ງກ່າວ ໃຫ້ຖືກຕ້ອງຕາມຫຼັກໄວຍາກອນ ຕ້ອງໄດ້ມີການສຶກສາໃຫ້ເຂົ້າໃຈກ່ອນດັ່ງລຸ່ມນີ້:

ຄວາມໝາຍຄຳວ່າ “ຂ້າ”:

“ຂ້າ” (1. ຄໍາກິລິຍາ) ທໍາໃຫ້ຕາຍ, ເຮັດໃຫ້ຕາຍ. ຂ້າຟັນລັນແທງ, ສັງຫານ, ປະຫານ. ຜານຊີວິດ (2. ຄໍາແທນນາມ) ເປັນຄໍາແທນຊື່ຂອງຜູ້ເວົ້າດັ່ງ:ຂ້າ, ຂ້າພະເຈົ້າ, ຂ້າພະບາດ,ຂ້າລາຊະການ. (3. ຄໍານາມ) ຂ້ອຍ, ຄົນໃຊ້.

ຕົວຢ່າງ:

ນັບແຕ່ມີການເຮັດລັດຖະປະຫານຢູ່ປະເມດມຽນມາ ໃນປີ ຄສ 2021 ເຮັດໃຫ້ມີການປະທ້ວງ ແລະ ມີການໃຊ້ກໍາລັງເຂົ້າປາບປາມ, ມີການຂ້າກັນເກີດຂຶ້ນຢ່າງຕໍ່ເນື່ອງ ແລະ ບໍ່ມີທ່າທີວ່າຈະ ສະຫງົບງ່າຍໆ ຄາດວ່າຍັງຈະມີການຂ້າກັນອີກຫຼາຍຮ້ອຍຄົນ.
ແຕ່ລະມື້ຢູ່ໂຮງຂ້າສັດ ໄດ້ຂ້າໝູ, ຂ້າງົວ ແລະ ຂ້າຄວາຍ ເປັນຈໍານວນຫຼາຍຮ້ອຍໂຕ ເພື່ອຕອບສະໜອງການບໍລິໂພກຊີ້ນ ໃຫ້ແກ່ຊາວເມືອງ.
ສົງຄາມກາງເມືອງມີຫຼາຍຝ່າຍໄດ້ລຸກຂຶ້ນຈັບອາວຸດສັງຫານກັນຢ່າງນອງເລືອດ, ຕ່າງຝ່າຍຕ່າງກໍ ປະຫັດປະຫານກັນຢ່າງໂຫດຫ້ຽມ.
ຮຽນບັນດາທ່ານທີ່ນັບຖື, ຂ້າພະເຈົ້າ ຂໍຕາງໜ້າໃຫ້ຍາດຕິພີ່ນ້ອງຂໍສະແດງຄວາມຮູ້ບຸນຄູນ ແລະ ຂອບໃຈມາຍັງທ່ານທີ່ໃຫ້ການຊ່ວຍເຫຼືອໃນຄັ້ງນີ້.
ການເປັນຂ້າລາຊະການ ແມ່ນຕ້ອງໄດ້ທຸ້ມເທທຸກສະຕິປັນຍາ ແລະ ເສຍສະຫຼະເພື່ອປະຊາຊົນ ຢ່າງແທ້ຈິງ ຈຶ່ງເປັນຂ້າລະຊາການທີ່ດີ.
ສະໄໝສັກດີນາ ແມ່ນຂ້າທາດ ເປັນຜູ້ຖືກກົດຂີ່ຂຸດຮິດ ທີ່ສຸດ ເພາະຕ້ອງຮັບໃຊ້ເຈົ້າຊີວິດ ແລະ ບັນດາຂຸນນາງ.

ຄວາມໝາຍຄຳວ່າ “ຄ້າ”:

“ຄ້າ” (1. ຄໍາກິລິຍາ) ຊື້ ແລະ ຂາຍ, ຄ້າຂາຍ. ພານິດ. (2. ຄໍານາມ) ການຊື້ ແລະ ການຂາຍ. (3. ຄໍານາມ) ໄມ້ແນວນຶ່ງຈໍາພວກຫຍ້າຕົ້ນຄືຕົ້ນຂ່າບ້ານ ມັກເກີດຕາມທາມ.

ຕົວຢ່າງ:

ປີນີ້ມູນຄ່າການຄ້າລະຫວ່າງອາຊຽນ ແລະ ຈີນ ເພີ່ມຂຶ້ນເປັນທີ່ໜ້າພໍໃຈ ແລະ ຄາດຄະເນວ່າ ປີ ໜ້າມູນຄ່າການຄ້າແຮງຈະສູງກວ່າເກົ່າ.
ມື້ອື່ນ ແມ່ຕູ້ສາ ມີແຜນຈະໄປຂາຍເຄື່ອງຢູ່ຕະຫຼາດເຊົ້າ ແລະ ຕອນຈະກັບເຮືອນ ມີແຜນຊື້ຊີ້ນໝູ ເພື່ອມາເຮັດແລງກີນ.
ຕະຫຼອດຊີວິດຂອງລາວ ລາວຄ້າຂາຍຢ່າງດຽວ ເປັນຜົນເຮັດໃຫ້ລາວມີເງິນຫຼາຍ ແຕ່ໃນທາງກົງ ກັນຂ້າມ ລາວພັດບໍ່ມີປະສົບປະການດ້ານອື່ນ.

ສະຫຼຸບ

ຄຳວ່າ “ຂ້າ” ແລະ “ຄ້າ” ການອອກສຽງແມ່ນໃກ້ຄຽງກັນ ແຕ່ຄວາມໝາຍແຕກຕ່າງກັນ ຄໍາວ່າ “ຂ້າ” ໝາຍເຖິງການປິດຊີວິດ ຫຼື ເຮັດໃຫ້ຕາຍ. ສ່ວນການ “ຄ້າ” ໝາຍເຖິງການແລກປ່ຽນສິນຄ້າ ຫຼື ການຊື້-ຂາຍ ນັ້ນເອງ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo