ຄວາມໝາຍຂອງຄຳເວົ້າທີ່ວ່າ ສາວໄສ້ໃຫ້ກາກິນ ໝາຍເຖິງຫຍັງ?
DooDiDo
ອະທິບາຍຄຳເວົ້າທີ່ວ່າ ສາວໄສ້ໃຫ້ກາກິນ ແລະ ເນື້ອໃນຂອງຄຳເວົ້ານີ້.
ໃນການໃຊ້ຊີວິດປະຈໍາວັນຂອງຄົນເຮົາມີຫຼາກຫຼາຍຮູບແບບທີ່ແຕກຕ່າງກັນອອກໄປ ແລະ ກໍ່ມີການສົນທະນາກ່ຽວກັບຫຼາຍໆບັນຫາທີ່ເກີດຂຶ້ນໃນຊີວິດປະຈໍາວັນ, ບາງກຸ່ມຄົນກໍ່ໃຫ້ຄວາມສົນໃຈທາງດ້ານເສດຖະກິດ-ການເມືອງ, ບາງກຸ່ມຄົນໃຫ້ຄວາມສໍາຄັນບັນຫາສຸຂະພາບ ແລະ ກໍ່ມີກຸ່ມຄົນຈໍານວນໜຶ່ງທີ່ມັກຈົ່ມຂວັນນິນທາກັນ, ມັກເອົາເລື່ອງຂອງຜູ້ອື່ນໄປເລົ່າຕໍ່ໆກັນ ໂດຍມີການເພີ້ມເຕີມເສີມແຕ່ງໃຫ້ມີອັດທະລົດທີ່ເຂັ້ມຂຸ້ນ ແລະ ໜ້າຟັງ ຈົນບິດເບືອນຈາກຄວາມເປັນຈິງ.
ເມື່ອເວົ້າເຖິງການນໍາໃຊ້ພາສາໃນແຕ່ລະບົດສົນທະນາມັນກໍ່ແຕກຕ່າງກັນອອກໄປ, ເຊິ່ງໃນພາສາລາວເຮົາໄດ້ມີຄໍາສຸພາສິດຫຼາຍໆຄໍາທີ່ໃຊ້ປຽບເປີຍການປະພຶດຂອງຄົນໃນແຕ່ລະປະເພດ, ເຊິ່ງຄົນສະໄໝແຕ່ກີ້ມັກຈະນໍາໃຊ້ຄໍາເຫຼົ່ານັ້ນເຂົ້າໄປໃນບົດເລື່ອງ, ບົດກອນ ແລະ ບົດຄວາມຕ່າໆ ເພື່ອໃຫ້ຜູ້ອ່ານໄດ້ຄົ້ນຄິດ ຊອກຫາຄວາມໝາຍທີ່ເຊື່ອງຊ້ອນຢູ່ໃນຄໍາສັບເຫຼົ່ານັ້ນ ເຊິ່ງມັນຖືວ່າເປັນສະເໜ່ຂອງການຂຽນບົດເລື່ອງເປັນຢ່າງດີ.
ເຊັ່ນຄໍາສຸພາສິດທີ່ວ່າ: “ສາວໄສ້ໃຫ້ກາກິນ” ຄໍາເວົ້າດັ່ງກ່າວບໍ່ໄດ້ແປຄວາມໝາຍຕາມໂຕ, ແນ່ນອນມັນບໍ່ໄດ້ ໝາຍຄວາມວ່າຄົນຈົກເອົາໄສ້ຂອງຕົນໃຫ້ໂຕກາກິນໂດຍແທ້ ແຕ່ມັນເປັນຄໍາເວົ້າທີ່ໃຊ້ປຽບເປີຍ ຫຼືປຽບທຽບໃສ່ການກະທໍາຂອງຄົນ ເຊິ່ງມີຄວາມໝາຍດັ່ງນີ້:
ສາວໄສ້
ໃຊ້ເປັນຄໍາກໍາມະ ມີຄວາມໝາຍວ່າ ເປີດເຜີຍຄວາມຊົ່ວ, ເປີດເຜີຍຄວາມລັບ ຫຼືຄວາມເສຍຫາຍອອກໝົດ.
ສາວໄສ້ໃຫ້ກາກິນ
ກໍໝາຍເຖິງການເອົາຄວາມລັບຂອງຕົນ ຫຼືຂອງຝ່າຍຕົນ ໄປເປີດເຜີຍໃຫ້ຜູ້ອື່ນ ຫຼືຝ່າຍກົງກັນຂ້າມຮູ້, ຊຶ່ງມີຄວາມໝາຍຄ້າຍຄືກັບຄໍາສຸພາສິດໜຶ່ງທີ່ວ່າ: ໄຟໃນຢ່ານໍາອອກ ໄຟນອກຢ່ານໍາເຂົ້າ.
ປຽບທຽບເຖິງການສາວໄສ້ໃຫ້ໂຕກາກິນ ຄົນທີ່ສາວໄສ້ ແລະ ຄົນຖືກສາວໄສ້ ກໍບໍ່ໄດ້ປະໂຫຍດອັນໃດ ມີແຕ່ໂຕກາ ທີ່ຢູ່ລ້າໆກໍ່ໄດ້ຮັບຜົນປະໂຫຍດ.
ຕົວຢ່າງ:
ເມື່ອຜົວເມຍຄູ່ໜຶ່ງຜິດກັນ ແລ້ວທັງສອງກໍ່ນໍາເອົາເລື່ອງລາວພາຍໃນຄອບຄົວໄປເລົ່າສູ່ຄົນພາຍນອກຟັງ ຕ່າງຄົນຕ່າງເວົ້າເລື່ອງທີ່ບໍ່ດີຂອງກັນໃຫ້ຜູ້ອື່ນຮັບຮູ້ ກໍ່ເໝືອນການສາວໄສ້ໃຫ້ໂຕກາກິນກິນ ມີແຕ່ເສຍກັບເສຍ.
ສະຫຼຸບ:
ສາວໄສ້ໃຫ້ກາກິນ ມີຄວາມໝາຍວ່າເອົາຄວາມລັບພາຍໃນ ໄປເປີດເຜີຍໃຫ້ຄົນພາຍນອກຮັບຮູ້ ຫຼື ການນໍາເອົາຄວາມບໍ່ດີຂອງຕົນໄປເລົ່າໃຫ້ຜູ້ອື່ນຟັງ ເຊິ່ງນອກຈາກບໍ່ເຮັດໃຫ້ເກີດຜົນປະໂຫຍດແລ້ວ ຍັງມີແຕ່ເສຍກັບເສຍ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
