ຂ່າວດີ! ຍີ່ປຸ່ນ ໃຫ້ການຊ່ວຍເຫຼືອມອບເຂົ້າ 627 ໂຕນ ແກ່ ສປປ ລາວ
ອົງການອາຫານໂລກ
ຍີ່ປຸ່ນ ຊ່ວຍເຫຼືອເຂົ້າໃຫ້ແກ່ ສປປ ລາວເປັນຈ່ຳນວນ ຫົກຮ້ອຍກວ່າໂຕນ.
ໃນຊ່ວງຕົ້ນປີນີ້ປະມານເດືອນ ກຸມພາຜ່ານມາ, ຍີ່ປຸ່ນ ໄດ້ມອບເງິນຊ່ວຍເຫຼືອຈໍານວນ 180 ລ້ານເຢນ ຫຼື ປະມານ 1,7 ລ້ານ ໂດລາ ເພື່ອຊ່ວຍເຫຼືອບັນເທົາຜົນກະທົບຈາກເຫດການ ຝົນຕົກໜັກ ແລະ ໄພນໍ້າຖ້ວມ ໃນເດືອນຕຸລາ 2020 ໃນແຂວງສະຫວັນນະເຂດ ແລະ ບັນດາແຂວງໃນພາກໃຕ້ຂອງ ສປປ ລາວ. ໂດຍການຊ່ວຍເຫຼືອຂອງ ລັດຖະບານ ແລະ ປະຊາຊົນຍີ່ປຸ່ນ.
ອົງການອາຫານໂລກ ໄດ້ຊື້ເຂົ້າຈໍານວນ 627 ໂຕນ ໃນຄັ້ງທໍາອິດ ໃຫ້ແກ່ຜູ້ໄດ້ຮັບຜົນປະໂຫຍດ ຈໍານວນ 35.000 ຄົນ ໃນ 65 ຊຸມຊົນ ໃນບັນດາແຂວງພາກກາງ ແລະ ພາກໃຕ້ ຂອງ ສປປ ລາວ. ເພື່ອຊ່ວຍເຫຼືອຟື້ນຟູຜົນກະທົບຈາກໄພພິບັດຂອງບັນດາຊຸມຊົນເຫຼົ່ານີ້, ອົງການອາຫານໂລກ ຈະໄດ້ໃຫ້ການຊ່ວຍເຫຼືອໃນການບູລະນະຟື້ນຟູ ພື້ນຖານໂຄງລ່າງດ້ານກະສິກໍາ ທີ່ໄດ້ຮັບຜົນກະທົບຈາກໄພນໍ້ຖ້ວມ.
ເຂົ້າສານຈໍານວນ 627 ໂຕນ ຊຶ່ງເປັນການຊ່ວຍເຫຼືອຈາກລັດຖະບານ ແລະ ປະຊາຊົນຍີ່ປຸ່ນ ໄດ້ຂົນສົ່ງມາຮອດ ສາງຂອງອົງການອາຫານໂລກທີ່ນະຄອນຫຼວງວຽງຈັນໃນວັນທີ 23 ສິງຫານີ້. ກະຊວງແຮງງານ ແລະ ສະຫວັດດີການສັງຄົມ, ສະຖານເອກອັກຄະລາຊະທູດແຫ່ງປະເທດຍີ່ປຸ່ນ ປະຈໍາ ສປປ ລາວ ແລະ ອົງການອາຫານໂລກໄດ້ເປັນຄູ່ຮ່ວມງານກັນເພື່ອໃຫ້ຄວາມຊ່ວຍເຫຼືອແກ່ບັນດາຊຸມຊົນຜູ້ທີ່ໄດ້ຮັບຜົນກະທົບຈາກການປ່ຽນແປງຂອງສະພາບດິນຟ້າອາກາດ.
ດ້ວຍການຊ່ວຍເຫຼືອເຂົ້າກິນ ແລະ ຊ່ວຍເຫຼືອໃນການກໍ່ສ້າງ ຫຼື ບູລະນະສ້ອມແປງ ພື້ນຖານໂຄງລ່າງ ຂອງຊຸມຊົນ ຊຶ່ງລວມມີ ພື້ນທີ່ກະສິກໍາ, ຊົນລະປະທານ ແລະ ຄອງລະບາຍນໍ້າ, ຖະໜົນຫົນທາງ ແລະ ໂຄງລ່າງພື້ນຖານອື່ນໆ ຂອງຊຸມຊົນ.
ສິ່ງຕ່າງໆເຫຼົ່ານີ້ ຈະຊ່ວຍໃຫ້ຊຸມຊົນຈະສາມາດຜະລິດໄດ້ຫຼາຍຂຶ້ນໃນອະນາຄົດ ແລະ ມີຄວາມສາມາດກຽມ ພ້ອມ ແລະ ຟື້ນຟູຜົນກະທົບຈາກໄພພິບັດ. ອົງການອາຫານໂລກ ຍັງຈະໄດ້ຈັດຝຶກອົບຮົມໃຫ້ ເພື່ອຊ່ວຍໃຫ້ບັນດາຊຸມຊົນ ສາມາດບໍລິຫານຈັດການ ໂຄງສ້າງຕ່າງໆເຫຼົ່ານີ້, ເພື່ອສ້າງລາຍຮັບໃຫ້ຫຼາຍຂຶ້ນ ແລະ ມີຄວາມກຽມພ້ອມ ສໍາລັບເຫດການທີ່ບໍ່ຄາດຄິດທີ່ຈະເກີດຂຶ້ນໃນອະນາຄົດ.
ທ່ານ ລີປາວ ຢ່າງ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ກ່າວວ່າ: “ສະພາບດິນຟ້າອາກາດໃນທົ່ວໂລກ ນັບມື້ນັບມີການປ່ຽນແປງຂຶ້ນເລື້ອຍໆ, ໂດຍສະເພາະຢູ່ ສປປ ລາວ ໄພພິບັດນໍ້າຖ້ວມ ຖືວ່າເປັນເຫດການໜຶ່ງທີ່ມັກເກີດຂຶ້ນເປັນປະຈໍາ ໃນລະຫວ່າງເດືອນກໍລະກົດ – ເດືອນຕຸລາ ຂອງທຸກໆປີ ຊຶ່ງໄດ້ສ້າງຄວາມເສຍຫາຍຕໍ່ພື້ນ ຖານໂຄ່ງລ່າງການຜະລິດຂອງປະຊາຊົນຈຳນວນຫຼວງຫຼາຍ.
ການຊ່ວຍເຫຼືອຂອງລັດຖະບານ ຍີ່ປຸ່ນ ໃນຄັ້ງນີ້, ຖືວ່າເປັນການຊ່ວຍເຫຼືອທີ່ມີມູນຄ່າສູງ ແລະ ມີຄວາມສຳຄັນຫຼາຍທີ່ສຸດ ຕໍໍ່ປະຊາຊົນລາວຜູ້ທີ່ໄດ້ຮັບຜົນກະທົບຈາກໄພພິບັດ ແລະ ຜູ້ທຸກຍາກ ທີ່ຈະມີຊີວິດການເປັນຢູ່ດີຂຶ້ນ”.
ທ່ານ ທາເກວະກະ ເຄໂຊ ເອກອັກຄະລາຊະທູດຍີ່ປຸ່ນ ປະຈຳ ສປປ ລາວ ກ່າວວ່າ: “ປະເທດລາວ ແລະ ປະເທດຍີ່ປຸ່ນ ໄດ້ຮັບຜົນກະທົບຈາກໄພພິບັດທໍາມະຊາດເປັນປະຈໍາ ເຊັ່ນວ່າ ໄພນໍ້າຖ້ວມ. ມັນມີຄວາມສໍາຄັນຫຼາຍໃຫ້ແກ່ພວກເຮົາທີ່ຈະຕ້ອງສ້າງຄວາມເຂັ້ມແຂງ ໃນການຜະລິດກະສິກໍາແບບຍືນຍົງຂອງຊຸມຊົນ.
ປະເທດຍີ່ປຸ່ນ, ໃນຖານະຄູ່ຮ່ວມງານຍຸດທະສາດຂອງ ສປປ ລາວ, ຈະສືບຕໍ່ໃຫ້ຄວາມຊ່ວຍເຫຼືອ ແກ່ລັດຖະບານ ແລະ ປະຊາຊົນລາວ ເພື່ອຜ່ານຜ່າ ສະຖານະການຄວາມຫຍຸ້ງຍາກນີ້ໄປພ້ອມໆກັນ ຄຽງຄູ່ກັບ ບັນດາຄູ່ຮ່ວມ ງານຕ່າງໆ ລວມທັງ ອົງການອາຫານໂລກ.” ທ່ານ ຢານ ເດລບາເຣີ ຕາງໜ້າອົງການອາຫານໂລກປະຈຳລາວ ກ່າວວ່າ: “ການປ່ຽແປງຂອງສະພາບດິນຟ້າອາກາດ ແມ່ນສິ່ງທ້າທາຍຕໍ່ເນື່ອງ ສໍາລັບທຸກໆປະເທດໃນໂລກ, ລວມທັງ ສປປ ລາວ ໂດຍສະເພາະແມ່ນກຸ່ມຄົນທີ່ມີຄວາມສ່ຽງ ຊຶ່ງຊີວິດຂອງພວກເຂົາຂຶ້ນກັບການຜະລິດກະສິກໍາ.
ໄພນໍ້າຖ້ວມ ຈະສ້າງຄວາມເສຍຫາຍໃຫ້ແກ່ບັນດາຊຸມຊົນນັບມື້ຮຸນແຮງຂຶ້ນ, ນອກຈາກນີ້ ຍັງມີຄວາມທ້າທາຍຕໍ່ການປ່ຽນແປງ ສະພາບດິນຟ້າອາກາດ ຊຶ່ງການຊ່ວຍເຫຼືອຂອງຍີ່ປຸ່ນໃນຄັ້ງນີ້ ແມ່ນເພື່ອຊ່ວຍໃຫ້ສາມາດຂ້າມຜ່ານ ການຂາດແຄນອາຫານ ສໍາລັບບັນດາຊຸມຊົນທີ່ໄດ້ຮັບຜົນກະທົບຈາກໄພນໍ້າຖ້ວມ, ນອກຈາກນີ້ ຍັງເປັນການຊ່ວຍໃຫ້ພວກເຂົາມີຄວາມສາມາດຟື້ນຟູໃນໄລຍະຍາວ ຊຶ່ງສາມາດເຮັດໃຫ້ທຸກໆຄົນມີອະນາຄົດທີ່ດີຂຶ້ນ.”
ຂອບໃຈແຫລ່ງທີ່ມາ: ອົງການອາຫານໂລກ.
