ຂ່າວດີ! ລາວ- ເກົາຫລີ ຫາລືຊຸກຍູ້ການຄ້າ ການລົງທຶນ ແລະ ການທ່ອງທ່ຽວ
ກອງປະຊຸມ ຫາລືຊຸກຍູ້ການຄ້າ ການລົງທຶນ ແລະ ການທ່ອງທ່ຽວລະຫວ່າງ ສປປ ລາວ ແລະ ສ.ເກົາຫລີ
ທ່ານດາວວອນ ພະຈັນທະວົງ ຮອງປະທານສະມາຄົມມິດຕະພາບລາວ-ສ.ເກົາຫລີ ທັງເປັນຮອງປະທານສະພາການຄ້າ ແລະ ອຸດສາຫະກຳແຫ່ງຊາດ ພ້ອມດ້ວຍຄະນະ ໄດ້ພົບປະກັບ ທ່ານ ລີ ຊັງ ແບ ຜູ້ຈັດການໃຫຍ່, ທີມສົ່ງເສີມສະໜັບສະໜູນສາກົນ ສະມາຄົມທຸລະກິດຮ່ວມທຶນ ສ. ເກົາຫລີ ພ້ອມດ້ວຍຄະນະໃນວັນທີ 24 ມີຖຸນາ 2022 ທີ່ສຳນັກງານຄະນະພົວພັນຕ່າງປະເທດສູນກາງພັກ(ໜອງບອນ), ນະຄອນຫລວງວຽງຈັນ
ໂດຍ 2 ຝ່າຍໄດ້ແລກປ່ຽນຄວາມຄິດຄວາມເຫັນ ແລະ ປຶກສາຫາລື ເພື່ອຊອກຫາຊ່ອງທາງຊຸກຍູ້ການຮ່ວມມືທາງດ້ານເສດຖະກິດກໍ່ຄືດ້ານການຄ້າ, ການລົງທຶນ ແລະ ການທ່ອງທ່ຽວລະຫວ່າງສອງປະເທດ ລາວ ແລະ ສ. ເກົາຫລີ ຜ່ານຊ່ອງທາງການທູດປະຊາຊົນ.
ການພົບປະກັນຄັ້ງນີ້ ໂດຍຝ່າຍລາວໄດ້ແຈ້ງໃຫ້ຄູ່ພົບປະຊາບ ກ່ຽວກັບຂົງເຂດ ແລະ ຂະແໜງການຕ່າງໆຂອງ ສປປ ລາວ ທີ່ມີທ່າ ແຮງ ແລະ ຕ້ອງການການລົງທຶນ.
ສ່ວນສະມາຄົມທຸລະກິດຮ່ວມທຶນ ສ.ເກົາຫລີ ເປັນສະມາຄົມທີ່ເຕົ້າໂຮມ ແລະ ສົ່ງເສີມທຸລະກິດຂະໜາດນ້ອຍ ແລະ ຂະໜາດກາງ (SMEs) ທີ່ສ້າງຕັ້ງຂຶ້ນໃນປີ 1995, ປັດຈຸບັນມີສະມາຊິກທັງໝົດ 16.700 ບໍລິສັດ ທີ່ດໍາເນີນທຸລະກິດຢູ່ໃນ 5 ຂະແໜງອຸດສາຫະກໍາ ຄື:
ຜະລິດສິນຄ້າ, ຊັອຟແວ, ໄອຊີທີ, ໄບໂອເຕັກໂນໂລຊີ ແລະ ອິນເຕີເນັດ ທີ່ມີສາຂາຈໍານວນ 86 ແຫ່ງ ຢູ່ 49 ປະເທດ. ຄະນະນັກທຸລະກິດສ.ເກົາຫລີ ທີ່ເດີນທາງມາສຶກສາຄວາມເປັນໄປໄດ້ ໃນການລົງທຶນຢູ່ ສປປ ລາວ ໃນຄັ້ງນີ້ ປະກອບດ້ວຍ 4 ບໍ ລິສັດຄື:
ບໍລິສັດ ມອນແຄ (MoldCare), ບໍລິສັດ ຢູຟິດ(U-fit), ບໍລິສັດ ດີບວີເຊິນ(Deepvisions) ແລະ ບໍລິສັດ ສະຕໍຄາມີຣາ(Store Camera) ທີ່ດໍາເນີນທຸລະກິດກ່ຽວກັບໄອທີ, ເຕັກໂນໂລຊີຂໍ້ມູນຂ່າວສານ, ການຄ້າຂາຍອອນລາຍ.
ການພົບປະໃນເທື່ອນີ້ ແມ່ນມີຜົນສືບເນື່ອງມາຈາກການພົບປະກັນລະຫວ່າງ 2 ສະມາຄົມມິດຕະພາບ ໃນທ້າຍເດືອນເມສາ 2022 ທີ່ນະຄອນຫລວງວຽງຈັນ ເຊິ່ງໄດ້ເຫັນດີໃນການຊຸກຍູ້ ແລະ ສະໜັບສະໜູນການພົວພັນຮ່ວມມືທາງດ້ານການຄ້າ ແລະ ການລົງທຶນ ລະ ຫວ່າງນັກທຸລະກິດຂອງສອງປະເທດ.
ສອງສະມາຄົມມິດຕະພາບ ໄດ້ພະຍາຍາມຮ່ວມກັນໃນການສະໜັບສະໜູນ ແລະ ຊຸກຍູ້ການພົວພັນຮ່ວມມື ທີ່ດີໃນຜ່ານມາຂອງຂະແໜງການຕ່າງໆຂອງ 2 ປະເທດຕາມພາລະບົດບາດ ແລະ ຄວາມສາມາດຕົວຈິງ ເຊິ່ງໃນໄລຍະຜ່ານມາສະມາຄົມມິດຕະພາບ ລາວ-ສ.ເກົາຫລີ ແລະ ສ.ເກົາຫລີ-ລາວ ໄດ້ຮ່ວມກັນລະດົມທຶນເພື່ອມາປະກອບສ່ວນເຂົ້າໃນການ ສ້າງສາພັດທະນາສປປ ລາວ
ໂດຍສະເພາະແມ່ນການລະດົມທຶນເຂົ້າໃນການ ພັດທະນາພື້ນຖານໂຄງລ່າງດ້ານການສຶກສາ, ສາທາລະນະສຸກ, ວັດທະນະທຳ-ສັງຄົມ ເປັນຕົ້ນສະໜັບສະໜູນສ້າງໂຮງຮຽນ, ສະໜັບສະໜູນເຄື່ອງນຸ່ງ, ເກີບ, ຢາປົວພະຍາດ, ອຸປະກອນການແພດຕ້ານໂຄວິດ-19 ແລະ ອື່ນໆ. ອັນພົ້ນເດັ່ນແມ່ນສອງສະມາຄົມມິດຕະພາບ ລາວ-ສ.ເກົາຫລີ ແລະ ສະມາຄົມມິດຕະພາບ ສ.ເກົາຫລີ-ລາວ ໄດ້ເປັນເຈົ້າການຊຸກຍູ້ ແລະ ສະໜັບສະໜູນການໄປມາຫາສູູ່ກັນລະຫວ່າງປະຊາຊົນ ກໍຄືດ້ານການທ່ອງທ່ຽວ ລະຫວ່າງສອງປະເທດໂດຍສະເພາະແມ່ນການເປີດຖ້ຽວບິນໂດຍກົງ ລະຫວ່າງສອງປະເທດໃນປີ 2022.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫຼ່ງຂໍ້ມູນຈາກ: ຂປລ