ຂວງ ແລະ ຄວງ ມີຄວາມໝາຍຄືກັນ ແລະ ຕ່າງກັນແນວໃດ?
DooDiDo
ຂວງ ແລະ ຄວງ ສອງຄໍານີ້ໃຊ້ແນວໃດ? ຄວາມໝາຍຄືກັນ ຫຼື ຕ່າງກັນ?
ຍ້ອນຄວາມອຸດົມສົມບູນຂອງພາສາລາວ ທີ່ມີຫຼາຍຄໍາສັບຂຽນຕ່າງກັນ, ອ່ານຕ່າງກັນ ແຕ່ຄວາມໝາຍຄືກັນສາມາດໃຊ້ແທນກັນໄດ້ ແລະ ມີຫຼາຍຄໍາທີ່ອ່ານຄ້າຍຄືກັນ, ຂຽນຄ້າຍຄືກັນ ແຕ່ມີຄວາມໝາຍແຕກຕ່າງກັນໃຊ້ແທນກັນບໍ່ໄດ້ ຖ້າໃຊ້ບໍ່ຖືກ ຄວາມໝາຍກໍ່ປ່ຽນ ແລະ ຫຼາຍຄັ້ງເຮົາກໍ່ມັກເຫັນການໃຊ້ຄໍາສັບທີ່ບໍ່ຖືກຕ້ອງໃນບົດຂຽນຕ່າງໆ.
ດ້ວຍເຫດນັ້ນ ເຮົາຈຶ່ງນໍາເອົາບົດຄວາມທີ່ເປັນການອະທິບາຍຄວາມໝາຍສັບໃນພາສາລາວມາແບ່ງປັນກັບໝູ່ເພື່ອນ ເພື່ອຮຽນຮູ້ພາສາລາວໄປນໍາກັນ, ເຊິ່ງຕອນນີ້ເຮົາຈະມາເວົ້າກ່ຽວກັບຄວາມໝາຍຂອງຄໍາວ່າ ຂວງ ແລະ ຄວງ, ຟັງແບບຜິວເຜີນ ສອງຄໍານີ້ອອກສຽງຄ້າຍຄືກັນ, ແຕ່ໃນຄວາມເປັນຈິງແລ້ວ ມັນມີຄວາມໝາຍທີ່ແຕກຕ່າງກັນ. ມັນແຕກຕ່າງກັນຄືແນວໃດ ເຮົາມາຮຽນຮູ້ໄປນໍາກັນ.
ອີງຕາມຂໍ້ມູນຈາກວັດຈະນານຸກົມພາສາລາວ ສະບັບລົງວັນທີ…… ທີ່ ຄົ້ນຄວ້າ ແລະ ຮຽບຮຽງ ໂດຍ ທອງຄຳ ອ່ອນມະນີສອນ, ໄດ້ອະທິບາຍຄວາມໝາຍສອງຄໍາສັບດັ່ງກ່າວ ໄວ້ດັ່ງນີ້:
ຄຳວ່າ ຂວງ.
ເປັນທັງຄໍານາມ ແລະ ຄໍາຄຸນນາມ.
ຂວງ (ຄຳນາມ) ເປັນຊື່ຜັກແນວໜຶ່ງເກີດຂຶ້ນປູໄປຕາມພື້ນດິນ ເອີ້ນວ່າ ຜັກຂວງ, ຜັກຂວງຂົມ ຫຼື ຜັກດາງຂົມ.
ຂວງ (ຄໍາຄຸນນາມ) ໝາຍເຖິງ ບໍ່ຈະເລີນ, ຈັງໄຮ, ສິ່ງທີ່ນຳຄວາມຈິບຫາຍມາໃຫ້ເອີ້ນວ່າ: ຂວງ, ເຂັດຂວງ.
ຕົວຢ່າງ:
ບໍ່ຊ່ວຍທໍາມາຫາກິນ ແລ້ວຍັງເຜົາຜານເງິນພໍ່ແມ່ອີກ, ຈັ່ງແມ່ນຂວງແທ້ໆ.
ພວກສໍ້ລາດບັງຫຼວງຈັ່ງແມ່ນຂວງຕໍ່ການພັດທະນາປະເທດຊາດ.
ຄຳວ່າ ຄວງ.
ເປັນທັງຄໍານາມ, ຄໍາມະ ແລະ ຄໍາຄຸນນາມ
ຖ້າເປັນຄຳນາມ ຄວງ ແມ່ນເຫຼັກ ຫຼື ໄມ້ມີກຽວຫັນໄດ້ ໃຊ້ສຳລັບເຈາະໄມ້ ເອີ້ນວ່າ: ເຫຼັກໄຂຄວງ
ຖ້າເປັນຄໍາກຳມະ ຄວງ ແມ່ນການເອົາເຫຼັກທີ່ມີຄົນຜຸນໃຫ້ເປັນຮູ ເອີ້ນວ່າ: ຄວງ,
ແລະ ຍັງໝາຍເຖິງການຊວນໄປແອ່ວ ຫຼື ຊວນໄປຫຼິ້ນ ເອີ້ນວ່າ: ຄວງກັນໄປຫຼິ້ນ.
ຖ້າເປັນຄຳຄຸນນາມ ຄວງ ໝາຍເຖິງ ສະຫວ່າງ, ແຈ້ງ (ຕາເວັນຄວງ), ສຽງກ້ອງ, ກ້ອງສະໜັ່ນ
ສະຫຼຸບ.
ຄໍາວ່າ ຂວງ ເປັນທັງຄໍານາມ ແລະ ຄໍາຄຸນນາມ ເປັນຊື່ເອີ້ນຂອງຜັກຊະນິດໜຶ່ງ ແລະ ໝາຍເຖິງຄວາມບໍ່ຈະເລີນ; ສ່ວນ ຄວງ ເປັນທັງ ຄໍານາມ, ຄໍາມະ ແລະ ຄໍາຄຸນນາມ ແປໄດ້ຫຼາຍຢ່າງເຊັ່ນ: ເຫຼັກໄຂຄວງ, ຄວງກັນໄປຫຼິ້ນ ແລະ ສະຫວ່າງ ການນໍາໃຊ້ຄໍານີ້ຈະມີຄວາມໝາຍແນວໃດແມ່ນຂຶ້ນກັບຮູບໂຄງສ້າງຂອງປະໂຫຍກ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
