ເມືອງຮ້ຽມ ແຂວງຫົວພັນວາງແຜນພັດທະນາແຫຼ່ງທ່ອງທ່ຽວຕາດລຸນ.

ວັນທີ 2 ກໍລະກົດ 2021 ທີ່ຜ່ານມາ ເມືອງຮ້ຽມ ແຂວງຫົວພັນໄດ້ຈັດຂຶ້ນໃນກອງປະຊຸມ ຜ່ານແຜນພັດທະນາແຫຼ່ງທ່ອງທ່ຽວຕາດລຸນ ໂດຍການເຂົ້າຮ່ວມຂອງ ທ່ານ ໄຫວທອງ ບຸນມະນີວັນ ຮອງເລຂາພັກເມືອງ, ທ່ານ ພູວັນ ເພັດມີໄຊ ຮອງຫົວໜ້າ ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງຫົວພັນ ພ້ອມດ້ວຍຄະນະຮັບຜິດຊອບຂຽນແຜນຂັ້ນແຂວງ, ຂັ້ນເມືອງ, ຂັ້ນບ້ານ ແລະ ຫ້ອງການທີ່ກ່ຽວຂ້ອງເຂົ້າຮ່ວມ.

ແຫຼ່ງທ່ອງທ່ຽວຕາດລຸນ ບ້ານ ແທນຮີ້ງ ເມືອງຮ້ຽມ ແຂວງຫົວພັນ ຕັ້ງຢູ່ຫ່າງຈາກເທດສະບານເມືອງປະມານ 4 ກິໂລແມັດມີເສັ້ນທາງເຂົ້າເຖິງເປັນທາງດິນແດງ, ເປັນແຫຼ່ງທ່ອງທ່ຽວທຳມະຊາດທີ່ໂດດເດັ່ນອັນດັບຕົ້ນໆຂອງເມືອງຮ້ຽມ, ມີຫີນສວຍງາມຫຼາຍຊັ້ນ, ຫຼາຍພັກໃຫ້ນັກທ່ອງທ່ຽວສາມາດເລືອກທ່ຽວຊົມໄດ້, ບາງບ່ອນເປັນນ້ຳໃສໄຫຼຜ່ານພະລານຫີນ, ບາງບ່ອນເປັນວັງນ້ຳ, ຕາດບາງບ່ອນເປັນຕາດທີ່ມີຄວາມສູງປະມານ 10-20ແມັດ.

ກອງປະຊຸມຄັ້ງນີ້ໄດ້ຍົກໃຫ້ເຫັນ ສະພາບທົ່ວໄປຂອງແຫຼ່ງທ່ອງທ່ຽວ, ວິເຄາະສະພາບພາຍໃນ ແລະ ພາຍນອກ, ຈຸດດີ, ຈຸດອ່ອນ, ໂອກາດ, ສິ່ງທ້າທາຍ ແລະ ໄດ້ກຳນົດກິດຈະກຳການທ່ອງທ່ຽວພາຍໃນແຫຼ່ງທ່ອງທ່ຽວເຊິ່ງມີ: ຈຸດອາບນ້ຳທຳມະຊາດ, ກິນເຂົ້າປ່າ, ຈຸດຖ່າຍຮູບ, ຢ້ຽມຊົມເຂື່ອນເພື່ອເປັນແຫຼ່ງຮຽນຮູ້ຂອງນ້ອງນັກຮຽນ ກ່ຽວກັບການຜະລິດພະລັງງານໄຟຟ້າ, ຂີ່ກົງເບັງ ແລະ ຂີ່ເປັດເທິງໜ້າເຂື່ອນ, ຂີ່ໂອ່ນຊາ, ເປັນແຫຼ່ງຮຽນຮູ້ການເຮັດນາຕາມລະດູການສຳລັບນັກທ່ອງທ່ຽວ, ຂີ່ລົດຖີບແບບພະຈົນໄພ, ແຜນພັດທະນາຕາດລຸນມີທັງໝົດ 6 ແຜນງານ ແລະ 26 ໂຄງການ. ຈາກນັ້ນໄດ້ຍັງໄດ້ພ້ອມກັນປະກອບຄຳຄິດຄຳເຫັນເພື່ອເຮັດໃຫ້ຮ່າງແຜນພັດທະນາແຫຼ່ງທ່ອງທ່ຽວຕາດລຸນມີເນື້ອໃນຄົບຖ້ວນສົມບູນ.

ຈຸດປະສົງ ກໍເພື່ອສ້າງສິ່ງອຳນາວຍຄວາມສະດວກ ແລະ ຮອງຮັບນັກທ່ອງທ່ຽວ, ເຮັດໃຫ້ແຫຼ່ງທ່ອງທ່ຽວຕາດລຸນກາຍເປັນແຫຼ່ງທ່ອງທ່ຽວທຳມະຊາດ, ຕິດພັນກັບເຄື່ອນໄຟຟ້າທີ່ດຶງດູດຄວາມສົນໃຈຂອງນັກທ່ອງທ່ຽວພາຍໃນ ແລະ ຕ່າງປະເທດ, ເປັນການພັດທະນາກິດຈະກຳທີຫຼາກຫຼາຍ ແລະ ມີຄວາມຍືນຍົງ ຕິດພັນກັບການອະນຸລັກສິ່ງແວດລ້ອມ ແລະ ສົ່ງເສີມການທ່ອງທ່ຽວພາຍໃນສ້າງເງື່ອນໄຂໃຫ້ບ້ານໃກ້ຄຽງກໍຄືເມືອງຮ້ຽມມີລາຍຮັບຈາກການທ່ອງທ່ຽວນັບມື້ເພີ່ມຂື້ນ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo

ຂອບໃຈແຫລ່ງທີ່ມາ: medialaos.com