ປັດຈຸບັນແມ່ນກຳລັງເລັ່ງດຳ​ເນີນການກໍ່ສ້າງ ຕາມແຜນແມ່ນເດືອນມັງກອນ ຫາ ເດືອນມິຖຸນາ ແມ່ນໃຫ້ສຳເລັດການກໍ່ສ້າງຕຶກອາຄານ ຊຶ່ງໃນເດືອນມິຖຸນາຫາເດືອນຕຸລາ ແມ່ນດຳເນີນການຕິດຕັ້ງວຽກລະບົບ, ສິ່ງອຳນວຍຄວາມສະດວກຕ່າງໆ ແລະ ປັດຈຸບັນພວມເລັ່ງການຕິດຕັ້ງລະບົບຈາລະຈອນທາງອາກາດ ໂດຍມີການເອົາຈຸດທີ່ຕັ້ງໃຫ້ສຳເລັດ ແລະ ນຳເຂົ້າອຸປະກອນຈຳນວນໜຶ່ງທີ່ຈຳເປັນ ເປັນຕົ້ນແມ່ນວິທະຍຸການບິນ-ການສື່ສານ ຊຶ່ງແຜນການຈັດຊື້ອຸປະກອນແມ່ນໃຫ້ສຳເລັດໃນເດືອນກໍລະກົດ ແລະ ໃຫ້ໄດ້ດຳເນີນການຕິດຕັ້ງໃນເດືອນສິງຫາ ແລະ ກັນຍາ, ຫຼັງຈາກນັ້ນກໍຈະມີການກວດສອບລະບົບ ແລະ ຕາມແຜນປະມານເດືອນພະຈິກ ຈະມີການທົດລອງບິນຊົ່ວຄາວ; ວຽກຈາລະຈອນທາງອາກາດເປັນວຽກທີ່ສຳຄັນຫຼາຍ ຊຶ່ງປຽບສະເໝືອນໝາກຫົວໃຈຂອງສະໝາມບິນ ຊຶ່ງຈະຕ້ອງມີລະບົບດັ່ງ​ກ່າວ​ນີ້, ຫຼັງຈາກຕິດຕັ້ງລະບົບແລ້ວ ຈຶ່ງສາມາດທົດລອງບິນໄດ້.

​ສຳ​ລັບ ເນື້ອທີ່ຂອງໂຄງການກໍ່ສ້າງສະໜາມບິນສາກົນບໍ່ແກ້ວແມ່ນປະມານ 300 ເຮັກຕາ ໂດຍນອນຢູ່ໃນເຂດດິນສຳປະທານຂອງກຸ່ມບໍລິສັດດອກງິ້ວຄຳ ຊຶ່ງເປັນດິນກະສິກຳທີ່ໄດ້ຊື້ນໍ​າປະຊາຊົນ ເພື່ອມາພັດທະນາ ງົບປະມານຂອງການກໍ່ສ້າງໂຄງການນີ້ແມ່ນ 175 ລ້ານໂດລາ ໂດຍແມ່ນທຶນຂອງບໍລິສັດເກຣເຕີເບ ຊຶ່ງເປັນບໍລິສັດທີ່ນອນຢູ່ໃນກຸ່ມບໍລິສັດດອກງິ້ວຄຳ ມີໄລຍະການສຳປະທານ 50 ປີ, ພາຍຫຼັງໝົດສັນຍາການສຳປະທານແລ້ວແມ່ນຈະມອບໃຫ້ລັດ​ຖະ​ບານ​ລາວເປັນຜູ້ຄຸ້ມຄອງຕໍ່​ໄປ.