ສະມາຄົມລາວ-ໄທ ມອບອຸປະກອນການແພດ ໃຫ້ແກ່ ສປປ ລາວ

ສະມາຄົມລາວ-ໄທ ມອບອຸປະກອນການແພດ ຈັດ​ການ​ໂຄວິດ-19 ໃຫ້ແກ່ ສປປ ລາວ.

ຈາກ​ການ​ລະ​ບາດ​ຂອງ​ໂຄວິດ-19 ຢ່າງ​ຕໍ່​ເນືອງ​ໃນ​ຫລາຍໆ​ປະ​ເທດ ແລະ ຍັງ​ມີ​ແນວ​ໂນ້ມ​ທີ່​ຈະ​ລະ​ບາດ​ຕໍ່​ໄປ​ອີກ​ດົນ​ເຕີບ, ເຮັດ​ໃຫ້​ການ​ເດີນ​ທາງ​ຕ່າງໆ​ພົບ​ຂໍ້​ຫຍຸ້ງ​ຍາກ, ເສດ​ຖະ​ກິດ​ບໍ່​ຟື້ນ​ຕົວ ຫລາຍໆ​ທຸ​ລະ​ກິດ​ໄດ້​ປິດ​ຕົວ​ລົງ ບາງ​ໂຮງ​ຈັກ​ໂຮງ​ງານ​ກໍ​ຕ້ອງ​ໄດ້​ປົດ​ພະ​ນັກ​ງານ​ອອກ​ເພື່ອ​ສະ​ພາບ​ຄ່ອງ​ອື່ນໆ.

ໃນ​ຫວ່າງ​ບໍ່​ດົນ​ມາ​ນີ້ ສະຖານເອກອັກຄະຣາຊະທູດໄທ ປະຈຳ ສປປ ລາວ ເປັນຕົວແທນສະມາຄົມໄທ – ລາວ ເພື່ອມິດຕະພາບ ຈັດພິທີສົ່ງມອບອຸປະກອນທາງການແພດ ມູນຄ່າ 1,285,000 ບາດ ໃຫ້ແກ່ລັດຖະບານ ສປປ ລາວ ເພື່ອເປັນການຈຳ​ກັດ ແລະ ປ້ອງກັນການແຜ່ລະບາດຂອງພະຍາດໂຄວິດ-19 ບໍ່​ໃຫ້​ຕ້ອງ​ແຜລາມ​ເປັນ​ວົງ​ກ້​ວາງ.

ພ້ອມທັງເປັນສ່ວນໜຶ່ງຂອງການສະເຫຼີມສະຫຼອງໂອກາດວັນຄົບຮອບ 70 ປີຂອງການພົວພັນທາງການທູດ ໄທ – ລາວ ໃນປີ 2020.ສະມາຄົມໄທ – ລາວ ເພື່ອມິດຕະພາບ ໄດ້ຈັດພິທີສົ່ງມອບອຸປະກອນທາງການແພດ ເພື່ອປ້ອງກັນການແຜ່ລະບາດຂອງພະຍາດໂຄວິດ-19 ໃຫ້ແກ່ລັດຖະບານ ສປປ ລາວ.

ອຸປະກອນທາງການແພດດັ່ງກ່າວ, ປະກອບດ້ວຍຕູ້ກວດເຊື້ອໄວຣັດໂຄໂຣນາ 2019 ແບບຄວາມດັນບວກ ຈຳນວນ 4 ຕູ້, ເຄື່ອງວັດອຸນຫະພູມແບບອັດຕະໂນມັດ ຈຳນວນ 4 ເຄື່ອງ ແລະ ເຄື່ອງຊ່ວຍຫາຍໃຈແບບສຸກເສີນຈຳນວນ 10 ເຄື່ອງ ແລະ ຊຸດສຳລັບເຮັດແຂ້ວ ຫຼື ຝ່າຕັດ 5 ຊຸດ.

ຊຶ່ງຜະລິດໂດຍສະຖາບັນເຕັກໂນໂລຊີພະຈອມເກົ້າເຈົ້າຄຸນທະຫານລາດກະບັງ ລວມມູນຄ່າ 1,285,000 ບາດ. ການມອບອຸປະກອນທາງການແພດໃນຄັ້ງນີ້, ເປັນການສະແດງອອກເຖິງໄມຕີຈິດ ແລະ ຄວາມຜູກພັນຫ່ວງໃຍຈາກປະຊາຊົນຊາວໄທ ຊຶ່ງຈະຊ່ວຍສະໜັບສະໜູນການເພີ່ມສັກກາຍະພາບລະບົບສາທາລະນະສຸກຂອງ ສປປ ລາວ ແລະ ເປັນການຮ່ວມມືໄທ – ລາວ ເພື່ອຮ່ວມກັນປ້ອງການແຜ່ລະບາດຂອງພະຍາດໂຄວິດ-19 ໃນ ສປປ ລາວ.

ອີກທັງ, ຍັງເປັນສ່ວນໜຶ່ງຂອງການສະເຫຼີມສະຫຼອງໂອກາດຄົບຮອບ 70 ປີ ຂອງການພົວພັນທາງການທູດໄທ – ສປປ ລາວ ທີ່ຈະຄົບຮອບໃນວັນທີ 19 ທັນວາ 2020 ຊຶ່ງທັງສອງຝ່າຍຈະຈັດກິດຈະກຳສະເຫຼີມສະຫຼອງຮ່ວມກັນຕະຫຼອດປີ 2020 – 2021 ດ້ວຍ.

ຕິດຕາມ​ຂ່າວການ​ເຄືອນ​ໄຫວທັນ​​ເຫດ​ການ ເລື່ອງທຸ​ລະ​ກິດ ແລະ​ ເຫດ​ການ​ຕ່າງໆ ​ທີ່​ໜ້າ​ສົນ​ໃຈໃນ​ລາວ​ໄດ້​ທີ່​ DooDiDo

ຂອບ​ໃຈແຫຼ່ງຂໍ້ມູນຈາກ: lao youth radio