ສະກົດໃຫ້ຖືກຄຳວ່າ ອົກຫັກ ແລະ ອົກຮັກ ມີຄວາມໝາຍຕ່າງກັນ.
DooDiDo
ຄວາມໝາຍຂອງຄຳວ່າ ອົກຫັກ ແລະ ອົກຮັກ ແຕກຕ່າງກັນແນວໃດ?
ທຸກມື້ນີ້ຄົນສ່ວນຫລາຍໃຊ້ຊິວິດຢູ່ກັບສັງຄົມສື່ອອນລາຍຫລາຍ, ແລະ ສື່ສັງຄົມຕ່າງໆນັ້ນກໍເປັນບ່ອນລະບາຍອາລົມທີ່ດີ ບໍ່ວ່າຈະເປັນການໂພສຮູບກ່ຳລັງມີຄວາມສຸກພ້ອມແຄບຊັນຫລູໆ, ບໍ່ວ່າຈະເປັນການໂພສຂໍ້ຄວາມລະບາຍຄວາມໃນໃຈຕ່າງໆ, ເພາະເຫັນວ່າມີຫລາຍໆຄົນທີ່ບໍ່ກ້າທີຈະເວົ້າເຊິງໜ້າແຕ່ກໍຍັງຢາກເວົ້າໃຫ້ຄົນອື່ນໄດ້ຮັບຮູ້ນີ້ກໍເປັນອີກທາງໜຶ່ງໃນການສື່ສານອອກໄປ ແລະ ກໍໄປເຖິງເປົ້າໝາຍດັ່ງທີ່ຕ້ອງການ.
ການລະບາຍຕ່າງໆຂອງຄົນສ່ວນຫລາຍໃນສື່ສັງຄົມອອນລາຍເຫັນວ່າຍັງມີການສະກົດຄຳ ແລະ ຄວາມໝາຍໃນພາສາລາວບໍ່ຖືກຫລາຍ, ໄວລຸ້ນຂື້ນໃໝ່ ຫລື ຫນຸ່ມໆສາວໆກໍຈະໂພສລັກສະນະໃນຄວາມຮັກຕ່າງໆການເສຍໃຈອົກຫັກຕ່າງໆ, ໃນຕອນນີ້ກໍເລີຍຈະຍົກເອົາຄໍາວ່າ: ອົກຫັກ ແລະ ອົກຮັກ ມາອະທິບາຍ ເຊິງສອງຄໍານີ້ເຫັນວ່າມີຫລາຍຄົນຂຽນຜິດເພາະການທີ່ຈະໃຊ້ກັບຄວາມເສຍໃຈບໍ່ສົມຫວັງກັບຄວາມຮັກເຮົາຕ້ອງເບິ່ງຄວາມໝາຍຂອງຄຳໃຫ້ດີເສຍກ່ອນກ່ອນຈະຂຽນລົງໄປຕໍ່ສາທາລະນະເພື່ອການຂຽນທີ່ຖືກຫລັກໄວຍາກອນ ແລະ ຈະບໍ່ເປັນການເຂົ້າໃຈຜິດອີກ.
ອົກ ເປັນຄຳນາມໝາຍເຖິງ ຈິດໃຈ ທີ່ເປັນຄວາມຮູ້ສຶກ ເປັນນາມທຳ.
ຫັກ ເປັນກຳມະ ໝາຍເຖິງ ແຕກອອກຈາກກັນ, ຂາດອອກຈາກກັນ, ສະພາບແຕກທົບ, ສະພາບທີ່ເກືອບຂາດອອກຈາກກັນ…. ເຊິ່ງມັນສາມາດໃຊ້ໄດ້ທັງຮູບທຳ ແລະນາມທຳ.
ຮັກ ເປັນກຳມະ ໝາຍເຖິງ ຄວາມຮູ້ສຶກຕໍ່ສິ່ງໃດໜຶ່ງໃນທາງດີ, ຮູ້ສຶກດີ ແລະຢາກທະນຸຖະໜອມຕໍ່ສິ່ງໜຶ່ງ…
ຄຳວ່າ ອົກຫັກ.
ໝາຍເຖິງ ຈິດໃຈພວມແຕກຫັກ (ແຕກຫັກທາງຄວາມຮູ້ສຶກ ກໍຄືຄວາມຜິດຫວັງ, ຄວາມບໍ່ສົມຫວັງ, ຄວາມຮູ້ສຶກເຈັບປວດ)
ຕົວຢ່າງ:
ຂ້ອຍອົກຫັກ ແລະ ເສຍໃຈຫລາຍ, ແຟນຂ້ອຍລາວໜີໄປຢູ່ກັບຄົນອື່ນແລ້ວ.
ອົກຫັກບໍ່ຕາຍດອກ, ຈັ່ງໃດກໍຍັງມີລົມຫາຍໃຈຢູ່ຕໍ່ໄປ.
ຄໍາວ່າ ອົກຮັກ
ໝາຍເຖິງ ຈິດໃຈພວມມີຮັກ, ຄວາມຮູ້ສຶກຮັກ, ໃຈມີຄວາມຮັກ (ຍັງບໍ່ທັນຮູ້ວ່າສົມຫວັງ ຫຼື ຜິດຫວັງ), ເຊິງຫລາຍໆຄົນມັກຫລົງຂຽນໃນກໍລະນີທີ່ບໍ່ສົມຫວັງກັບຄວາມຮັກຖືກວ່າເປັນການສະກົດຜິດ.
ສະຫຼຸບ.
ຄໍາວ່າ ອົກຫັກ ໝາຍເຖິງ ຈິດໃຈພວມແຕກຫັກ (ແຕກຫັກທາງຄວາມຮູ້ສຶກ ກໍຄືຄວາມຜິດຫວັງ, ຄວາມບໍ່ສົມຫວັງ, ຄວາມຮູ້ສຶກເຈັບປວດ).
ສ່ວນຄໍາວ່າ ອົກຮັກ ໝາຍເຖິງ ຈິດໃຈພວມມີຮັກ, ຄວາມຮູ້ສຶກຮັກ, ໃຈມີຄວາມຮັກ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
