ມາຮູ້ຈັກກັບອີກສະຖານທີ່ປະຫວັດສາດ ຖ້ຳປິວ ເມືອງຄຳ, ແຂວງ ຊຽງຂວາງ
ອິນໄຊລາວ
ຖ້ຳປິວ ສະຖານທີ່ປະຫວັດສາດທີ່ຍັງຄົງຢູ່ໃນຄວາມຊົງຈຳຂອງຄົນລາວ ທີ່ ເມືອງຄຳ, ແຂວງ ຊຽງຂວາງ
ຖ້າຈະເວົ້າເຖິງເລື່ອງປະຫວັດສາດແລ້ວ ແຂວງຊຽງຂວາງຖືວ່າເປັນແຂວງໜຶ່ງທີ່ມີປະຫວັດອັນຍາວນານ ແລະ ສະຖານທີ່ຕ່າງໆທີ່ຍັງຄົງຈົດຈຳກັນມາແຕ່ຜູ່ເຖົ້າຈົນເຖິງເດັກນ້ອຍຂື້ນໃໝ່, ແລະ ເປັນແຫລ່ງທ່ອງທ່ຽວທາງປະຫວັດສາດຢ່າງຫລວງຫລາຍ ແລະ ໃນຕອນນີ້ຈະຂໍຍົກສະຖາທີ່ອີກແຫ່ງໜຶ່ງເຊິງເປັນສະຖານທີ່ທີ່ຄົນລາວຄົງລືມບໍ່ໄດ້ ນັ້ນກໍຄື ອານຸສອນສະຖານ ຖ້ຳປິວ.
ຖ້ຳປິວ ເປັນອະນຸສອນສະຖານ ແລະ ເປັນແຫຼ່ງທ່ອງທ່ຽວທາງ ປະຫວັດສາດ ອັນເປັນສັນຍາລັກແຫ່ງຄວາມໂຫດຮ້າຍຂອງສົງຄາມໃນອາດີດ, ເປັນສະຖານທີ່ ທີ່ 374 ຊີວິດ ຈົບລົງພ້ອມກັນແບບບໍ່ໄດ້ສັ່ງລາຄອບຄົວ ເຊິ່ງຕັ້ງຢູ່ເທິງຜາຫິນສູງຊັນ ໃນເຂດບ້ານ ບວມລອງ, ເມືອງ ຄຳ, ແຂວງ ຊຽງຂວາງ ຫ່າງຈາກເທສະບານແຂວງ ຊຽງຂວາງ ປະມານ 57 ກິໂລແມັດ.
ເມື່ອປີ ຄສ 1964-1973 ຕາມຍຸດທະສາດ 3 ກ້ຽງ: ຂ້າກ້ຽງ, ທຳລາຍກ້ຽງ ແລະ ດັບສູນກ້ຽງ ຫຼື “Full killing, Destroying and Exterminating” ຂອງຜູ້ຮຸກຮານ, ຖ້ຳປິວ ເປັນຖ້ຳທີ່ປະຊາຊົນໃນທ້ອງຖິ່ນເຂດ ບ້ານ ລວມລອງ ເມືອງຄຳ ໃຊ້ເປັນສະຖານທີ່ລີ້ໄພໃນຍາມສົງຄາມ ແຕ່ມາໃນ ວັນທີ 24 ພະຈິກ ປີ ຄ.ສ 1968, ຖ້ຳແຫ່ງນີ້ ໄດ້ຖືກກອງກຳລັງອາກາດຂອງ ສະຫະລັດອາເມຣິກາ ບຸກໂຈມຕີ ແລະ ຖິ້ມລະເບີດທຳລາຍຢ່າງໜັກໜ່ວງ ໂດຍສະເພາະຍົນ F105 ໄດ້ຍິງລູກສອນໄພ ແບບທຳລາຍລ້າງຈາກອາກາດສູ່ພື້ນ 4 ລູກ ລູກສອນໄຟລູກທຳອິດໄດ້ຕົກໃສ່ປາກຖ້ຳ ແລະ ອີກ 3 ລູກເຂົ້າໄປໃນຖ້ຳ ເຮັດໃຫ້ປະຊາຊົນທີ່ອາໄສຢູ່ໃນຖ້ຳຈຳນວນ 374 ຄົນເສຍຊີວິດພ້ອມກັນ ຢ່າງໜ້າສັງເວດ ແລະ ຫົດຫູ່.
ໂສກອະນາດຕະກຳຖ້ຳປິວ ໄດ້ກາຍເປັນວັນປະຫວັດສາດ ທີ່ຄົນລາວທັງຊາດຈາລຶກໄວ້ເປັນ ວັນຄຽດແຄ້ນ ແລະ ຢັ້ງຢືນໂທດກຳຂອງຜູ້ກໍ່ສົງຄາມຮຸກຮານ ທີ່ໄດ້ທຳລາຍຊີວິດຂອງປະຊາຊົນລາວ ຜູ້ທີ່ບໍ່ມີຄວາມຜິດຫຍັງຕ້ອງຖືກຂ້າຕາຍຢ່າງອະນາຖາເຖິງ 374 ຄົນໃນພາບດຽວ.
ດັ່ງນັ້ນ, ລັດຖະບານ ຈຶ່ງໄດ້ກຳນົດໃຫ້ ຖ້ຳປິວ ເປັນສະຖານທີ່ປະຫວັດສາດຂອງຊາດ ແລະ ຈັດຕັ້ງພິທີໄຫວ້ອາໄລເຖິງດວງວິນຍານຂອງຜູ້ທີ່ເສຍຊີວິດ ໃນວັນທີ 24 ພະຈິກ ຂອງທຸກໆປີ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫຼ່ງຂໍ້ມູນຈາກ: ອິນໄຊລາວ.
