ພາສາລາວຄໍາວ່າ ລອດ ແລະ ຫລອດ ມີຄວາມໝາຍແນວໃດ?

SA Game

DooDiDo

ມາຮູ້ຈັກຄໍາວ່າ: ລອດ ແລະ ຫລອດ ມີຄວາມໝາຍແນວໃດ?

ໃນ​ພາ​ສາ​ລາວການ​ໃຊ້​ພະ​ຍັນ​ຊະ​ນະ​ຕ່າງ​ກັນ​ເລັກ​ນ້ອຍກັບ​ຄຳ​ຕ່າງໆ​ສ່ວນ​ຫລາຍ​ຈະ​ເຮັດ​ໃຫ້​ຄວາມ​ໝາຍ​ຂອງ​ຄຳ​ດັ່ງ​ກ່າວ​ປ່ຽນ​ໄປ ອາດ​ຈະ​ຫລາຍ​ ຫລື​ ນ້ອຍແລ້ວ​ແຕ່​ຄຳ​ສັບ​ນັ້ນໆ​ເຊິງ​ໃນ​ນັ້ນ​ອາດ​ຈະ​ຂື້ນ​ກັບ​ຕົວ​ອັກ​ສອນ​ແດ່​ເພາະ​ອັກ​ສອນ​ບາງ​ຕົວ​ກໍ​ບໍ່​ສາ​ມາດ​ປ່ຽນ​ສຽງ​ໄດ້​ຈາກ​ການ​ໃສ່​ວັນ​ນະ​ຍຸດ​ໃຫ້​ມັນ.

ບົດ​ນີ້​ຈະ​ຍົກ​ເອົາ​ຄຳ​ວ່າ ​ລອດ ແລະ ຫລອດ ມາ​ອະ​ທິ​ບາຍ, ເຊິງ​ສອງ​ຄຳ​ນີ້ອ່ານ​ອອກ​ສຽງ​ທີ່​ໃກ້​ຄຽງ​ກັນແຕ່ຕ່າງກັນເລັກ​ນ້ອຍ​ທີ່​ອັກ​ສອນ ຫ, ແຕ່ຄົນຕ່າງຊາດກໍ່ຍັງຈຳແນກສຽງອອກຍາກຢູ່ດີ ເພາະພາສາ ສາກົນບໍ່ມີວັນນະຍຸດສ່ວນຫຼາຍຈະອ່ານອອກສຽງກາງທີ່ບໍ່ມີສຽງ ເອກ-ໂທ ຄືພາສາລາວ ກັບ ພາສາໄທ. ແຕ່ໃນນີ້ຈະຕ້ອງເນັ້ນໜັກໃນການອອກສຽງ ຄໍາວ່າ: ລອດ, ຫລອດ ມັນມີຄວາມໝາຍໄປຄົນລະຢ່າງກັນ ແລະ ແຕ່ລະຄໍາກໍ່ມີຄວາມໝາຍໄປອີກຫຼາຍຢ່າງ.

SA Game
DooDiDo

ຄຳວ່າ ລອດ.

ໝາຍ​ເຖິງ​ການ​ເຂົ້າ​ໄປ​ບ່ອນ​ທີ່​ແຄບ ຫລື ເປັ​ນ​ປ່ອງ ຫລື ການ​ເອົາ​ຊະ​ນະ​ອຸ​ປະ​ສັກ​ຕ່າງໆ​ໄປ​ໄດ້.

ເປັນຄຳກຳມະ ໝາຍເຖິງ ຜ່ານໄປ, ເອົາຕົວຜ່ານເຂົ້າໄປໃນຮູ, ຜ່ານໄປໃນປ່ອງນ້ອຍໆ ເຊັ່ນ ລອດປ່ອງ, ລອດກ້ອງລ່າງ ນອກຈາກນີ້ຍັງໃຊ້ໃນຄວາມໝາຍ ລອດຕາຍ, ໄປລອດ, ໄປບໍ່ລອດ, ເອົາຕົວລອດ, ຊີວິດລອດ… (ສະຖາບັນຄົ້ນຄວ້າ​ຯ2012:848)

ຕົວ​ຢ່າງ:

  • ຄວາມ​ຮູ້​ຖ້ວມ​ຫົວ​ເອົາ​ຕົວ​ບໍ່​ລອດ.
  • ມີ​ເດັກ​ນ້ອຍ​ລອດ​ເຂົ້າ​ໄປ​ໃນ​ກົງ​ເຫລັກ​ນັ້ນ.
  • ລຸງ​ຂອງ​ຂ້ອຍ​ລາວ​ສາ​ມາດ​ເອົາ​ຕົວ​ລອດ​ຈາກ​ການ​ຕໍ່​ສູ້​ໃນ​ສົງ​ຄາມ.

ຄຳວ່າ ຫຼອດ.

ຄວາມ​ໝາຍ​ແມ່ນ​ມີ​ລັກ​ສະ​ນະ​ກົມ​ມີ​ຫູ​ທາງ​ໃນ ແລະ ນ້ອຍ.

ຄຳຄຸນນາມ ແປວ່າ ນ້ອຍ, ບໍ່ໃຫຍ່ເຊັ່ນ ຄົນໂຕນ້ອຍເອີ້ນວ່າ ຄົນຫຼອດ ນອກຈາກນີ້ຍັງເປັນຄຳນາມເຊັ່ນ: ລູກຫຼອດ  ໝາຍເຖິງຄົນທີ່ຖືກເຈາະອອກຈາກທ້ອງຂອງແມ່ກ່ອນກຳນົດເພື່ອມາເຮັດພິທີກຳຕາມຄວາມເຊື່ອ.(ສະຖາບັນຄົ້ນຄວ້າ​ຯ2012:805), ນອກ​ນັ້ນ​ຍັງ​ມີ​ຄວາມ​ໝາຍ​ອື່ນໆ​ອີກ​ເຊັນ:

  • ໝາກຫຼອດ ໝາກໄມ້ຊະນິດໜຶ່ງ ລັກສະນະຄືກັບຫຼອດຝ້າຍ, ມີລົດຊາດສົ້ມໆ (ຫວານກໍມີ)
  • ຫຼອດຝ້າຍ ໝາຍເຖິງອຸປະກອນພັນຝ້າຍໃສ່ໃນກະສວຍຕໍ່າຫູກ
  • ຊີ້ນຫຼອດ ຊີ້ນທີ່ເຮັດເປັນດິ້ວໆຕາກແດດ.
  • ຫຼອດລົມ ທໍ່ລົມໃນຮ່າງກາຍຄົນ ແລະສັດ.

ຕົວ​ຢ່າງ:

  • ​ທຸກ​ມື້​ນີ້​ຜູ້​ສາວ​ກິນ​ເບຍ​ກໍ​ຍັງ​ໃຊ້​ຫລອດ​ດູດ.
  • ໝາກ​ຫລອດ​ຢູ່​ບ້ານ​ຂ້ອຍ​ໂຄດ​ສົ້ມ​ເລີຍ.

ສະ​ຫ​ລຸບ.

ຄຳ​ວ່າ ລອດ ໝາຍ​ເຖິງ​ການ​ເຂົ້າ​ໄປ​ບ່ອນ​ທີ່​ແຄບ ຫລື ເປັ​ນ​ປ່ອງ ຫລື ການ​ເອົາ​ຊະ​ນະ​ອຸ​ປະ​ສັກ​ຕ່າງໆ​ໄປ​ໄດ້. ສ່ວນ​ຄຳ​ວ່າ ຫລອດ ໝາຍ​ເຖິງ​ສິ່ງ​ທີ່​ນ້ອຍ​ກົມ ແລະ ມີ​ຫູ​ທາງ​ໃນ ຫລື ເປັນ​ຊື່​ຂອງ​ໝາກ​ໄມ້, ຝ້າຍ, ຊິ້ນ​ຫລອດ, ຫລອດ​ລົມ ແລະ ອື່ນໆ.

ຕິດຕາມ​ຂ່າວການ​ເຄືອນ​ໄຫວທັນ​​ເຫດ​ການ ເລື່ອງທຸ​ລະ​ກິດ ແລະ​ ເຫດ​ການ​ຕ່າງໆ ​ທີ່​ໜ້າ​ສົນ​ໃຈໃນ​ລາວ​ໄດ້​ທີ່​ DooDiDo