ຕາດເລາະ-ຕາດຮັງ ກ່ຳລັງເປັນບ່ອນທີ່ນັກທ່ອງທ່ຽວນິຍົມທ່ຽວ
ຂປລ
ໃນປີ 2023 ນີ້ ນັກທ່ອງທ່ຽວເຂົ້າມາທ່ຽວຕາດເລາະ-ຕາດຮັງ ຢ່າງຄັບຄາໜາແໜ້ນ
ສປປ ລາວ ມີແຫຼ່ງທ່ອງທ່ຽວທາງທຳມະຊາດທີ່ສວຍງາມຫລາຍແຫ່ງໃນຂອບເຂດທົ່ວປະເທດ ແລະ ອີກຕາດໜຶ່ງທີ່ມີນັກທ່ອງທ່ຽວນິຍົມກັນໄປ ກໍຄືແຫລ່ງທ່ອງທ່ຽວນໍ້າຕົກຕາດເລາະ-ຕາດຮັງ ເຊິ່ງສາມາດດຶງດູດນັກທ່ອງທ່ຽວ ໄດ້ຢ່າງໜາແໜ້ນລະຫວ່າງການສະເຫລີມສະຫລອງປີໃໝ່ລາວຜ່ານມານີ້ ເຊິ່ງໄດ້ປະກອບສ່ວນການເກັບລາຍຮັບແຂວງ, ເມືອງ ແລະ ບ້ານຕ່າງໆພາຍໃນແຂວງສາລະວັນ ນອກຈາກນັ້ນຍັງສ້າງວຽກເຮັດງານທໍາໄດ້ເປັນຢ່າງດີ.
ຜູ້ປະກອບການຄ້າຂາຍ ແລະ ເຈົ້າເຮືອນພັກ-ໂຮງແຮມຢູ່ບໍລິເວນອອ້ມຂ້າງໄດ້ລາຍງານວ່າປີນີ້ ການສະຫອງປີໃໝ່ຄຶກຄັກເປັນພິເສດ ເຊິ່ງມີຈໍານວນນັກທ່ອງທ່ຽວພາຍໃນ ແລະ ຕ່າງປະເທດແວ່ເຂົ້າມາຫລິ້ນຢ່າງຫລວງຫລາຍ, ເຊິ່ງໄດ້ສົ່ງຜົນດີພາຍຫລັງພວກເຮົາ ບໍ່ໄດ້ຈັດງານສະຫລອງປີໃໝ່ລາວມາແຕ່ທ້າຍປີ 2019 ແລະ ມາຮອດຕົ້ນປີ 2022 ລັດຖະບານໄດ້ເປີດປະເທດຄືນໃໝ່ອັນສືບເນື່ອງມາຈາກການລະບາດຂອງພະຍາດໂຄວິດນັ້ນເອງ.
ເປັນເວລາ 3 ມື້ຂອງການສະຫລອງປີໃໝ່ເຫັນວ່ານັກທ່ອງທ່ຽວເຂົ້າມາຫລິ້ນສະຖານທີ່ດັ່ງກ່າວບໍ່ຕໍ່າກວ່າໝື່ນຄົນ ເຊິ່ງໄດ້ເຮັດໃຫ້ການສະຫລອງປີໃໝ່ ເຕັມໄປດ້ວຍຄວາມເບີກບານມ່ວນຊື່ນ ແລະ ມີບັນຍາກາດຄຶກຄື້ນ ເຊິ່ງກິດຈະກຳສ່ວນໃຫຍ່ມີຄື: ໄດ້ຈັດສະຖານທີ່ຫລິ້ນນ້ຳ, ມີຂົວຂ້າມນ້ຳສຳລັບຍ່າງທ່ຽວ ຊົມເບິ່ງນ້ຳ ຕົກຕາດ, ບ່ອນຖ່າຍຮູບ, ຕູບນັ່ງຫລິ້ນຫລາຍກວ່າ 80 ຕູບ, ບໍລິການກົງເບັງ, ສະໄລເດີນໍ້າ, ສະລິງ, ຂົວອູ່ ແລະ ກິດຈະກຳອື່ນໆ ພ້ອມນັ້ນຍັງມີເຮືອນພັກ, ຮ້ານອາຫານ ແລະ ບໍລິການດ້ານການທ່ອງທ່ຽວອື່ນໆ.
ສະຖານທີ່ທ່ອງທ່ຽວແຫ່ງນີ້ຫ່າງຈາກເທດສະບານເມືອງສາລະວັນ 28 ກິໂລແມັດ ແລະ ຫ່າງຈາກນະຄອນປາກເຊ ແຂວງຈຳປາສັກ 80 ກິໂລແມັດ. ນອກຈາກແຫລ່ງທ່ອງທ່ຽວແຫ່ງນີ້ແລ້ວ ແຂວງສາລະວັນ ຍັງມີແຫລງທ່ອງທ່ຽວທາງດ້ານວັດທະນະທຳ, ປະຫັວດສາດ ອີກຫລາຍແຫ່ງ ເປັນຕົ້ນ: ຂົວທ່ານ ສຸພານຸວົງ, ເສັ້ນທາງໂຮ່ຈີ່ມິງ, ແຫລ່ງທ່ອງທ່ຽວທາງທຳມະຊາດ ເຊັນ: ອຸທິຍານພູຜາສຸກ, ປາກເສັດ-ແກ້ງກຸ ແລະ ອື່ນໆໃຫ້ທ່ານ ໄດ້ມາທ່ອງທ່ຽວສຳຜັດບັນຍາກາດຕົວຈິງ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫຼ່ງຂໍ້ມູນຈາກ: ຂປລ
