ຈັດງານພິທີທາງສາສະໜາຫຼໍ່ໝວກເຈົ້າອະນຸວົງ ທີ່ແຂວງໄຊສົມບູນ
ອິນໄຊລາວ
ສ້າງໃຫ້ເປັນແຫຼ່ງທ່ອງທ່ຽວ! ແຂວງໄຊສົມບູນ ຈັດພິທີທາງສາສະໜາ ເພື່ອເທທອງຫຼໍ່ໝວກເຈົ້າອະນຸວົງ
ເຈົ້າອານຸວົງ ຖືວ່າເປັນສັນຍາລັກຂອງແຂວງໄຊສົມບູນ ແລະ ທາງແຂວງໄຊສົມບູນເອງກໍໄດ້ຈັດພິທີທາງສາສະໜາ ເພື່ອເທທອງຫຼໍ່ໝວກເຈົ້າອະນຸວົງ ເພື່ອເປັນການສ້າງສະຖານທີ່ແຫ່ງນີ້ ໃຫ້ກາຍເປັນສະຖານທີ່ທ່ອງທ່ຽວ ຂອງແຂວງ ແລະ ລະນຶກເຖິງການເສຍສະຫຼະຂອງເຈົ້າອະນຸວົງ ເພື່ອພາລະກິດປົກປັກຮັກສາປະເທດຊາດໃຫ້ຊາວເມືອງອານຸວົງກໍຄືປະຊາຊົນລາວທົ່ວປະເທດໄດ້ກ່າວຂານໄປຕະຫລອດການ.
ພິທີດັ່ງກ່າວ ໄດ້ຈັດຂຶ້ນຢູ່ທີ່ເດີ່ນສວນສາທາລະນະຖໍ້າເຈົ້າອະນຸວົງ ໂດຍເຂົ້າຮ່ວມພິທີໃນຄັ້ງນີ້ ມີ ທ່ານ ພອຍຄໍາ ຮຸ່ງບຸນຍວງ, ເຈົ້າແຂວງໄຊສົມບູນ ພ້ອມດ້ວຍການນໍາແຂວງ ຕະຫຼອດຮອດບໍລິສັດຮັບເໝົາກໍ່ສ້າງ, ບໍລິສັດທີ່ປຶກສາ, ພຣະສົງ 3 ອົງ ແລະ ພາກສ່ວນທີ່ກ່ຽວຂ້ອງຕ່າງໆຈ່ຳນວນຫລວງຫລາຍ ເຂົ້າຮ່ວມໃນພິທີ.
ກ່ອນດຳເນີນພິທີສູດປະລິຕະມຸງຄຸນ ທ່ານ ພອຍຄໍາ ຮຸ່ງບຸນຍວງ ໄດ້ຍົກໃຫ້ເຫັນຄວາມໝາຍ-ສໍາຄັນຂອງການກໍ່ສ້າງອະນຸສາວະລີ ກໍຄືສວນສາທາລະນະຖໍ້າເຈົ້າອະນຸວົງ ແຫ່ງນີ້ ກໍເພື່ອໃຫ້ພະນັກງານ-ລັດຖະກອນ, ທະຫານ, ຕໍາຫຼວດ ຕະຫຼອດຮອດພໍ່ແມ່ປະຊາຊົນ ຊາວແຂວງໄຊສົມບູນ.
ໂດຍສະເພາະແມ່ນໃຫ້ຄົນຮຸ່ນໃໝ່ ໄດ້ເຂົ້າໃຈ ແລະ ກໍາໄດ້ມູນເຊື້ອອັນດີງາມ ຂອງເຈົ້າອະນຸວົງ ແລະ ບັນດານັກຮົບປະຕິວັດ ທີ່ເຄີຍເສຍສະຫຼະເພື່ອພາລະກິດປົກປັກຮັກສາປະເທດຊາດ ກໍຄືແຂວງໄຊສົມບູນ ໃນໄລຍະທີ່ເພີ່ນເຄີຍມາພັກຜ່ອນຢູ່ຖໍ້າແຫ່ງນີ້ ແລະ ອີກຢ່າງໜຶ່ງ ກໍເພື່ອເປັນການສ້າງສະຖານທີ່ແຫ່ງນີ້ ໃຫ້ກາຍເປັນສະຖານທີ່ທ່ອງທ່ຽວ ທີ່ມີຄວາມສວຍງາມ, ຄົງຄວາມເປັນທໍາມະຊາດ ແລະ ເຕັມໄປດ້ວຍຄວາມໝາຍທາງປະຫວັດສາດ.
ຈາກນັ້ນ ໄດ້ມີພິທີທາງສາສະໜາສູດປະລິຕະມຸງຄຸນ, ຢາດນໍ້າ ແລະ ສູດຖອດເທທອງຫຼໍ່ໝວກເຈົ້າອະນຸວົງ ເພື່ອເປັນສິລິມຸງຄຸນ, ສັກສິດ ແລະ ກາຍເປັນມິ່ງຂວັນ ຂອງຊາວແຂວງໄຊສົມບູນ ຕະຫຼອດໄປ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫຼ່ງຂໍ້ມູນຈາກ: ອິນໄຊລາວ.
