ຄ່າທຳນຽມທາງ ແຂວງໄຊສົມບູນ ເຜີຍແຜ່ແນະນຳ ການນຳໃຊ້ ລະບົບຄຸ້ມຄອງການເກັບລາຍຮັບຄ່າທຳນຽມທາງ ແບບເອເລັກໂຕຣນິກ ໃນວັນທີ 29 ພຶດສະພາ 2023 ໂດຍພະແນກການເງິນແຂວງໄຊສົມບູນ ຮ່ວມກັບສ່ວຍສາອາກອນປະຈຳ,  ໄດ້​ຈັດໃຫ້ພະນັກງານສ່ວຍສາອາກອນປະຈຳແຂວງ, ເມືອງ ແລະ ພາກສ່ວນທີ່ກ່ຽວຂ້ອງ ເພື່ອໃຫ້ເຈົ້າໜ້າທີ່ດັ່ງກ່າວ ສາມາດຄຸ້ມຄອງ, ຕິດຕາມ ແລະ ສັງລວມລາຍລະອຽດຍານພາຫະນະໃນຂອບເຂດທົ່ວປະເທດ, ພ້ອມທັງຕ້ານການຮົ່ວໄຫລຂອງງົບປະມານແຫ່ງລັດ.

ທ່ານ ຫົງຄຳ ພົມວິລາດ ຫົວໜ້າສ່ວຍສາອາກອນປະຈຳແຂວງໄຊສົມບູນ ໄດ້ກ່າວວ່າ: ການເກັບລາຍຮັບ ຄ່າທຳນຽມທາງ ແມ່ນມີຄວາມສຳຄັນຫລາຍ ຕໍ່ກັບການຈັດເກັບລາຍຮັບເຂົ້າງົບປະມານແຫ່ງລັດ ເຊິ່ງລັດຖະບານ ກໍຄືກະຊວງການເງິນໃຫ້ຄວາມສຳຄັນຕໍ່ວຽກງານດັ່ງກ່າວ ເພື່ອໃຫ້ເຈົ້າໜ້າທີ່ສ່ວຍສາອາກອນ ສາມາດຄຸ້ມຄອງ, ຕິດຕາມ ແລະ ສັງລວມລາຍລະອຽດຍານພາຫະນະໃນຂອບເຂດທົ່ວປະເທດ,ພ້ອມທັງຕ້ານການຮົ່ວໄຫລ ຂອງງົບປະມານແຫ່ງລັດ.

ປັດຈຸບັນກະຊວງການເງິນ ກໍຄືກົມສ່ວຍສາອາກອນ ສາມາດເຊື່ອມຕໍ່ກັບຖານຂໍ້ມູນຍານພາຫະນະ ຂອງກອງຄຸ້ມຄອງພາຫະນະ ແລະ ການຂັບຂີ່ ໃນຂອບເຂດທົ່ວປະເທດ ກັບລະບົບ TaxRIS ໃນການຊໍາລະຄ່າທຳນຽມທາງ, ເຊິ່ງສາມາດຊໍາລະໄດ້ທີ່ສ່ວຍສາອາກອນປະຈໍາ ແຂວງ, ເມືອງ ແລະ ຜ່ານລະບົບທະນາຄານ 4 ທະນາຄານທຸລະກິດເຊັ່ນ: ທະນາຄານການຄ້າຕ່າງປະເທດລາວ ມະຫາຊົນ, ທະນາຄານພັດທະນາລາວຈຳກັດ, ທະນາຄານຮ່ວມພັດທະນາ, ທະນາຄານສົ່ງເສີມກະສິກຳຈຳກັດ, ເພື່ອໃຫ້ການຜັນຂະຫຍາຍລະບົບດັ່ງກ່າວ ໃຫ້ສຳເລັດຜົນ, ຈຶ່ງໄດ້ມີການຝຶກອົບຮົມການນຳໃຊ້ ເພື່ອໃຫ້ສາມາດເກັບລາຍຮັບຄ່າທຳນຽມທາງ ເຂົ້າລະບົບຢ່າງຖືກຕ້ອງ ແລະ ຄົບຖ້ວນ.

ພ້ອມທັງເອົາໃຈໃສ່ຕິດຕາມການຝຶກອົບຮົມການແນະນໍາ ການນໍາໃຊ້ລະບົບ, ຖ້າມີບັນຫາໃດໃຫ້ແລກປ່ຽນນໍາກັນ ເພື່ອໃຫ້ເປັນເອກະພາບໃນການຈັດຕັ້ງປະຕິບັດ.

ທ່ານ ຫົງຄຳ ພົມວິລາດ ໄດ້ຮຽກຮ້ອງໃຫ້ຜູ້ເຂົ້າຮ່ວມ ຈົ່ງພ້ອມກັນເອົາໃຈໃສ່ຈັດຕັ້ງປະຕິບັດການນຳໃຊ້ລະບົບຄຸ້ມຄອງ ການເກັບລາຍຮັບຄ່າທຳນຽມທາງ ແບບເອເລັກໂຕຣນິກ, ສ້າງຂະບວນການເຜີຍແຜ່ແຈ້ງການຂອງຫ້ອງການກະຊວງການເງິນສະບັບເລກທີ 1049/ຫກ, ກົມສ່ວຍສາອາກອນສະບັບເລກທີ 2052/ກສອ ວ່າດ້ວຍການເສຍຄ່າທໍານຽມທາງ ປະຈໍາປີ 2023 ເພື່ອແນະນຳ ການນຳໃຊ້ລະບົບຫັນເປັນທັນສະໄໝ ແລະ ໃຫ້ໄດ້ຮັບຜົນດີ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ Lao insight

ຂອບ​ໃຈແຫຼ່ງຂໍ້ມູນຈາກ: ຂປລ.