ຄູ່ຮ່ວມທາງດ້ານທຸລະກິດລະຫວ່າງ ອີທີແອລ ລາວ ແລະ ຊຽວໝີ ຈີນ.
ພາບ: ຂປລ
ເປີດຕົວການຮ່ວມມືທາງດ້ານທຸລະກິດລະຫວ່າງ ບໍລິສັດອີທີແອລ ແລະ ຊຽວໝີ.
ຕາມແຫລ່ງຂ່າວ ຂປລ ໃຫ້ຮູ້ວ່າ ໃນວັນທີ 16 ຕຸລາ 2020, ຜູ້ອໍານວຍການໃຫຍ່ ບໍລິສັດ ອິີທີແອລ ຈໍາກັດ ທ່ານ ຮວງ ສູຢຸນ ແລະ ທ່ານ ວັງລີນ ບໍລິສັດ ຊຽວໝີ ເປັນຜູ້ຕາງໜ້າລົງນາມສັນຍາ ຮ່ວມມື ການນຳສະເໜີໜ່ວຍໂທລະສັບມືຖືຊຽວໝີ ລຸ້ນໃໝ່ພ້ອມ function 4 ຢ່າງ ແລະ ແພັກເກັດຂອງໜ່ວຍໂທລະສັບຊຽວໝີ ທີ່ນຳສະເໜີໂດຍ ທ່ານ ນາງ ຮວງຟັນຊີງ ຜູ້ຕາງໜ້າ ບໍລິສັດ ຊຽວໝີ ຢູ່ ສປປ ລາວ.
ທ່ານ ຮວງ ສູຢຸນ ກ່າວວ່າ: ບໍລິສັດ ອີທີແອລ ຈຳກັດ ເປັນບໍລິສັດ ທີ່ໃຫ້ບໍລິການດ້ານການໂທລະຄົມ ຮ່ວມທຶນລະຫວ່າງລາວ-ຈີນ, ມີເງື່ອນໄຂຄົບຖ້ວນດ້ານເຄືອຂ່າຍໂທລະຄົມມະນາຄົມ ແລະ ເຄືອຂ່າຍໄດ້ປົກຄຸມທົ່ວປະເທດ. ທຸລະກິດໄດ້ກວມເອົາໂທລະສັບມືຖື, ໂທລະສັບຕັ້ງໂຕະ, ອິນເຕີເນັດ ແລະ ບໍລິການເສີມຕ່າງໆ; ສັນຍານ 4G ໄດ້ທົ່ວເຖິງທຸກເມືອງ ທຸກແຂວງ ຂອງປະເທດລາວ.
ສໍາລັບສັນຍານ 4,5G ໄດ້ກວມເຖິງເມືອງ ທີ່ສໍາຄັນຂອງ ນະຄອນຫລວງວຽງຈັນ, ແຂວງສະຫວັນນະເຂດ, ແຂວງຫລວງພະບາງ, ແຂວງຈຳປາສັກ. ການຮ່ວມມືລະຫວ່າງ ບໍລິສັດ ອີທີແອລ ຈໍາກັດ ແລະ ບໍລິສັດ ຊຽວໝີ ຈະເປີດພາກໃໝ່ ລະຫວ່າງທັງສອງບໍລິສັດໃນການພັດທະນາ.
ບໍລິສັດ ອີທີແອລ ຈໍາກັດ ແລະ ບໍລິສັດ ຊຽວໝີ ຍັງໄດ້ຮ່ວມກັນຕອບສະໜອງຜະລິດຕະພັນ ຊຸດສະມາດໂຟນ ຊຽວໝີ ທີ່ມີຄຸນະພາບ ທີ່ເປັນທີ່ນິຍົມໃຊ້ຂອງລູກຄ້າເພື່ອໃຫ້ເຂົ້າກັບເຄືອຂ່າຍ 4.5G ຂອງ ບໍລິສັດ ອີທີແອລ ເພື່ອໃຫ້ລູກຄ້າສາມາດເລືອກສິນຄ້າທີ່ມີຄຸນນະພາບ, ລາຄາຖືກ ແລະ ທັນສະໄໝ.
ທ່ານ ວັງລີນ ບໍລິສັດ ຊຽວໝີ ໄດ້ປະກອບຄໍາເຫັນວ່າ: ຍີ່ຫໍ້ ຊຽວໝີ ໄດ້ເຂົ້າສູ່ຕະຫລາດ ສປປ ລາວ ຢ່າງເປັນທາງການ ໃນວັນທີ 23 ກັນຍາ ປີ 2018, ປະເທດລາວ ເປັນປະເທດ ທີ 17 ທີ່ຍອດຈໍານວນການຂາຍເຂົ້າເປັນໜຶ່ງໃນອັນດັບ 5 ທໍາອິດຂອງຍີ່ຫໍ້ ຊຽວໝີ, ປະລິມານການເປີດນໍາໃຊ້ສະມາດໂຟນໃໝ່ ໄດ້ບັນລຸເຖິງ 500 ກ່ວາໜ່ວຍຕໍ່ມື້. ໃນໄລຍະ 2 ປີຜ່ານມາ, ບໍລິສັດ ຊຽວໝີ ໄດ້ເປີດຮ້ານຈຳໜ່າຍໂທລະສັບແຫ່ງທໍາອິດ ໃນ ສປປ ລາວ ພ້ອມກັນນັ້ນໄດ້ລົງທຶນ ຊຽວໝີ Park ແລະ ເປີດຮ້ານໂຊປິນອອນລາຍ Mimall.la. ມາຮອດປີ 2020 ມີແຜນການດໍາເນີນທຸລະກິດ ດ້ວຍຮູບແບບ E-commerce+Physical store, ເພື່ອເຮັດໃຫ້ສີສັນພິເສດ ຂອງຊຽວໝີ ສາມາດເຂົ້າເລິກເຖິງໃນຕະຫລາດລາວ.
ຜ່ານການຮ່ວມມື ລະຫວ່າງທັງສອງຝ່າຍ ທາງບໍລິສັດ ອີທີແອລ ຈຳກັດ ຈະສະໜອງບໍລິການທີ່ຮອບດ້ານກວ່າເກົ່າ, ຜະລິດຕະພັນທີ່ສົມບູນກວ່າເກົ່າ, ສ້າງຄວາມຮູ້ສຶກແບບພິເສດກວ່າເກົ່າໃຫ້ແກ່ລູກຄ້າທັງສອງຝ່າຍ. ໃນການຮ່ວມມືລະຫວ່າງ ທັງສອງຝ່າຍໃນຄັ້ງນີ້ ແມ່ນຈະເສີມຂະຫຍາຍຍີ່ຫໍ້ໂທລະສັບຊຽວໝີ ໃຫ້ເປັນທີ່ນິຍົມ ແລະ ກວ້າງຂວາງ ເພື່ອໃຫ້ບັນລຸເປົ້າໝາຍຕາມທີ່ວາງໄວ້.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ: ຂປລ.
