ຄຳວ່າ ຮັບຮອງ ແລະ ຮອງຮັບ ມີ​ຄວາມ​ໝາຍ​ແນວ​ໃດ​ໃນ​ພາ​ສາ​ລາວ

SA Game

DooDiDo

ອະທິບາຍຄຳວ່າ ຮັບຮອງ ແລະ ຮອງຮັບ ໃນພາສາລາວ .

ຄຳເວົ້າໃນພາສາລາວຍັງມີອີກຫຼາກຫຼາຍຄຳສັບທີ່ຍັງເຮັດໃຫ້ເກີດມີຂໍ້ສົງໃສ ແລະ ຄ້າງຄາໃຈວ່າຄວນເວົ້າຄຳໃດໃນເວລາໃດ, ເພາະຄຳເວ້າບາງຄຳນັ້ນມີສຽງ ແລະ ຮູບຄຳຄ້າຍຄືກັນຕ່າງແຕ່ສະຫຼັບຄຳຫໜ້າຫຼັງ ຈື່ງອາດພາໃຫ້ເກີດເປັນຈຸດອ່ອນໃນການໃຊ້ຄຳສັບ, ການໃຊ້ສື່ສານ, ແລະ ມັກພາໃຫ້ໃຊ້ຜິດເປັນບາງຄັ້ງ ເພື່ອໃຫ້ໃຊ້ຖືກຕາມຄວາມໝາຍຂອງແຕ່ລະຄຳ ດັ່ງນັ້ນມື້ນີ້ເຮົາຈື່ງຈະນຳເອົາຄຳວ່າ ຮັບຮອງ ແລະ ຮອງຮັບ ມາອະທິບາຍ.

ຄຳວ່າ  ຮັບຮອງ ແລະ ຮອງຮັບ  ​ສອງ​ຄຳ​ນີ້ຫຼາຍຄົນອາດຄິດວ່າສາມາດໃຊ້ຄຳໃດທົດແທນກັນກໍ່ໄດ້ ເພາະສອງຄຳສັບນີ້ອາດມີຮູບການຂຽນ ແລະ ນ້ຳສຽງທີ່ຄ້າຍຄືກັນ ຈື່ງເຮັດໃຫ້ເຮົາເກີດມີຄວາມຄິດວ່າຄວນໃຊ້ຄຳໃດຈື່ງຈະຖືກຕ້ອງກັບຫຼັກໄວຍະກອນຂອງລາວເຮົາ ໂດຍສະເພາະແມ່ນຄົນຕ່າງຊາດທີ່ມາທ່ຽວ ຫຼື ອາໃສຢູ່ລາວທີ່ອາດຍັງບໍ່ເຂົ້າໃຈໃນຄຳເວົ້າ ແລະ ຄວາມໝາຍຂອງທັງສອງຄຳນີ້, ດັ່ງນັ້ນມື້ນີ້ເຮົາຈະມາລົງລຶກເຖິງສອງຄຳນີ້ວ່າມັນມີຄວາມໝາຍ ແລະ ການນຳໃຊ້ຄືແນວໃດ.

SA Game
DooDiDo

ຄຳວ່າ ຮັບຮອງ.

     ຄຳວ່າ ຮັບຮອງ ເປັນຄຳກະລິຍາແບບປະສົມລະຫວ່າງຄຳວ່າ ຮັບ ທີ່ມີຄວາມໝາຍວ່າ ຍິນດີຮັບເອົາ ກັບ ຮອງ ທີ່ໝາຍເຖິງ ຮັບເອົາ, ໂຕ່ງເອົາ ເມື່ອສອງຄຳນີ້ປະສົມເຂົ້າກັນເປັນ ຮັບຮອງ ກໍ່ຈະມີຄວາມໝາຍວ່າ ຍິນດີຮັບເອົາເຊັ່ນ :

ຕົວຢ່າງ :

  1. ເພິ່ນໄດ້ຈັດງານລ້ຽງຮັບຮອງແຂກທີ່ໂຮງແຮມແສງແກ້ວ.
  2. ພິຈາລະນາ ແລະ ຮັບຮອງເອົາການເຄື່ອນໄຫວວຽກງານປີ2020ທີ່ຜ່ານມາ.
  3. ສິນຄ້າທີ່ເຮົານຳມາຂາຍຮັບຮອງເລີຍວ່າຄຸນນະພາບດີ100%.

ຄຳວ່າ ຮອງຮັບ.

     ຄຳວ່າ ຮອງຮັບ ເປັນຄຳກິລິຍາແບບປະສົມລະຫວ່າງຄຳວ່າ ຮອງ ທີ່ມີຄວາມໝາຍວ່າ ຮັບເອົາ, ໂຕ່ງເອົາ, ກັບຄຳວ່າ ຮັບ ທີ່ມີຄວາມໝາຍວ່າເອົາສິ່ງຂອງຕາມທີ່ໄດ້ມາ, ເມື່ອສອງຄຳນີ້ປະສົມເຂັ້າກັນ ເປັນຄຳວ່າ ຮອງຮັບ ກໍຈະມີຄວາມໝາຍວ່າ ຮັບນ້ຳໜັກ ຫຼື ຈຳນວນໄດ້ເຊັ່ນ :

ຕົວຢ່າງ :

  1. ໂຮງແຮມແຫ່ງນີ້ສາມາດຮອງຮັບແຂກໄດ້ພຽງແຕ່ 40 ທ່ານເທົ່ານັ້ນ.
  2. ເພິ່ນໄດ້ກຳນົດເອົາໂຮງຮຽນເປັນບ່ອນຮອງຮັບແຮງງານລາວທີ່ເດີນທາງກັບມາຈາກປະເທດເພື່ອນບ້ານ.
  3. ລົດຄັນນີ້ຮອງຮັບນ້ຳໜັກໄດ້ບໍ່ເກີນ 30 ໂຕນ.

ສະຫຼຸບ.

     ຄຳວ່າ ຮັບຮອງ ແລະ ຮອງຮັບ ເປັນສອງຄຳປະເພດຄຳກິລິຍາທີ່ມີສຽງ ແລະ ຮູບຄຳຄ້າຍຄືກັນ ຕ່າງແຕ່ສະຫຼັບຄຳໜ້າຫຼັງກັນພຽງເທົ່ານັ້ນ ແຕ່ກໍມີຄວາມໝາຍທີ່ແຕກຕ່າງກັນອອກໄປດັ່ງທີ່ເຮົາໄດ້ຍົກຕົວຢ່າງຂື້ນມາຂ້າງເທິງນັ້ນ, ດັ່ງນັ້ນເຮົາຈື່ງສະຫຼຸບໄດ້ວ່າ ທັງສອງຄຳສັບນີ້ແມ່ນມີຄວາມໝາຍທີ່ແຕກຕ່າງກັນຢ່າງແນ່ນອນ ແຕ່ມີຮູບການຂຽນ ແລະ ສຽງຄ້າຍຄືກັນເທົ່ານັ້ນເອງ.

ຕິດຕາມ​ຂ່າວການ​ເຄືອນ​ໄຫວທັນ​​ເຫດ​ການ ເລື່ອງທຸ​ລະ​ກິດ ແລະ​ ເຫດ​ການ​ຕ່າງໆ ​ທີ່​ໜ້າ​ສົນ​ໃຈໃນ​ລາວ​ໄດ້​ທີ່​ DooDiDo